Son zamanlar Ermənistan mediası Kremlin bu ölkədəki anti-Rusiya əhval-ruhiyyəsindən narahat olduğu barədə xəbərdarlıq edir. Ermənistanın “Qraparak” nəşri yazır ki, yaranmış vəziyyətlə bağlı olaraq Rusiyadan Ermənistana müxtəlif hökumət dairələrindən, jurnalistlərdən ibarət ekspertlər qrupu gəlib.
Qeyd edilir ki, Moskva Ermənistanda baş verənlərdən çox narahatdır: “Son günlər onlar Ermənistanda rusiyayönlü sektorun nümayəndələri ilə intensiv görüşlər keçirir, Ermənistan-Rusiya münasibətlərinin yaxşılaşdırılması və anti-Rusiya əhval-ruhiyyəsinin yumşaldılması məsələlərini müzakirə edirlər. Lakin bu görüşlərdə yeni ittifaq dövləti ideyasının təbliğ olunduğu və erməni siyasətçilərinin bu istiqamətdə təbliğat aparmağa çağırıldığı barədə məlumatlar var”. İddia edilir ki, Rusiya-Ermənistan ittifaq dövlətinin (Belarus-Rusiya ittifaq dövləti modelinə uyğun) yaradılmasına çağırışlar, əslində Ermənistanda 44 günlük müharibədən sonra imzalanmış kapitulyasiyanın ardınca səslənməyə başlayıb. Bir çox rusiyapərəst siyasətçi Ermənistanın yeganə xilas yolunun Rusiya ilə ittifaq dövlətində birləşməsi olduğunu dəfələrlə gündəmə gətirib. Lakin buna paralel olaraq Ermənistanda Rusiyanı “düşmən” adlandıranların və rus qoşunlarını ölkədən çıxarmağa çağıranların da sayı artıb. Amerika Beynəlxalq Respublikaçılar İnstitutunun Ermənistanda ictimai rəy sorğusu ilə bağlı növbəti araşdırması da bunu təsdiq edir. Məlumata görə, sorğu 2021-ci ilin noyabr-dekabr aylarında keçirilib. Respondentlərin böyük əksəriyyəti Türkiyəni (90%) və Azərbaycanı (77%) Ermənistan üçün əsas siyasi təhlükə hesab edir. Ermənilərin böyük əksəriyyəti iki ölkəni həm təhlükəsizlik (müvafiq olaraq 88 və 81%), həm də iqtisadi baxımdan (müvafiq olaraq 68 və 52%) təhlükə hesab edir. Respondentlərin təxminən 59%-i düşünür ki, Azərbaycanla nəqliyyat marşrutlarının açılması Ermənistanın iqtisadi inkişafına mənfi təsir göstərəcək (27% isə əksini düşünür). Türkiyə ilə yolların açılmasına gəldikdə isə mənzərə, demək olar ki, eynidir, 53% bunun Ermənistana mənfi təsir edəcəyini düşünür. Təbii ki, Ermənistanda Türkiyə və Azərbaycana belə münasibət başadüşüləndir. Lakin respondentlərin 15%-i Rusiyanı da Ermənistan üçün ciddi təhdid kimi qəbul edib. Elə bu da Rusiyanın Ermənistandan narahatlığını artırıb. Rusiya Dövlət Dumasının deputatı, MDB işləri üzrə Duma komitəsinin sədr müavini, ənənəvi ermənipərəst mövqeyi ilə tanınan Konstantin Zatulin bu rəy sorğusuna münasibət bildirərkən deyib ki, Ermənistanda daxili siyasi mübarizə çərçivəsində Rusiyaya qarşı iradlar yağışdan sonra göbələk kimi artır. Onun sözlərinə görə, bütün bu iradların arxasında baş nazir Nikol Paşinyanın elektoratı olan blogerlər və politoloqlar dayanır: “Yəni belə ittihamlar irəli sürmək dəbdədir ki, Rusiya Ermənistana “atıb”, onu dəstəkləməyib və “Ermənistana dərs vermək üçün” bütün bu baş verənləri az qala özü planlaşdırıb. Və ilk dəfədir ki, bu əhval-ruhiyyə Ermənistan əhalisi arasında əks-səda verir. Rusiyaya simpatiya orada bu cür kəskin aşağı düşür”. Deputat situasiyanı “paradoksal” adlandırır: axı bu gün məhz Rusiya Qarabağ ermənilərinin özlərini qismən də olsa təhlükəsiz şəraitdə hiss etməsini təmin edir. Çünki orada Rusiya sülhməramlı kontingenti var. Ermənistanın özündə isə antirusiya əhvalı güclənir: “Yəni eyni vaxtda bir neçə daxili münaqişə baş verir: Ermənistan erməniləri ilə Qarabağ erməniləri arasında münaqişə. Qarabağ erməniləri hesab edir ki, Ermənistan hökuməti və ümumən Ermənistan onları atıb. Ermənistanın özündə isə belə versiya inkişaf edir ki, Rusiya güvəniləsi müttəfiq deyil və bütün bunlar Türkiyə ilə yaxınlaşmaya yönəlmiş nümayişkaranə addımlar fonunda baş verir. Bu isə erməni xalqı üçün kimin yaxşı, kimin pis olduğu barədə ciddi sınaqdır, çünki onilliklər boyu Ermənistanda hökm sürən təsəvvürləri mütləq şəkildə sındırır”.
Bu arada qeyd edək ki, Ermənistan mediası və cəmiyyətində 44 günlük müharibə ilə bağlı Rusiyaya qarşı səslənən ittihamlar səngimək bilmir. Məsələ anti-Rusiya bəyanatları ilə də bitmir. İstər müharibənin gedişində, istər müharibədən sonra, istərsə də indi Rusiya əleyhinə aksiyalar da keçirilir. Ermənistandakı etirazçı kəsim bəyan edir ki, bu, Rusiya müstəmləkəçiliyinə qarşı başlanan milli azadlıq hərəkatıdır. Artıq Rusiya rəsmiləri də Ermənistanın sərgilədiyi mövqedən ciddi narahatlıq keçirir. Rusiya mediası bu fonda xatırladır ki, hələ ötən il noyabrın 23-də İrəvanda ABŞ səfirliyi qarşısında ermənilər tərəfindən Vudro Vilson verdiktinin ildönümü ilə bağlı keçirilən “minnətdarlıq mitinqi”ndə də Rusiya hədəfə alınıb. Səfirliyə təqdim olunmuş və Con Baydenə ünvanlanmış məktubda təşkilatçılar ABŞ-ı Ermənistana “daha aktiv dəstək verməyə” çağırıblar və Rusiyadan şikayətləniblər. Bu əhval-ruhiyyə indi də davam edir. Qeyd edək ki, Ermənistan hər zaman ilk imkan düşən kimi Rusiyaya arxa çevirib, onların mövcudluğunu təmin edəcək sahib axtarıb. Bütövlükdə Ermənistan cəmiyyətinin əhval-ruhiyyəsi Moskvaya nifrət üzərində köklənib. Təbii ki, iqtisadi və siyasi baxımdan zəif durumda olan Ermənistan Rusiya kimi böyük bir ölkəyə nəyisə diqtə, yaxud dolayısı ilə ona təsir edə bilməz. Amma Rusiyanın da Ermənistanın bu yanaşmasını nəzərə alması və müvafiq addımlar atması zəruridir. Rusiyanın Ermənistanı ittifaq dövlətinə cəlb edib onu əyalətlərdən birinə çevirmək niyyəti bu mənada Kreml tərəfindən İrəvana kəsilmiş cəza kimi də qəbul edilə bilər.
Nahid SALAYEV
