Bu gün keçmiş məcburi köçkünlərin ən böyük istəyi odur ki, tezliklə öz ev-işiklərinə, doğma yuvalarına qayıtsınlar. Azərbaycan dövləti 2020-ci ilin 10 noyabrından sonra keçmiş məcburi köçkünlərin təhlükəsiz şəkildə geri qayıtması üçün çox böyük layihələrə start verib.
Burada başdan əsas məsələ o olub ki, ilk növbədə insanlarımızın orada rahat yaşaması üçün ərazilər minalardan təmizlənib təhlükəsiz hala gətirilsin. Əlbəttə, təhlükəsiz şəraitin yaradılması ən vacib məsələlərdən biridir. Bir sözlə, işğal altında olan torpaqlarımız azad olunandan sonra məcburi köçkünlərin öz kəndlərinə, şəhərlərinə geri dönməsi dövlətin əsas pioritetlərindəndir və dediyimiz kimi bu istiqamətdə də hərtərəfli proses gedir. Bir məqamı da vurğulayaq ki, rəy sorğuları keçirən qurumların yaydığı məlumatlara görə, soydaşlarımızın mütləq əksəriyyəti öz doğma torpaqlarına qayıtmaq əzmindədir. Bilirik ki, qayıdış üçün zəruri işlər görülür, infrastruktur layihələri həyata keçirilir, ərazilərin minalardan təmizlənilməsi işi davam etdirilir, “ağıllı kənd”, “ağıllı kənd” layihələri kerçəkləşdirilib. Bu konsepsiya davamlıdır.
Zəngilan rayonunun Ağalı kəndində “Ağıllı kənd” layihəsi çərçivəsində tikinti-quruculuq işləri başa çatıb və artıq Ağalı sakinləri geri qayıdışa hazırlanır. Ağalı sakinlərinin geri qayğıdışı vaxtı ilə bağlı Prezident İlham Əliyev anons verib və bu böyük tarixi geriqayıdış köçünün vaxtını açıqlayıb.
“Bunun çox böyük rəmzi mənası var”
“Bu il nəzərdə tutulan layihələr arasında mən Ağalı kəndinin inşasının artıq tamamlanmasını qeyd etməliyəm. Bu, pilot layihədir, bunun böyük rəmzi mənası var”. Bu fikirləri Prezident İlham Əliyev gənclərlə görüşdə gənclərin suallarını cavablandırarkən bildirib.
Dövlət başçısı bildirib ki, artıq bu il ilk keçmiş köçkünlər öz doğma torpağına qayıdacaqlar və Ağalı kəndi elə bil bizim istədiyimizin təcəssümüdür: “Biz bu torpaqlarda hansı səviyyə görmək istəyirik, insanlar üçün yaradılacaq hansı rahatlığı görmək istəyirik, bu layihədə öz əksini tapıb. Amma, eyni zamanda, bu, pilot layihədir. Bu layihə ilə bağlı gedən işlərə ondan sonra qiymət veriləcək, təhlil aparılacaq və növbəti layihələr əminəm ki, bütün bu təhlili nəzərə alacaq. Amma bu, çox böyük rəmzi xarakter daşıyır. Çünki belə çıxır ki, müharibədən heç iki il keçməmiş biz haradasa, yaz-yay aylarında Ağalı kəndinin sakinlərini artıq orada yerləşdirmək istəyirik. İki il keçmədən artıq qayıdış başlayır. Bunun çox böyük rəmzi mənası var”.
“Biz Ağalı kəndinə “Böyük Qayıdış”ın astanasındayıq”
“Müasir İnkişaf” İctimai Birliyinin sədri, siyasi şərhçi Mübariz Göyüşlü bizimlə söhbətində bildirdi ki, ölkə başçısı tərəfindən keçmiş məcburi köçkünlərin Ağalı kəndinə qayıdışının anonsunun verilməsi çox böyük tarixi prosesin başlandığını xəbər verir. “Prezidentin anonsundan da artıq görsənir ki, “Böyük Qayıdış” prosesinə start verilir. Ölkə başçısı hələ ötən il bildirirdi ki, gələn il “Böyük Qayıdış”ın hazırlıq prosesinə keçəcəyik. Torpaqlarımız işğaldan azad olunan kimi artıq geriqayıdış prosesi barədə reallığa söykənən fikirlər açıqlandı. Yadınıza salım ki, bundan da əvvəl, yəni torpaqlarımız hələ işğalda olduğu dövrdə cənab Prezident bütün çıxışlarında, müsahibələrində bəyan edirdi ki, torpaqlarımız işğaldan azad ediləcək və orada quruculuq, abadlıq işləri görüləcək, vətəndaşlarımız öz torpaqlarına qayıdacaqlar. Ola bilsin ki, daxildəki və xaricdəki bəzi şəxslər buna inanmırdı və buna şübhə ilə yanaşırdılar, amma həmin hadisələr baş verdi və 44 günlük müharibədə Azərbaycan torpaqlarının düşmən işğalından azad edildiyinin şahidi olduq. 30 il işğalda saxlanan torpaqlarımız 44 gün ərzində azad edildi. Torpaqlarımız azad edildikdən sonra isə çox operativ şəkildə, sürətlə tikinti-quruculuq işlərinə start verildi. Biz Ağalı kəndinə “Böyük Qayıdış”ın astanasındayıq. Yəni Prezident anons verdi və bildirdi ki, keçmiş məcburi köçkünlər tarixi geriqayıdış ərəfəsindədir” - deyə M.Göyüşlü qeyd etdi.
“Ağalıya qayıdış hələ prosesin başlanğıcıdır”
M.Göyüşlünün sözlərinə görə, “Böyük Qayıdış”ın əsası Zəngilanın Ağalı kəndində qoyulub, bildiyi qədər bundan sonra Füzuliyə və digər rayonlara da qayıdış baş verəcək. “Bildiyim qədər Füzulidə də bir “ağıllı kənd” layihəsi başlanılıb. Eyni zamanda paralel olaraq azad edilmiş ərazilərdə çox böyük yol infrastrukturunun tikintisinin şahidi oluruq, təxminən 10-na yaxın yol qovşağı tikilir. “Zəfər yolu” ən böyük nümunədir. Yəni Şuşaya çox yüksək səviyyəli və sürətli, rahat bir yol çəkilib”.
M.Göyüşlünün sözlərinə görə, Ağalı kəndinin sakinlərinin tezliklə geriqayıdışının baş verməsi çox mühüm bir hadisədir. O, hesab edir ki, 30 il köçkünlük həyatı yaşayan ağalılılar öz evlərinə qovuşmaqla “Böyük Qayıdış”ın ilk təmsilçisi olacaqlar. “Bilirsiz, “Böyük Qayıdış”ın anonsunun ölkə başçısı tərəfindən verilməsi Azərbaycan dövlətinin bu məsələdə nə qədər israrlı olduğunu göstərir. “Böyük Qayıdış” dövlətimizin əsas pioritetlərindən biridir. “Ağılı kənd”, “Ağıllı şəhər” layihəsinin icrası ilə Azərbaycan dövləti göstərir ki, keçmiş məcburi köçkünləri, öz vətəndaşlarını tezliklə öz yurdlarına qaytarmaqda maraqlıdır, israrlıdır, prinsipialdır. Bu Azərbaycan siyasətinin təntənəsinin və doğru olduğunu göstərir. Tezliklə biz eyni məskunlaşa anonslarını başqa rayonların, kəndlərin sakinləri ilə bağlı da eşidəcəyik. Ağalıya qayıdış hələ prosesin başlanğıcıdır. Soyadşalrımızın geri qayıdışı xeyirli-uğurlu olsun” - deyə M.Göyüşlü bildirdi.
M.Göyüşlü deyir biz Azərbaycan Prezidentinin apardığı uğurlu, məqsədyönlü, prinsipial siyasət nəticəsində Xocalıya, Xankəndiyə, Xocavəndə, Ağdərəyə də qayıdacağıq, tezliklə üç rəngli bayrağımız bu şəhərlərimizdə də dalğalanacaq.
İradə SARIYEVA
Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
