Milli Məclisin deputatı, AMEA-nın müxbir üzvü, professor, Qafqazşünaslıq İnstitutunun direktoru Musa Qasımlı yazdığı məqalədə Ramiz Mehdiyevi AMEA-nın prezideni vəzifəsindən istefa verməyə çalışıb.
2019-cu ildən AMEA-nın prezidenti olan R.Mehdiyevin qurumdakı fəaliyyətini geniş təhlil edən M.Qasımlı hesab edir ki, elmi və akademiyanı Mehdiyevin istefası xilas edə bilər: “...İlk növbədə, bu gün AMEA elminin inkişafında başlıca əngələ çevrilmiş Ramiz müəllim Mehdiyev istefa verməlidir. Əgər Ramiz müəllim Mehdiyev özü istefa verməsə, onda AMEA-nın həqiqi və müxbir üzvləri Azərbaycan elminin gələcəyi naminə ümumi yığıncağa toplaşmalı və Ramiz müəllim Mehdiyevi istefaya göndərməlidir. Bunu elmimizin bu günü və gələcəyi tələb edir. Mövqe aydın, konkret və birmənalı olmalıdır...”
Qeyd edək ki, M.Qasımlı R.Mehdiyevin istefasını tələb edən yeganə alim deyil, deputat, AMEA-nın Nizami Gəncəvi adına Milli Ədəbiyyat Muzeyinin direktoru, akademik Rəfael Hüseynov da, AMEA-nın Fəlsəfə və Sosiologiya İnstitutunun baş elmi işçisi, fəlsəfə üzrə elmlər doktoru, professor Əbülhəsən Abbasov da AMEA prezidentinə istefa verməsi ilə bağlı çağırış ediblər.
Qulu Məhərrəmli: “Ölkəyə, millətə, milli düşüncəyə bu qədər ziyan vurmuş adam AMEA-nın rəhbərliyində qala bilməz”
Professor Qulu Məhərrəmli “Bakı-Xəbər”şərhində bildirdi ki, Milli Məclisin deputatı, AMEA-nın müxbir üzvü, professor, Qafqazşünaslıq İnstitutunun direktoru Musa Qasımlının, AMEA-nın Nizami Gəncəvi adına Milli Ədəbiyyat Muzeyinin direktoru, kultroloq, görkəmli alim Rəfael Hüseynovun, AMEA-nın Fəlsəfə və Sosiologiya İnstitutunun baş elmi işçisi, fəlsəfə üzrə elmlər doktoru, professor Əbülhəsən Abbasovun, onlardan əvvəl isə AMEA-nın Bakıxanov adına Tarix İnstititunun baş direktoru professor Kərim Şükürovun R.Mehdiyevə ünvanlanan istefa çağırışlarını çox diqqətlə oxuyub. “Hesab edirəm ki, bu çağırış mövcud reallıqlardan doğur. AMEA uzun illərdir ki, bir bataqlıq içindədir. Xüsusən də müstəqillik dövründə, keçən əsrin 90-cı illərin ortalarından başlayaraq akademiyanın ayrı-ayrı institutlarında müəyyən olunmuş elmi işlərin istiqaməti, aparılan elmi tədiqatların keyfiyyəti əsasən aşağı səviyyədədir. Əsasən də elmi əlaqələndirmədəki problemlər, dəqiq elmlər sahəsində tədqiqatların istehsalata tətbiq olunmaması, ümumiyyətlə dünya elmindən qopmuş bir vəziyyətdə olması göz qabağındadır. Özüm də təxminən 2014-2016-cı illərdə AMEA sistemində çalışmışam, Dilçilik İnstitutunda Monitorinq şöbəsinə rəhbərlik etmişəm və onda akademiyanın mətbəxi, daxili ilə geniş tanış olmuşam. İşlərin təşkili, elmi hesabatların hazırlanması, orada mövcud olan formallıq, üçüncü-dördüncü dərəcəli məsələlərə diqqət yetirilməsi, zamanın çağırışlarına cavab uyğun gəlməyən tədqiqatların önə çəkilməsi, habelə elmi işlərin yazılması, müdafiəsi, elmi şuraların təşkili, bu gün həyatın önə çəkdiyi problemlərə diqqət yetirilməməsini görmüşəm. Habelə, akademiya sistemində şüur, ruh etibarı ilə ölüşmüş elm adamlarının həddən artıq çoxalmasının, gənclərin qarşısında maneələrin yaradılmasının, istedadsız, yalandan bir müdafiə edib şöbə rəhbərləri olan, heç bir cəhəti ilə alim adına cavab verməyən xeyli sayda “elm adamları”nın olduğunun da şahidi olmuşam. Ona görə də, Ramiz Mehdiyevin AMEA-ya gəlişi ilə bu proses daha da sürətlənib. Çünki Ramiz Mehdiyev elm adamı deyil, elm təşkilatçısı deyil. Onun hansısa bir sahədə dərin, sistemli, fundamental elmi tədqiqatlarla məşğul olması absurddur. Bu gün akademiya sisteminin məhz inzibati-amirlik üsulu ilə idarə olunması, bir-birinə zidd qərarların verilməsi, tayfabazlıq, regionçuluq, istedadsız adamların öndə olması, elm sisteminə biznes maraqlarının dərindən müdaxilə etməsi, Rəyasət Heyətindən tutmuş ayrı-ayrı institutlara qədər hər yerdə elmə dəxli olmayan adamların artması kimi məsələlər əlbəttə, vicdanlı adamları narahat etməyə bilməz. Hesab edirəm ki, professor Kərim Şükürov da, professor Musa Qasımlı da, görkəmli alim, kultroloq Rəafel Hüseüynov da, professor Əbülhəsən Abbasov da öz çağırışlarında haqlıdırlar. Yəni Ramiz Mehdiyevin idarəçiliyi hər kəsə bəllidir. Ramiz Mehdiyev bu ölkədə müsbət tendensiyaların, milli inkişafın qarşısında hansı maneələr yaradırdısa, elm sahəsində də həmin funksiyanı yerinə yetirir. Ümumiyyətlə, bu cür adamların bəlli bir yaşdan sonra da kreslodan yapışıb qalması, vəzifə aşiqi olması, həmin sahənin çox ciddi problemlərinin qabarmasına gətirib çıxarır. Ona görə də, bu qədər çağırışdan sonra Ramiz Mehdiyevin akademiya rəhbərliyində saxlanması məntiqə uyğun deyil. Yəni adam gedib öz işləri ilə məşğul olmalıdır. Ölkəyə, millətə, milli düşüncəyə bu qədər ziyan vurmuş adam AMEA-nın rəhbərliyində qala bilməz” - deyə Q.Məhərrəmli bildirdi.
Bünyamin Qəmbərli: “Ramiz Mehdiyevin istefaya çağırılması məsələsi süni gündəm yaratmaqdır”
Sabiq millət vəkili Bünyamin Qəmbərli isə bizimlə söhbətində bildirdi ki, M.Qasımlının məqaləsi və R.Mehdiyevə istefaya çağırması ilə bağlı fikirlərlə tanış olub. “Musa Qasımılı qeyd edir ki, Ramiz Mehdiyev 2019-cu ildə akademiyaya prezident seçildi. Hər halda ona qədər akademiyanın prezidenti var idi. Belə başa düşürəm, AMEA-nın əvvəlki prezidenti də, seçkilərdə iştirak edən akademiklər də, elm adamları da bir gecə də yatdılar və onlara yuxularında vəyh gəldi ki, Ramiz Mehdiyev AMEA-ya prezident seçilməlidir. Bilirsiz, o qədər gülməli, o qədər süni bir gündəm yaradırlar ki. Ramiz Mehdiyev özü akademiyaya gəlib çıxmadı. Ramiz Mehdiyevi seçənlər, ondan əvvəlki prezident yatıb yuxusunda görmədi ki, o prezident seçilməlidir. Yəni bilirsiz, hakimiyyət süni gündəm yaradır, bütün mətbuat, Azərbaycan mətbuatı da o süni gündəmlə məşğul olur. Ramiz Mehdiyevin istefaya çağırılması məsələsi süni gündəm yaratmaqdır. O akademiklər dünən də həmin tabeliyi göstəriblər bu gün də. Yəni bunlar müstəqil fəaliyyət göstərmirlər ki, onlardan nəyisə tələb edəsən. Sonra bəzi məsələlər qoyulur. Başqaları da o məsələləri qaldırır. Bütövlükdə, Azərbaycan elmi, Azərbaycan səhiyyəsi, araşdırma tələb edən, milli təfəkkürü formalaşdıran bütün sahələr sistemli məhv edilir. Belə çıxır ki, guya Ramiz Mehdiyevdən əvvəl nə isə yaxşı idi, Ramiz Mehdiyev gəlib məhv etdi və ondan sonra yaxşı olacaq... Ramiz Mehdiyev süni gündəmdir. Digər tərəfdən, Ramiz Mehdiyev bu dərəcədə güclüdürsə nədən onun əleyhinə çıxan öz tabeliyindəkiləri məhv edə bilmir? Zəifdirsə, hamı onun əleyhinə çıxa bilirsə onda bu Azərbaycanda nəyi həll edir? Azərbaycanda hakimiyyət Ramiz Mehdiyevlərin əllərində deyil. Ramiz Mehdiyevlər siyasi meyiddir, qurtarıb, bitib, gedib...”
İradə SARIYEVA
