Ermənistan Mərkəzi Bankının sədri Martin Qalstyan bəyan edib ki, Rusiyanın SWIFT beynəlxalq ödəniş sistemindən mümkün qopması Ermənistan iqtisadiyyatına ağır təsir göstərəcək.
Qərbin Rusiya Federasiyasına qarşı sanksiyalarının sərtləşdirilməsinin Ermənistana təsiri ilə bağlı sualı cavablandıran Qalstyan qeyd edib ki, geosiyasi proseslərin Ermənistan üçün əlverişsiz inkişafı 2022-ci ildə ən arzuolunmaz hadisələrdən birinə çevrilə bilər. Onun sözlərinə görə, Ermənistan iqtisadiyyatına təsirin səviyyəsi və miqyası Rusiyaya qarşı hansı sanksiyaların tətbiq olunacağından asılı olacaq: “Əgər sanksiyalar maliyyə sektorunu, eləcə də “Şimal axını 2” layihəsinin dayandırılmasını əhatə edərsə, bu halda Rusiya çox güman ki, milli valyutanı devalvasiya edəcək, nəticədə biz Rusiya iqtisadiyyatına rəqabət qabiliyyətliliyimizi müəyyən dərəcədə itirəcəyik. Əgər 2015-ci ildə olduğu kimi sanksiyalar yalnız fərdlərə şamil edilsə, o zaman Ermənistana təsir o qədər də güclü olmayacaq. Yox, əgər onlar maliyyə sektoruna da təsir etsələr, bu, rublun məzənnəsinin aşağı düşməsi ilə nəticələnə bilər. O halda da bu Ermənistan mallarının Rusiya bazarında rəqabət qabiliyyəti xeyli azaldacaq”.
Qalstyan daha ciddi risqlərin maliyyə sektorundan gəldiyini vurğulayıb.
“Rusiyaya ixrac olunan məhsulların dəyəri kəskin şəkildə aşağı düşəcək ki, bu da zəif Ermənistan iqtisadiyyatı üçün fəlakət olacaq”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, Qərb Rusiyaya yönəlik maliyyə sanksiyalarını sərtləşdirəcəyi halda, bunun Ermənistana zərbəsi mütləq dəyəcək: “Ona görə ki, bunun bir neçə səbəbi var. Əvvəla, Ermənistan iqtisadi baxımdan Rusiyadan çox asılıdır. Ermənistanda az-çox gəlirli sənaye sahələrinin, enerji təchizatı sektorunun səhmləri Rusiyaya məxsusdur. Ermənistan Rusiyanın patronu olduğu Avrasiya İqtisadi İttifaqında təmsil olunur. Ölkənin əsas iqtisadi tərəfdaşı Rusiyadır. Ermənistanda istehsal olunan rəqabət qabiliyyətli məhsulların həcmi elə də böyük deyil. Az-çox şərab və əlvan metal məhsullarını Avropa bazarına çıxara bilir. Ölkədə istehsal olunan bir sıra kənd təsərrüfatı məhsulları məhz Rusiya bazarında satılır. Erməni miqrantlarının çoxu Rusiyada əmək fəaliyyəti ilə məşğul olur və bunun müqabilində hər il Ermənistana milyonlarla dollar vəsait göndərirlər. O üzdən, sanksiyalar səbəbindən Rusiya devalvasiyaya getsə, bundan daha çox Ermənistan itirəcək. Rusiyaya ixrac olunan məhsulların dəyəri kəskin şəkildə aşağı düşəcək ki, bu da zəif Ermənistan iqtisadiyyatı üçün fəlakət olacaq. Üstəlik Rusiyanın SWIFT beynəlxalq ödəniş sistemindən çıxarılması o deməkdir ki, xarici valyuta ilə ticarət əməliyyatları aparmaq mümkün olmayacaq. Bunun Gürcüstana elə də təsiri olmayacaq. Ona görə ki, məlum səbəblərdən Gürcüstanla Rusiya arasında ticarət əlaqələri çox aşağı səviyyədədir. Ancaq Ermənistanın durumu fərqlidir”.
Bu baxımdan ekspert hesab edir ki, sanksiyalar sərtləşdirilsə Ermənistan bundan itirəcək.
Vidadi ORDAHALLI
