Məlum olduğu kimi, Ermənistan ordusunun 30 illiyi günü ilə əlaqədar Rusiya Erməniləri İttifaqı Rusiya ərazisində “Qaregin Njde” filmini nümayiş etdirmək cəhdinin qarşısı alınıb. Nasizmi təbliğ edən filmin nümayişi İkinci Dünya Müharibəsi veteranlarının qəzəbinə səbəb olub.
Vəziyyət o həddə gəlib çatıb ki, Rusiyada siyasi xadimlər belə Ermənistanın bu addımını sərt tənqid etməyə başlayıblar. Bu arada Rusiya Dövlət Dumasının MDB işləri, Avrasiya inteqrasiyası və həmvətənlərlə əlaqələr komitəsinin sədri Leonid Kalaşnikov, Rusiyanın Erməni İttifaqının faşist terrorçu Qareqin Njde haqqında filmin nümayiş etdirməyə çalışması haqqında danışarkən sərt fikirlər səsləndirib: “Banderanın şöhrətlənməsinə reaksiya veririksə, Njdenin qabardılmasına niyə səssiz qalmalıyıq? Bəli, bu, ermənilərin mərkəzidir, amma bu şəhər, təəssüf ki, Ermənistanın deyil, Rusiyanın paytaxtıdır. Xüsusən də belə fiqurların şöhrətlənməsi millətçiliyin ən pis formasında dirçəlməsinə gətirib çıxarır. Bunu Paşinyan deyil, Ermənistanın keçmiş rəhbəri Sərkisyan Moskvada fəal şəkildə təşviq etməyə başlayıb. Əlbəttə, demək olar ki, ermənilərin özlərinə qəhrəman seçməsi öz işləridir. Lakin onda belə sual yaranır: əgər siz belə suveren, məğrur və qüdrətlisinizsə, Rusiyadan nə istəyirsiniz?”.
Duma səviyyəsində Njde ilə bağlı kəskin mövqeyin ortaya qoyulması ermənilər üçün gözlənilməz zərbə oldu. Qarabağdakı məğlubiyyət fonunda ermənilər elə bilirdi ki, Rusiya onların nazı ilə oynayacaq.
“Dövlət Duması səviyyəsində sərt mövqeyin ortaya qoyulması müsbət haldır”
Məsələyə münasibət bildirən AMİP sədri Arzuxan Əlizadənin fikrincə, ermənilərin Njde ilə bağlı məlum addımı növbəti həyasızlıq idi: “Özü də qəribədir ki, Rusiya Erməniləri İttifaqı həmin filmin nümayişi təşəbbüsü ilə çıxış etdi. Hansı ki, erməni tərəfi nasizmlə bağlı Rusiyanın mövqeyini bilirdi. Bunu Qərbə yaxın hansısa erməni təşkilatı etsəydi, hardasa başa düşmək olardı. Məhz Rusiya Erməniləri İttifaqının belə bir təşəbbüslə çıxış etməsi təəccüblü görünür. Çox güman ki, son anda filmin nümayişinə qadağa qoyulacağını onlar gözləməyib. Ermənistanın Rusiyadakı səfirinin məsələyə yanaşması bir daha ermənilərin faşist xislətini ortaya qoydu. İstənilən halda Dövlət Duması səviyyəsində sərt mövqeyin ortaya qoyulması müsbət haldır. Bununla ermənilərə öz yerini göstərdilər. Fikrimcə, burada digər nüanslar da var. Nikol Paşinyan yaxşı bilir ki, Qarabağ məğlubiyyətinə görə, erməni cəmiyyətində Rusiyaya qarşı güclü nifrət var. O, yaxşı bilirdi ki, nasist Njde ilə bağlı filmə Rusiya müsbət yanaşmayacaq. Görünür məqsədyönlü şəkildə bu təxribata gedib ki, qoyulan məhdudiyyətə görə ermənilər arasında Rusiyaya nifrət daha da artsın. Nəzərə almaq lazımdır ki, antiRusiya ovqatının artması Ermənistanda revanşist qüvvələrin mövqeyinin zəifləməsi deməkdir. O baxımdan hesab edirəm ki, ermənilərin indiki məqamda bu təxribata getməsi təsadüfü deyil”.
Partiya sədri onu da qeyd etdi ki, Azərbaycan Ermənistanın faşist simasını fürsət düşdükcə ifşa etməyə çalışmalıdır.
Vidadi ORDAHALLI
