Milli Məclisin yaz sessiyası çərçivəsində keçirilən ilk plenar iclasında deputat Elman Nəsirov yeni qanun layihəsinin qəbul edilməsi təşəbbüsü ilə çıxış edib: “Sosial sifariş olan “Sosial şəbəkələr haqqında” qanunun qəbul edilməsini təklif edirəm”. Bunun vaxtı çatıb”.
Deputat deyib ki, sosial şəbəkələrdə söyüş baş alıb gedir: “Belə insanları məhkəməyə verməkdən də çəkinirsən ki, yeni qondarma siyasi məhbus icad edəcəklər”.
E.Nəsirov qeyd edib ki, “Siyasi partiyalar haqqında” yeni qanunun qəbuluna da ehtiyac var.
Deputat Naqif Həmzəyev isə “Ovçuluq haqqında” qanuna yenidən baxılmasını təklif edib: “Bu gün Kür çayında balıq tapmaq mümkün deyil. Qanunsuz balıq ovu ilə məşğul olan dəstələr var, partlayıcılar ilə balıq ovlayırlar. Digər tərəfdən, əcnəbilərin ölkədə qanunsuz ovla məşğul olmasına görə cərimələr çox aşağıdır”. O, da “Sosial şəbəkələr haqqında” qanunun yaz sessiyasında qəbulunu təklif edib.
Media eksperti Müşfiq Ələsgərli “Bakı-Xəbər”ə açıqlamasında bildirdi ki, yaşadığımız dönəmdəki media mühitini yeni media dövri kimi təqdim edirlər: “Yeni media iki qoldan ibarətdir. Birincisi, konvergensiya olunmuş, yəni ənənəvi medianın yeni reallıqlara uyğunlaşmış formasıdır. Digəri isə sosial mediadır. Bura sosial şəbəkələr, bloqlar və forumlar aiddir. Bizim “Media haqqında” qanunun mahiyyəti medianın birinci qolunu əhatə edir. Yəni ənənəvi medianın yeni qaydalara uyğunlaşması arealı nəzərdə tutulur. Sosial media qanadı isə qanunda əks edilmir. Məsələnin digər tərəfi ondan ibarətdir ki, bu sahəni necə tənzimləyək? Hazırda parlamentdə ortaya çıxan təşəbbüsün zərərli tərəfi bundan ibarətdir ki, onlar ayrıca bir qanun layihəsindən danışırlar. Bu, zərərlidir. Dünyanın heç bir ölkəsində qanuna “sosial şəbəkəni tənzimləmə” kimi ad verilmir. Çünki bu platforma insanların sərbəst fikirini paylaşmaq üçündür. Belə bir addımın atılmasını dərhal ifadə azadlığının məhdudlaşması kimin qiymətləndirəcəklər. Xaici ölkələrdə bu fəaliyyət fərqli adlar altında həyata keçirilir. Rusiyada bunun adını “saxta xəbərlə mübarizə” kimi adlandırlar. Müxtəlif qanunların daxilində bu kontentə təsir edə biləcək maddələr əlavə edirlər. Sırf “sosial şəbəkələrin tənzimlənməsi” haqda qanun adı qıcıq yaradır. Ora sərbəst fiki paylaşımı platformasıdır. Həmin məkana aid birbaşa qanun qəbul edilirsə, bu məhdudlaşma kimi dəyərləndirilə bilər. Bəzi ölkələrdə sosial şəbəkələrin fəaliyyətini texnoloji üsullarla həyata keçirirlər. Məsələn, Türkiyədə bir qayda var, hansı şəbəkənin istifadəçi sayı bir milyonu keçirsə, onun mütləq yerli nümayəndəliyi açılmalıdır. Bizdə həmin platformaların yerli təmsilçiləri yoxdur. Orda yaranan problemləri aradan qaldırmaq üçün biz uzun-uzadı yollar keçirik. Yerli təmsilçilik olarsa, biz bu problemləri asan formada həll edə bilərik. Parlamentdə irəli çıxan təşəbbüs göstərir ki, adamlar işin mahiyyətini yaxşı anlamırlar. Bununla bağlı dünya təcrübəsini yaxşı öyrənib, sonra hansısa təşəbbüsü irəli sürmək lazımdır. Elə etməliyik ki, bizə qarşı yeni beynəlxalq hücum dalğasına şərait yaratmayaq. Sosial şəbəkələrdə olan problemlər dünyanın hər yerində var. Dünyada həmin arealda yayılan saxta xəbərlər 60 faiz təşkil edir. Bu məsələdə bizim önə düşməyimizə ehtiyac yoxdur. Bizdə bu istiqamətdə addımlar atılıb. Cinayət Məcəlləsində sosial şəbəkədəki təhqirə görə məsuliyyət nəzərdə tutulur. Tənzimləmə vacibdir, ancaq bunu diletancasına etməyə ehtiyac yoxdur”.
Məhəmmədəli QƏRİBLİ
