ABŞ-ın Ermənistandakı səfiri Linn Treysi yenə diplomatik cızığından çıxaraq yersiz fikirlər səsləndirib. Məsələ ondadır ki, Birləşmiş Ştatlar səfiri Ermənistan baş nazirinin müavini ilə görüşdə Qarabağ məsələsinin həll olunmadığını bəyan edib.
Bazar ertəsi Ermənistanın baş nazirinin müavini Ambartsum Matevosyan və ABŞ səfiri Lin Treysi arasında görüş keçirilib. Görüşdə Amerika diplomatik missiyasının rəhbəri bildirib ki, Qarabağın statusu məsələsi həll olunmayıb. Daha sonra səfir tərəflərin danışıqları davam etdirməli olduqlarını deyib: “Qarabağ münaqişəsinin yekun və hərtərəfli həlli ATƏT-in Minsk Hrupunun himayəsi altındadır. Münaqişənin həlli Minsk Qrupunun həmsədrlərinin mandatı çərçivəsində həyata keçirilməlidir”.
Göründüyü kimi, Birləşmiş Ştatların Ermənistandakı səfirliyi öz fitnəkar siyasətindən əl çəkmək istəmir. Yeri gəldi-gəlmədi sözügedən məsələni gündəmdə saxlamağa çalışır. Halbuki, Azərbaycan Qarabağ məsələsini artıq bir ildən çoxdur həll edib. Ermənilər isə hələ də xəyallarından əl çəkmirlər. ABŞ səfiri də buna ortaq olaraq yersiz illuziyalara qapılır.
“Dövlət Departamentindən verilən təlimata əsasən Linn Treysi ard-arda belə açıqlamalarla çıxış edir”
AMİP funksioneri Əli Orucov hesab edir ki, ABŞ-ın Ermənistandakı səfiri Linn Treysi sanki ermənidən çox erməni olmaq missiyasını qarşısına məqsəd qoyub: “O səfir təyin ediləndən sonra mütəmadi olaraq belə təxribatçı açıqlamalarla çıxış edir. Hər fürsətdə bəyan edir ki, “Dağlıq Qarabağ münaqişəsi” həll olunmayıb. Bütün vasitələrlə Minsk Qrupunun vasitəçiliyini müzakirə mövzusu etməyə çalışır. Fikrimcə, onun davamlı olaraq qızışdırıcı mövqedən çıxış etməsi təsadüfü deyil. Çox güman ki, Dövlət Departamentindən verilən təlimata əsasən Linn Treysi ard-arda belə açıqlamalarla çıxış edir. Yoxsa sıradan bir səfirin boynu aşacaq belə açıqlamalarla çıxış etməsi real deyil. Birləşmiş Ştatlar ATƏT-in Minsk Qrupu egidası altında yenidən proseslərdə aktiv rol almağa cəhd edir. Çünki 2020-ci ildə baş verən Vətən müharibəsi dönəmində ABŞ oyundankənar qaldı. İnsafən o vaxtdkı Tramp hakimiyyəti bundan o qədər də narahat deyildi. Üstəlik bütün diqqət seçkiyə fokslanmışdı. Ermənipərəst Cozef Baydenin prezident seçilməsindən sonra ABŞ yavaş-yavaş Minsk Qrupunu diriltməklə bağlı səylərini artırmağa başladı. Nəzərə almaq lazımdır ki, ABŞ-dakı erməni lobbisi seçkilərdə Baydenə stafka etdi. Bütün bunların nəticəsidir ki, səfir bu dərəcədə canfəşanlıq edir. Başqa bir tərəfdən, artan ABŞ-Rusiya gərginliyi də bu məsələdə müəyyən rol oynayır. Bütün bu deyilənlərin fonunda kimin nə deməsindən asılı olmayaraq Minsk Qrupunun əvvəlki formatda vasitəçiliyini yaxın buraxmaq olmaz”.
Partiya funksioneri onu da əlavə etdi ki, Azərbaycan qalib tərəf olaraq bu məsələdə dirəniş göstərməkdə davam etməlidir.
Vidadi ORDAHALLI
