“Çalışacağıq ki, erməni faşizminin bütün təzahürlərini yer üzündən silək və buna gücümüz çatır. Ancaq gərək digər ölkələr də, beynəlxalq ictimaiyyət də bu məsələdə həmrəy olsun”. Bunu Prezident İlham Əliyev AZƏRTAC-a müsahibəsində deyib.
Ölkə başçısının sözlərinə görə, faşizmi qəhrəmanlaşdırmaq olmaz: “Amma bir tərəfdən Ermənistan rəsmən bu fikirlərə qoşulsa da, faktiki olaraq Njde kimi faşistin qəhrəmanlaşdırılması ilə bağlı konkret addımlar atır. Bu günə qədər Ermənistanda, İrəvanda faşist Njdenin adını daşıyan küçələr, meydanlar, metro stansiyası var, ona böyük - altımetrlik abidə qoyulub. Bu abidə bu günə qədər sökülməyib. Yəni, bu, nəyi göstərir? Onu göstərir ki, erməni faşizmi yaşayır. Bəli, İkinci Qarabağ müharibəsində, Vətən müharibəsində biz erməni faşizmini məğlub etmişik. Deyə bilərəm ki, erməni faşistlər indi əvvəlki illərdəki qədər fəal deyillər. Ancaq biz görürük ki, faşizm baş qaldırır, Ermənistanda baş qaldırır. Rusiyada baş qaldırırlar. Rusiyanın paytaxtında erməni diaspor təşkilatının xətti ilə belə biabırçı aksiyanın təşkili dediyim sözlərin sübutudur. Biz erməni faşizmini məğlub etdik, ancaq o, məhv edilməyib. Biz bundan sonra da çalışacağıq ki, erməni faşizminin bütün təzahürlərini yer üzündən silək və buna gücümüz çatır. Ancaq gərək digər ölkələr də, beynəlxalq ictimaiyyət də bu məsələdə həmrəy olsun. Erməni faşizminin XXI əsrdə törətdiyi bu dağıntılar hamı üçün gərək bir nümunə olsun ki, faşizmin yaxşısı, pisi yoxdur”.
Görünən odur ki, erməni faşizminin təzahürlərini tam yox etmək üçün digər ölkələr də analoji mövqedən çıxış etməlidir.
“2018-ci ildə Ermənistanda hakimiyyət dəyişsə də, faşizmə münasibət dəyişmədi”
Məsələyə münasibət bildirən “İki Sahil” qəzetinin baş redaktoru Vüqar Rəhimzadənin fikrincə, erməni faşizminə münasibətdə Avropa ölkələri ikili yanaşmadan əl çəkməlidilər: “Məsələ ondadır ki, faşizm təkcə hansısa region üçün təhlükə mənbəyi deyil. Faşizm bütün bəşəriyyət üçün təhdid mənbəyidir. O ölkədə ki, faşizm dövlət səviyyəsində himayə edilir, simvollaşdırılır, deməli çox ciddi təhlükə ocağı formalaşdırılır. Ermənistan məhz faşizm ideologiyası əsasında öz siyasətini qurur. Faşist ideologiyası uzun illərdir ki, Ermənistanın dövlət siyasətinin prioritetini təşkil edir. 2016-cı il mayın 28-də Ermənistan rəhbərliyinin bilavasitə iştirakı ilə şəhərin mərkəzində nasist Njdenin heykəli açıldı. 2018-ci ildə Ermənistanda hakimiyyət dəyişsə də, faşizmə münasibət dəyişmədi. Əksinə faşizm ideologiyasına maraq daha daartdı. Ermənilərin faşizmlə bağlı təbliğatı təkcə Ermənistanla məhdudlaşmır. Ermənilər bunu Rusiyada da həyata keçirməyə can atırlar. Hətta, 2013-cü ildə Ermənistanda çəkilmiş “Qaregin Njde” filmi Rusiyada da nümayiş etdirildi. Baxmayaraq ki, bu “qəhrəman”ların alman nasistləri ilə sıx əlaqələri haqqında danılmaz faktlar xarici ölkələrin arxivlərində, həmçinin Rusiyanın özündə də kifayət qədərdır. Prezident İlham Əliyevin bir sıra beynəlxalq tədbirlərdə erməni faşizminn ifşasına yönəlik çıxışları vəziyyəti dəyişdi. Rusiyada bununla bağlı bəzi önləyici addımlar atıldı. Ancaq təkcə Rusiya ilə məsələ bitmir. Digər ölkələr, o cümlədən beynəlxalq təşkilatlar və ümumən dünya ictimayəti bu məsələdə adekvat, həmrəy mövqe sərgiləməlidir. Yalnız o zaman ciddi nəticələr əldə etmək olar. Dünya erməni faşizminin necə təhlükəli bəla olduğunu anlamalıdır”.
Vidadi ORDAHALLI
