Rusiyanın paytaxtı Moskvada erməni faşist Qaregin Njde haqqında çəkilən filmin nümayişi dayandırılıb.
Bildirilib ki, filmin nümayiş edildiyi məkana polis gəlib və seans dayandırılıb.
Polis nümayəndələri 354.1 (nasizmin reabilitasiyası) maddəsi ilə nəzərdə tutulmuş cinayətin törədilməsinin yolverilməzliyi ilə bağlı prokurorun təqdimatını oxuyub və filmə tamaşa etməyə gələnləri dağıdıblar.
Xatırladaq ki, Rusiya veteranları Rusiya Erməniləri İttifaqının faşist Qaregin Njde haqqında film nümayiş etdirməklə Ermənistan ordusunun gününü qeyd etmək təşəbbüsünə qarşı çıxıblar.
Erməni diasporunun bu addımı Rusiya ictimaiyyətində etirazla qarşılanıb
28 yanvar tarixində faşist Qaregin Njde haqqında film nümayiş etdirməklə Ermənistan ordusunun yaranması gününü qeyd etmək istəyən Rusiya Erməniləri İttifaqının əməlinə erməni səfir haqq qazandırmağa çalışıb.
Ermənistanın Rusiyadakı səfirliyi film ətrafında baş verənləri “ehtirasları süni şəkildə alovlandırmaq cəhdi” kimi qiymətləndirib.
Səfirlik qeyd edib ki, onlar mediada yazılanları “diqqətlə izləyirlər” və Ermənistanın azadlığı üçün vuruşan Qaregin Njdenin “xatirəsinin təhqir edilməsi”ndən dərin təəssüf hissi keçirirlər.
Ermənistan səfirliyi tarixi də saxtalaşdırıb və Njdenin 1948-ci ildə 4 maddə ilə ittiham edildiyini, ancaq bu maddələr içərisində “faşizmə xidmət”in olmadığını bildirib.
Qeyd edək ki, sözügedən filmin yayımı isə “Rusiya veteranları” ümumrusiya ictimai birliyinin şikayəti əsasında polisin müdaxiləsi ilə dayandırılmış, ora toplaşanlar dağıdılmışdı. Rusiya veteranları da Njdenin xatirəsini anmağı faşizmə qarşı vuruşan insanlara təhqir kimi qiymətləndirirlər.
Bu barədə Rusiya arxivlərində rəsmi sənədlərin olmasına baxmayaraq, Ermənistanın faşist, günahsız və dinc insanların qatili Qaregin Njdeni qəhrəmanlaşdırmaqdan əl çəkməməsi və səfirin Rusiyaya meydanoxuyurmuşcasına cavabı təəccüb yaradır.
Nasist Njde haqqında film nümayişinin elan olunması ilə əlaqədar veteranlar Baş prokurordan Rusiya Erməniləri İttifaqının nasizm və onun əlaltılarının reabilitasiyası etməsini yoxlamağı xahiş ediblər. Erməni diasporunun bu addımı Rusiya ictimaiyyətində etirazla qarşılanıb. Rusiya mediasında və sosial şəbəkələrdə ermənilərin bu addımına dövlət qurumlarının susqunluğu tənqid olunub.
Bizim diaspor qurumları bu istiqamətdə çox böyük fəallıq göstərməlidir
Göründüyü kimi, ermənilər özlərinə aid olan faşizm siyasətini dünya dövlətlərində yaymaq istiqamətində hərəkətə keçiblər. Bunun təhlükəli tendensiya olduğunu Prezident də qeyd edir və belə hallarla mübarizənin zırurliyini qeyd edir:
“Bu gün Gəncədə təməlini qoyduğum Memorial Kompleks böyük ərazini əhatə edəcək. Bu Memorial Kompleks təqribən dörd hektarda yaradılacaq. Dağıdılmış bu binalar olduğu kimi qalacaq. Yəni, bu yaddaş silinməməlidir. Bu erməni vəhşiliyini unutmamalıyıq.
Müharibə başa çatıb. Bəli, biz deyirik ki, sülh olmalıdır. Ancaq heç vaxt erməni vəhşiliyini, erməni faşizmini unutmamalıyıq. Xocalı qurbanlarını unutmamalıyıq. Gəncə qurbanlarını, digər şəhərlərimizin qurbanlarını heç vaxt unutmamalıyıq və unutmayacağıq. Onların müqəddəs ruhu qarşısında baş əyərək bir daha deyirik ki, onların qanı yerdə qalmadı. Onların yaxınları üçün bəlkə də bu, təsəlli ola bilər. Eyni zamanda, deyirik ki, biz müzəffər xalqıq, biz qalib dövlətik. Erməni faşizmini məğlub etdik. Elə etməliyik ki, erməni faşizmi bundan sonra heç vaxt baş qaldırmasın”.
Erməni faşizmin dünyaya çatdırılması və həmin təbliğatın qarşısının alınması istiqamətində diasporumuzun üzərinə hansı vəzifə düşür?
Beynəlxalq Diaspor Mərkəzinin sədri İsmayıl Ağayev “Bakı-Xəbər”ə bildirdi ki, MDB məkanı üçün mühüm siyasi əhəmiyyət kəsb edən bu hadisə şəxsən Prezident İlham Əliyevin növbəti siyasi-diplomatik qələbəsi kimi qiymətləndirilməlidir: “Azərbaycan erməni faşizmini məğlub etdi. İndi isə biz hamımız səylərimizi ona yönəltməliyik ki, erməni faşizmi bundan sonra heç vaxt baş qaldırmasın. Bu baxımdan Rusiyada erməni faşist Qaregin Njde haqqında filmin yayımının dayandırılması da həm Rusiya, həm Azərbaycan, həm də bütün MDB məkanı üçün xüsusi əhəmiyyət kəsb edən siyasi hadisədir. Əlbəttə ki, bu məsələ Azərbaycan dövlətinin, şəxsən Prezident İlham Əliyevin apardığı uğurlu xarici siyasətin nəticəsidir. Çünki ilk dəfə olaraq, bu məsələni siyasi müstəviyə gətirən məhz möhtərəm dövlət başçımız olub. Prezident İlham Əliyev əvvəlki illərdə də dəfələrlə bu erməni faşistləri haqqında öz çıxışlarında məsələ qaldırıb və beynəlxalq təşkilatlar qarşısında, ölkələr qarşısında qəti mövqeyini ortaya qoyaraq bildirib ki, faşistlərin qəhrəmanlaşdırılmasına imkan vermək olmaz. Həmçinin dövlətimizin başçısı MDB Zirvə görüşlərinin birində öz çıxışında cəllad Njde ilə bağlı məsələni qaldırmış və birmənalı olaraq bəyan etmişdi ki, Njdeyə Ermənistanın paytaxtı İrəvanda qoyulan abidə faşizmin təbliğatıdır. Tarixi faktdır ki, bu adam faşist cəlladı olub. İlk öncə günahsız azərbaycanlıları və ondan sonra İkinci Dünya müharibəsi zamanı sovet ordusunun əsgərlərini, zabitlərini qətlə yetirib. Ermənistanda isə onun qəhrəmanlaşdırılması gedir. Həmçinin Ermənistanın bugünkü hakimiyyəti faşistləri təbliğ edir, onları müdafiə edir. Əlbəttə ki, Rusiyanın özünün də eynən Azərbaycan kimi faşizmin qəhrəmanlaşdırılmasına qarşı gedən mübarizədə ön sıralarda olmasına rəğmən Moskvada ermənilərin diaspor təşkilatının xətti ilə bu dözülməz aksiyanın keçirilməsi heç bir çərçivəyə sığmır. Prezident İlham Əliyevin müsahibəsində qeyd etdiyi kimi, Azərbaycan və Rusiya faşizmin baş qaldırmasının, İkinci Dünya müharibəsinin tarixi ilə bağlı təhrifetmə cəhdlərinin yolverilməz olması xüsusunda bütün səviyyələrdə tamamilə həmrəydilər. İrəvanda faşist Njdenin adını daşıyan küçələrin, meydanların, metro stansiyasının olması, ona böyük abidənin qoyulması onu göstərir ki, erməni faşizmi hələ də yaşayır. Əlbəttə, onlar İkinci Qarabağ müharibəsində aldıqları ölümcül zərbədən sonra artıq əvvəlki illərdə olduqları qədər fəal deyillər. Lakin Ermənistanda faşizm yenidən baş qaldırır. Ermənistanın keçmiş faşist rəhbərləri, uşaq qatilləri Sarkisyan, Köçəryan yenə də meydan sulamağa çalışırlar. Buna yol verməmək üçün gərək bütün ölkələr və beynəlxalq ictimaiyyət də bu məsələdə həmrəy olsun. Öz müsahibəsində bu məsələ ilə bağlı konkret mövqeyini növbəti dəfə ortaya qoyaraq, Prezident İlham Əliyev bir daha vurğuladı ki, Azərbaycan heç vaxt imkan verə bilməz ki, regionda erməni faşizmi yenidən baş qaldırsın. Əgər Ermənistan yenə də Azərbaycan üçün potensial təhdidə çevrilərsə, bu zaman o, yerindəcə məhv ediləcək və bunu hər kəs bilməlidir. Bizim diaspor qurumları bu istiqamətdə çox böyük fəallıq göstərməlidir ki, erməni faşist təbliğatının yayılmasının qarşısını tez bir zamanda ala bilək”.
Məhəmmədəli QƏRİBLİ Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
