Rusiyanın Avropa Şurası Parlament Assambleyasındakı (AŞPA) nümayəndə heyətinin üzvü, deputat Leonid Slutski qurumun qış sessiyasında monitorinq prosedurlarına həsr edilmiş qətnamə layihəsinin müzakirəsi zamanı AŞPA-da Azərbaycana açıq-aşkar birtərəfli yanaşma gördüyünü bildirib.
Leonid Slutski deyib ki, qətnamə layihəsinin Qarabağ məsələsinə həsr edilmiş üçüncü paraqrafı reallığı əks etdirmir və əlavə edib ki, AŞPA-da qəbul olunan qərarlar ölkələri iki qütbə parçalamamalıdır.
Qeyd edək ki. Avropa Şurası Parlament Assambleyasında Ermənistanla bağlı qətnamə müzakirəyə çıxarılıb.
Lakin qətnamədən daha çox, səsvermə prosesi Ermənistanda gündəmə çevrilib.
Belə ki, layihənin əleyhinə səsverənlərdən biri də Ermənistanın qurumdakı öz nümayəndəsi olub.
Ermənistanın Respublika Partiyasının üzvü, Ermənistan parlamentinin üzvü Ayk Mamicanyan qətnamənin əleyhinə çıxıb.
Çox maraqlıdır, bizim nümayəndə heyətimiz niyə Azərbaycanla bağlı qəbul edilən qərəzli qətnamınin qarşısını ala bilmıyiblər?
Fazil Mustafa: “AŞPA-da Azərbaycanı qaralamaq məqsədilə çıxarılmış belə qərarların da heç bir hüquqi, siyasi nəticəsi olmayacaq"
Azərbaycanın AŞPA-dakı nümayəndə heyətinin üzvü, millət vəkili Fazil Mustafanın sözlərinə görə, həmin qətnamə layihəsində Azərbaycana qarşı bir çox məsələlərdə qərəzli yanaşma var:
"Media, insan haqları, erməni əsirləri ilə bağlı məsələlərdə xeyli qərəzli yanaşma ortaya qoyulub. Həmin sənəddə birtərəfli mövqe sərgilənib. Həmçinin cinsi azlıqlarla bağlı məsələlərdə Azərbaycanı qınayıcı müddəalar əks olunub. Bunlar mahiyyət etibarilə Azərbaycanın əleyhinə əvvəlcədən düşünülmüş, planlaşdırılmış bir yanaşmadır. Azərbaycan təbii olaraq bu qeyri-obyektiv münasibəti rədd eləyir. AŞPA-da Azərbaycanı qaralamaq məqsədilə çıxarılmış belə qərarların da heç bir hüquqi, siyasi nəticəsi olmayacaq".
Mirkazım Seyidov: “Ortadakı nəticə nümayəndə heyətinin fəaliyyətinə olan qiyməti bariz əks etdirir”
Böyük Dayaq Partiyasının sədri Mirkazım Seyidov isə qəzetimizə bildirdi ki, bizim Avropa təsisatlarında təmsil olunan nümayəndə heyətinin fəaliyyəti onu qane etmir: “Bir çoxları ora sanki gedib gəzib gəlmək yeri kimi baxır. Qətnamə çıxarılandan sonra onu pisləməyi hamı bacarır. Ancaq oradakı nümayəndə heyətinin üzvləri prosesi bilməlidir. Ölkəmizə qarşı hansı təxribatların hazırlandığının fərqində olub, qabaqlayıcı tədbirlər görməlidirlər. Bundan əlavə, lazımi şəkildə lobbiçilik aparılmalıdır ki, səsvermə bizim əleyhimizə çevrilməsin. Ortadakı nəticə nümayəndə heyətinin fəaliyyətinə olan qiyməti bariz əks etdirir. Hesab edirəm ki, ümumiyyətlə bu parlament buraxılıb, yenidən seçilməlidir ki, AŞPA və digər qurumlarda təmsil olunmaq üçün daha çevik deputatlardan ibarət nümayındə heyətini formalaşsın”.
Məhəmmədəli QƏRİBLİ
