Yayılan məlumatlara görə, Qarabağdan qaçan bir grup erməni İrəvanda etiraz aksiyası keçiriblər. Etirazçılar onlara qaçqın, ya köçkün statusunun verilməsini tələb ediblər. Onlar qaçqın və ya köçkün statusunu ona görə istəyiblər ki, sonra rahatlıqla xarici ölkələrə üz tuta bilsinlər. Onlara bildirilib ki,
Qarabağda yaşayan ermənilər hamısı rəsmi olaraq Ermənistan vətəndaşlarıdır, bu səbəbdən də Ermənistan pasportu daşıyan şəxs Ermənistanda qaçqın sayıla bilməz.
Artıq Ermənistan özü özünü ifşa etməyə başlayıb. Bu ölkə özü bu faktlarla sübut edir ki, 30 il boyunca Qarabağdakı erməni əhalinin sayını süni surətdə artmaq ucun Ermənistan vətəndaşlarını da ora köcürüblər.
“Ermənistanın yaratdığı bu problem indi özünə qarşı çevirilib”
Qarabağ Azadlıq Təşkilatının (QAT) sədri Akif Nağı bizimlə söhbətində bildirdi ki, baş verənlər Ermənistanın iç üzünü açır. O, hesab edir ki, bütövlükdə ermənilərin Qarabağda yaşama məsələsi ciddi izlənilməlidir, öyrənilməlidir. “Çünki bu Ermənistanın ifşa edilməsi sahəsində əsas məsələlərdən biridir. Qarabağa nə zaman köçdüklərini özləri də etiraf ediblər. 1978-ci ildə Ağdərə rayonu ərazisində ermənilərin Qarabağa gəlməsinin 150 illiyi münasibətilə abidə qoymuşdular. Bu hamının bildiyi bir faktdır. Amma biz bunu sanki dünyaya çatdıra bilmirik. Keçən əsrin 90-cı illərində bu sahədə çox ciddi işlər görülməli idi. Çünki o dövrdə dünyanın heç nədən xəbəri yox idi və hansı informasiyanı alırdı ona inanırdı. Gizlin deyil ki, o dövrdə ermənilər daha fəal oldular və dünyaya yalan məlumatlar yaya bildilər. Amma yenə də gec deyil, hər şeyi çatdırmağın bir üsulu var və biz də o üsulu tapıb həqiqətlərimizi dünyaya çatdırmalıyıq. Ona görə ki, ermənilər hələ də yalanlarını davam etdirirlər. Keçən əsrin 90-cı illərinin ortalarında Ermənistanın o vaxtkı rəhbərliyi deyirdi ki, yaxın on ildə Qarabağdakı ermənilərin sayını 300 minə çatdırıb iddialarımızı daha ciddi şəkildə ortaya qoymaq istəyirik. Köçəryanın və Sarkisyanın vaxtında belə bir plan qurmuşdular. Onlar buna nail ola bilmədilər. Nə qədər çalışsalar da, xaricdən gətirdikləri erməni ailələrinin və Ermənistan vətəndaşlarının hesabına erməni əhalinin sayını süni şəkildə artırmağa çalışsalar da, bu alınmadı. Gördüyünüz kimi, Ermənistanın vaxtilə Qarabağa köçürdüyü Ermənistan vətəndaşları Qarabağda qalmaq istəməyib İrəvana gediblər. İndi də tələb edirlər ki, bizə qaçqın statusu verin ki, xarici ölkələrə gedək. Ermənistanın yaratdığı bu problem indi özünə qarşı çevirilib. Baş verənlərlə Ermənistan özü özünü ifşa edir. Ermənilər etiraf edirlər ki, Ermənistan vətəndaşı olan erməmiləri süni şəkildə gətirib Qarabağda yerləşdiriblər. Bu ermənilər də, Azərbaycanın qələbəsindən sonra çıxılmaz vəziyyətdə qalıblar, qaçmağa yerləri də yoxdur”.
A.Nağının sözlərinə görə, Ermənistan höküməti Qarabağda yaşayan ermənilərin bir hissəsinə də qanunsuz olaraq Ermənistan vətəndaşlığı verib. “Ermənistan özünün süni məskunlaşdırma siyasətini ifşa etməklə yanaşı həm də özü özünü dolaşığa salıb. Ermənistan vətəndaşı olan əhali Qarabağda qalmaq istəmirlər və Ermənistana gəlirlər, Ermənistan höküməti isə onlara “qaçqın”, “köçkün” statusu verə bilmir. Ermənistanın bu vətəndaşları xaricə getmək istəsən. Bir azdan Ermənistanda əhali qalmayacaq və xaricə köçmək üçün isə onlara “qaçqın”, “köçkün” statusu verilməlidir. Ona görə də, İrəvanda aksiyalar keçirib hökümətdən status tələb edirlər. Ermənistan öz vətəndaşlarına heç cür “qaçqın”, “köçkün” statusu verə bilməz. Ermənistan hökuməti dilemma qarşısında qalıb və yaratdığı problemi özü həll etməyə çalışır. Amma bütün hallarda, Azərbaycan məsələni diqqətlə izləməlidir. Biz bu faktlardan Ermənistanı ifşa etmək üçün geniş istifadə etməliyik. Çünki özləri öz dilləri ilə deyirlər ki, Qarabağdan qaçıb gəlmiş ermənilər Ermənistan vətəndaşları olduqları üçün onlara “qaçqın”, “köçkün” statusu verilə bilməzlər. Azərbaycan dünyaya çatdırmalıdır ki, Ermənistanın fırıldaqlarının üstü elə öz vətəndaşları tərəfindən açılır. Ermənilərə himayədarlıq edənlər də bundan dərs götürməlidirlər. Təəssüf ki, hələ də dünyada Ermənistanı himayə edənlər var” - deyə A.Nağı vurğuladı.
İradə SARIYEVA
