Ermənistanda 28 yanvar ordu günü kimi qeyd edilir. Bu il Ermənistan ordusunun yaradılmasının 30 illiyi sönük əhval-ruhiyyədə qeyd edilib. Bu da məlum olduğu kimi, İkinci Qarabağ müharibəsində işğalçı ordunun üzləşdiyi ağır məğlubiyyətlə əlaqədardır. Müharibədəki məğlubiyyət “məğlubedilməz erməni ordusu” mifini yox etdi.
Rusiyanın Ermənistandakı səfirliyi ordunun yaradılmasının 30 illiyi münasibətilə qarşı tərəfə təbrik məktubu ünvanlayıb. Məhz bu, ermənilərin qəzəbinə səbəb olub. Erməni mediası səfirliyin bu addımını Rusiyanın heyrətamiz ikiüzlülüyü kimi dəyərləndirib. Ermənilər bunu onunla əsaslandırmağa çalışırlar ki, Rusiyanın Qarabağ müharibəsində tutduğu mövqe müttəfiqi olan Ermənistana xəyanət idi: “Qarabağ müharibəsində bir ümid işığı var idi ki, əsl müharibə anında, geri çəkilməyə heç bir yerin qalmadığı bir vaxtda Rusiya erməni xalqı qarşısında tarixi və müttəfiqlik öhdəliklərini yada salmaq məcburiyyətində qalacaq. Təəssüf ki, bunun sadəcə bir illüziya olduğu ortaya çıxdı. Bir vaxtlar Rusiya Erməniləri İttifaqının qurultayına gələn və ermənilərin xüsusi vəziyyəti ilə bağlı Böyük Pyotrun əmrlərinə əməl etməyə hazır olduğunu deyən Putinin müharibə vaxtı qorxaq mövqedən çıxış etdiyini heç vaxt unutmayacağıq. O, “Qarabağ Azərbaycanın ərazisi olduğu üçün Rusiyanın münaqişəyə qarışmağa haqqı yoxdur” kimi dəhşətli ifadənin arxasında gizləndi”.
Görünən odur ki, Ermənistanda antirus isteriyası azalmır. Hansısa məqamlarda bu ovqat daha da alovlanır. Baxmayaraq ki, Rusiya olmasaydı Qarabağda birdəfəlik erməni separatizminin kökü kəsiləcəkdi. Bu gün Xankəndidə separatçı tör-töküntülərin var olması məhz Rusiyanın sayəsində mümkün oldu.
Sözügedən məsələ ilə bağlı fikirlərini baki-xeber.com-la bölüşən hərbi ekspert Ramil Məmmədli hesab edir ki, ermənilər tarixən nankor toplum olduqları üçün onlara kim yaxşılıq etsə belə, sonda ona xəyanət edəcəklər: “Xəyanət, nankorluq onların qanında, genində və bir sözlə ruhundadır. Ermənilər üçün fərqi yoxdur kim onlar üçün vaxtilə nə edib. Bir zamanlar Rusiya güclü idi onun yanında yer aldılar. Elə ki, Rusiyanın zəifləməsi ilə bağlı proseslər getməyə başladı, tez Qərbə sarı boylanmağa başladılar. Məgər erməni işğalçıları 90-cı illərdə Rusiyanın hesabına Azərbaycan ərazilərini işğal etmədilərmi? Ötən 30 il ərzində nəsə qurub-yaratdılarmı? Tam əksinə əksər yaşayış məntəqələrini viran qoydular. Erməni əhalisinin sayını süni şəkildə də olsa istədikləri səviyyədə artıra bilmədilər. Bir müddət sonra ermənilər orada yaşamağın perspektivsiz olduğunu görüb miqrasiya etdilər. Baxmayaraq ki, böyük ərazilər, oradakı zəngin təbii sərvətlər 30 ilə yaxın ermənilərin nəzarətində qaldı. Ancaq bununla onlar nə hansısa inkişafa nail oldular, nə də əhalinin rifahını yaxşılaşdıra bildilər. Qarabağın bütün nemətlərindən bir qrup quldur faydalandı. Bütün dünya Azərbaycanın ərazi bütövlüyünü dəstəklədi. Azərbaycan əsgəri öz canı-qanı bahasına torpaqları azad etdi. Məgər biz Ermənistan ərazisinə hücum etdik ki? Biz öz torpağımızda döyüşürdük. Ermənilər hesab edir ki, gərək Rusiya onların yerində Qarabağda vuruşaydı. O üzdən, Rusiyaya qarşı belə kin püskürürlər. Halbuki, Rusiya olmasaydı bütün Qarabağı separatçılardan təmizləmək mümkün olardı. Ancaq ermənilər bununla kifayətlənmək istəmir. Bunlar anlamadılar ki, 2020-ci ildə yaranan vəziyyət 90-cı illər deyildi”.
Hərbi ekspert onu da qeyd etdi ki, Ermənistanda antirus ovqatı nə qədər güclənsə də bu, Qarabağdakı vəziyyəti onların xeyrinə dəyişə bilməyəcək.
Vidadi ORDAHALLI
