Aydın Quliyev: “Heç nə olmamış Qərb diplomatlarının Ukraynadan çəkilib getməsi bağışlanmaz səhvdir” Mehman İsmayılov: “ABŞ və Britaniyanın diplomatlarını Ukrayna ərazisindən çıxarması...”
Rusiya və Ukrayna arasında müharibənin artıq qapı ağzında olduğuna dair fikirlər səsləndirilir. Belə bir vaxtda ABŞ və İngiltərə diplomatlarının Kiyevi tərk etməsi birmənalı qarşılanmır.
Ekspertlərin qənaətinə görə, Rusiya Ukrayna müharibəsi hər an alovlana bilər və belə bir vəziyyətdə bəzi Qərb dövlətləri özlərinə müttəfiq etmək istədikləri Ukraynanı meydanda tək qoydular. Ukrayna prezidenti Vladimir Zelenski ABŞ və İngiltərənin diplomatlarını Ukraynadan çıxarmasına reaksiya verib. O bu ölkələrin öz diplomatlarını ölkədən çıxarmaqla düzgün hərəkət etmədiyini qeyd edib və bildirib ki, Ukrayna “Titanik” gəmisi deyil hamı bir yerdə bata. Doğurdan da, diplomat ölkənin siyasətini həyata keçirirsə, diplomatın həyatı qiymətlidirsə, o insanların da həyatı qiymətli olmalıdır. Əslində, diplomatlar ən gərgin anlarda, ən çətin vaxtlarda belə sona qədər qalmalıdırlar. ABŞ və İngiltərə bir tərəfdən Ukraynanı özlərinə müttəfiq etmək istəyirlər, o biri tərəfdən diplomatlarını bu ölkədən çıxarırlar.
ABŞ və İngiltərə diplomatlarını Kiyevdən çıxarmaqla düzmü etdi?
“Bakı-Xəbər” qəzetinin baş redaktoru Aydın Quliyev bu məsələni “Qərb öz diplomatlarını Kiyevdən çıxarmaqla Ukrayna xalqına böyük pislik etdi” yazısında şərh edib: “Buna beynəlxalq diplomatik və geosiyasi mübarizədə nə ad qoyasan və ya necə haqq qazandırasan?ABŞ və Britaniya öz dipkorpuslarını Kiyevdən çəkib apardılar. 2004-cü ildən başlayaraq Ukraynanı “zərli–zibalı” Qərb dəyərlərinə qovuşdurmaq üçün neçə dəfə bu xalqı gərgin geosiyasi eksperimentlərin “əzabkeş qəhrəmanına” çevirdilər...”
A.Quliyev daha sonra qeyd edir: “...Başqa nə kimi qənaətə gəlmək olar ki?! Əgər iki super dövlət - ABŞ və Britaniya Ukrayna xalqını arxayın salaraq bir balaca çətinlik yaranan kimi diplomatlarını çəkib apardılarsa, bunun adı etika dilində etibarsızlıqdır. Nə qaçhaqaçdı bu? Ukrayna bir iynənin ucu ilə partladılası " puzırok" zad deyil ki? Bütün Ukrayna xalqı öləndə qoy ingilis, amerikan diplomatlarından da ölənlər olsun. Dünya dağılmayacaq ki?! Ancaq əvəzində Ukrayna xalqına tarixlər boyu deyilə biləcək söz qalacaq- "biz sizi özümüzün can itkilərinə qədər qorumağa çalışdıq"... İndi nə deyəcəklər? Necə desinlər ki, bir şıqqıltı gələn kimi sizi qoyub qaçdıq?!
Heç nə olmamış Qərb diplomatlarının Ukraynadan çəkilib getməsi bağışlanmaz səhvdir. Ukrayna xalqının inamını qırdılar. Əslində bu xalqa hansısa perspektivdə Zelenski ilə vidalaşaraq onu ruspərəst liderlə əvəzləmək siyasətinin əsasını qoydular....
Ukrayna ətrafında Rusiya-ABŞ müharibəsini gözləyənlər , bundan qorxanlar arxayın olsunlar, müharibə zad olmayacaq. Ancaq Ukraynada hakimiyyət dəyişəcək və bir neçə 10 il Qərb postsovet respublikalarında “rəngli inqilablar” etmək imkanını itirəcək...”
Politoloq Mehman İsmayılovun fikrincə isə, Ukranyada vəziyyət gərginləşdiyinə görə ABŞ və İngiltərə diplomatlarının Ukrayna ərazisini tərk etməsi onların təhlükədən qaçması demək deyil: “Sadəcə olaraq onlar vəziyyətin gərgin və ciddi olduğunu dünyaya çatdırmaq istəyirlər. Çünki ABŞ və Böyük Britaniya, Niderland, Fransa, Estoniya, Litva, Rumıniya, Polşa, bütün bu ölkələr Ukraynaya hərbi yardım göndərirlər. Hər məqamda onlar ifadə edirlər ki, Ukraynanın yanındadırlar, əgər Rusiya Ukraynanın sərhədlərini keçərsə Rusiyaya qarşı ağır sanksiyalar tətbiq edəcəklər. Düşünürəm ki, ABŞ və Britaniyanın diplomatlarını Ukrayna ərazisindən çıxarması vəziyyətin ciddiliyini bütün dünyaya çatdırmaq üçündür. Üstəlik də, əgər ciddi qarşıdurma olacaqsa gerçəkdən İngiltərənin, ABŞ-ın, o ölkələr ki, ora yardım göndərirlər, onların cəmiyyətlərinin vəziyyətə ciddi yanaşmasını təmin etmək, ictimai rəydə fikir yaratmaq üçün addımlar atılır. Əlbəttə, diplomatlar, səfirlər o gərgin, çətin vəziyyətdə işləməyə hazırdırlar”.
M.İsmayılov hesab edir ki, ABŞ və İngiltərə öz diplomatlarını Kiyevdən çıxarmaqla bu hadisələrə ciddi reaksiya verdiklərini nümayiş etdirirlər. Onların Rusiyanın aqressiyasını, onun işğalçı olduğunu dünyaya çatdırmaq istədiklərini vurğulayan M.İsmayılov deyir ki, o ölkələr diplomatları çıxarmaqla, sanksiyalar barədə bəyanatlar verməklə vəziyyətin çox gərgin və müharibənin real olduğunu insanlara çatdırmaq istəyirlər: “Məncə, əsas düşüncə bundan ibarətdir”.
İradə SARIYEVA
