Buna beynəlxalq diplomatik və geosiyasi mübarizədə nə ad qoyasan və ya necə haqq qazandırasan? ABŞ və Britaniya öz dipkorpuslarını Kiyevdən çəkib apardılar.
2004-cü ildən başlayaraq Ukraynanı "zərli-zibalı" Qərb dəyərlərinə qovuşdurmaq üçün neçə dəfə bu xalqı gərgin geosiyasi eksperimentlərin "əzabkeş qəhrəmanına" çevirdilər. Baxın, 2004-cü ildə Prezident Kuçmanı az qala Çauşesku sayağı devirərək sonda bədbəxt etdikləri Yuşşenkonu gətirdilər. Ən müxtəlif və fantastik kömək vədləri ilə Yuşşenkonu elə zirdəst elədilər ki, "narıncı qəhrəman "qayırıb ortaya atdıqları bu şəxs 2008-ci ildə həm prezidentliyini, həm "demokratiya illüziyalarını, həm də sağlamlığını itirdi, elə Qərb özü də Ukraynanı itirdi.Yuşşenko onu hakimiyyətə gətirənlərin üslubunda məğlub edildi. Bu dəfə meydan hərəkatının təşkilatçısı isə Rusiya oldu, inqilabın rəngi də dəyişmişdi, narıncı yox, qapqara inqilab...
Ukrayna xalqını müxtəlif rənglər altında kütləvi hərəkatların qurbanına çevirməkdən geri durmadılar. Cəmi 5 il sonra - 2013-cü ildə ruspərəst Yanukoviçi bu dəfə də Qərb dəyərlərinin parıltısında gözləri qamaşdırılmış xalqın əli ilə devirdilər və Poroşenkonu gətirdilər. Poroşenko 5 illik hakimiyyətdə kəskin antirusiya ritorikasından başqa yadda qalan nəsə edə bilmədi. Korrupsiya baş alıb getdi, hətta Kuçmanın dövrünə xas siyasi korrupsiyanın ən cinayətkar forması olan "mandat bazarı" daha da qızışdı. Ukraynaya real heç bir kömək edilmədi, pul vermədilər, Gürcüstan kimi aldadaraq NATO-ya qəbul etmədilər, yenə də Gürcüstan kimi aldadaraq ərazisinin parçalanmasına səbəb oldular. Bu dəfə də çarəsiz xalq özü hərəkətə keçərək Poroşenkonu digər Rusiya əleyhdarı Zelenski ilə əvəz elədi. Qoltuğunun altını hər addımda qarpızlayıb Zelenskini hansı odların içinə atmadılar?! Onu oddan çıxarmağa bir cəhd belə göstərmədilər. NATO-ya üzvlük proqramı vermədilər, onu Rusiyanın şantajçı informasiya müharibəsinin od-alovları içində tək buraxdılar. Rusiya Ukraynanın qulağının dibinə 100 minlik qoşun yığdı. Əvəzində onlar nə etdilər? Şərqi Avropada, Aralıq və Qara dənizdə öz hərbi güclərini artırdılar. Nə olsun? Rusiyanı bir az da qıcıqlandırdılar, Ukraynanın onsuz da çətin vəziyyətini bir az da ağırlaşdırdılar. Yəqin bir azdan sonra da açıq demədən düşünəcəklər ki, "bizə heç bu da pis nəticə deyil, Avropada və dənizlərdə hərbi strateji varlığımızı gücləndirdik, Ukrayna bağışlasın ki, onu bu dəfə də əjdahanın dişlərindən çıxara bilmədik"...
Başqa nə kimi qənaətə gəlmək olar ki?! Əgər iki super dövlət - ABŞ və Britaniya Ukrayna xalqını arxayın salaraq bir balaca çətinlik yaranan kimi diplomatlarını çəkib apardılarsa, bunun adı etika dilində etibarsızlıqdır. Nə qaçhaqaçdı bu? Ukrayna bir iynənin ucu ilə partladılası "puzırok" zad deyil ki? Bütün Ukrayna xalqı öləndə qoy ingilis-amerikan diplomatlarından da ölənlər olsun. Dünya dağılmayacaq ki?! Ancaq əvəzində Ukrayna xalqına tarixlər boyu deyilə biləcək söz qalacaq - "biz sizi özümüzün can itkilərinə qədər qorumağa çalışdıq"... İndi nə deyəcəklər? Necə desinlər ki, bir şıqqıltı gələn kimi sizi qoyub qaçdıq?!
Heç nə olmamış Qərb diplomatlarının Ukraynadan çəkilib getməsi bağışlanmaz səhvdir. Ukrayna xalqının inamını qırdılar. Əslində bu xalqa hansısa perspektivdə Zelenski ilə vidalaşaraq onu ruspərəst liderlə əvəzləmək siyasətinin əsasını qoydular...
Ukrayna ətrafında Rusiya-ABŞ müharibəsini gözləyənlər, bundan qorxanlar arxayın olsunlar, müharibə zad olmayacaq. Ancaq Ukraynada hakimiyyət dəyişəcək və bir neçə 10 il Qərb postsovet respublikalarında "rəngli inqilablar " etmək imkanını itirəcək.
Bunu mən deyirəm və istənilən mübahisəyə hazıram...
Aydın QULİYEV
