Erməni terror təşkilatı VOMA yenidən aktivləşməyə başlayıb. Vətən müharibəsindən sonra səsi batan terror təşkilatının sorağı son vaxtlar sosial şəbəkələrdən gəlir.
Teleqram kanallarında “KarabakhBulletin”ə istinadən yayılan məlumata görə, Ermənistanın VOMA terror təşkilatı terrorçular hazırlamaq məqsədi ilə filiallarından daha birini Xankəndidə açmaga hazırlaşır. Hətta bu barədə VOMA-nın sosial mediada açıqlaması da yayılıb və bəzi fikirlərə görə, VOMA-nın könlündən Ağdərədə də filial açmaq keçir (?).
“...Xankəndiyə Laçın dəhlizi vasitəsilə keçə bilərlər, ona görə də, biz dərhal o dəhlizi nəzarətə götürməliyik”
Məsələyə münasibət bildirən hərbi ekspert Tərlan Eyvazov “Bakı-Xəbər”ə bildirdi ki, ermənilərin terrorçuluq fəaliyyəti yeni bir məsələ deyil, 200 ilə yaxındır onlar köçüb gəldikləri bu bölgədə terror işləri ilə məşğul olurlar. T.Eyvazovun sözlərinə görə, erməni terror təşkilatları dünyanın hər yerində terror aktları törədirlər: “Həmişə də müharibədə uduzarkən xəyanətkar yollara əl atıb terror təşkilatları vasitəsilə təxribatlar törədirlər. Biz erməni terror təşkilatlarının qanlı cinayətlərini 1915-ci ildən sonra Osmanlı dövlətində, 1918-1920-ci illərdə öz xalqımızın tarixində görmüşük. Bütövlükdə isə, Sovet dövründə də, indi də biz erməni terror təşkilatlarının əməllərinin şahidi olmuşuq. Erməni terror təşkilatları Çar Rusiyasında da, İranda da terror-təxribat işləri həyata keçirib. Hətta KKB-nin qılıncının dalı da, qabağı da kəsdiyi vaxtlar Sovet İttifaqı məkanında, Moskvada, Bakıda qanlı terror törədiblər. Təbii ki, Qarabağ probleminin də yarandığı ilk günlərdə də separatçılar erməni terror təşkilatlarından geniş istifadə edərək onlar vasitəsilə keçmiş Dağlıq Qarabağda, Gəncədə, Bakıda və başqa ərazilərimizdə terror aktları həyata keçiriblər. Heç təsadüfi deyildi ki, bizim Vətən müharibəsindəki qələbəmizdən sonra mən də daxil olmaqla əksər müşahidəçilər belə bir təhlükənin yaranacağını deyirdik. Biz bunu tarixi təcrübəyə istinadən bildirirdik. İlk dövlərdə də ermənilər əvvəl 62, sonra 150 nəfərlik tərkiblə hansısa terror hərəkətləri törətməyə cəhd etdilər və onların qarşısı dərhal alındı”.
T.Eyvazovun sözlərinə görə, erməni terror təşkilatlarından hər zaman təxribatlar gözləmək mümkündür. “Təbii ki, bunun baş verəcəyi gözlənilən idi. Sözsüz, Ermənistan hökuməti deyəcək ki, bizim bundan xəbərimiz yoxdur. Amma əvvəldən bunun artıq işartıları görünməkdə idi. Şuşa yaxınlığında bizim hərbiçilərin üzərinə qumbara atılması, digər tərəflərdə təxribatların törədilməsi, atəşlər açılması halları məlumdur. Amma Azərbaycan tərəfi də erməni terroruna cavab verməyə konkret şəkildə hazırdır. Bu hazırlığın nümunələrindən biri də 10 noyabr sazişindən 10 gün sonra ölkəmizə soxulmaq istəyən terrorçuların dərhal tutularaq zərərsizləşdirilməsidir...Onlar məhkəmə qarşısına çıxarılıblar və sair. Azərbaycanın strukturları terrorçulara tam cavab vermək əzmindədir. Erməni terror təşkilatı VOMA-nın Xandəndində “filial” açmaq niyyətinə gəlincə, buna imkan vermək olmaz. Əlbəttə, Rusiya sülməramlıları VOMA-nın Xankəniyə daxil olmasına qətiyyən yol verməməlidir.
VOMA-nın təxribatçı bəyanatları onu göstərir ki, ermənilər öz çirkin niyyətlərindən əl çəkmək istəmir. Söz yox ki, bizim ordumuz da o təxribatlara cavab verməyə hazırdı. Azərbaycanın həmin ərazisi müvəqqəti olaraq Rusiya sülhməramlılarının nəzarəti altındadır, orada baş verən hər bir hadisəyə onlar cavabdehdir. Əgər onların nəzarətində olan ərazimizdə erməni terror təşkilatları təxribat törədərsə, sülhməramlılar bunu görməzdən gələrsə, bizim müvəfiq qurumlar dərhal hərəkətə keçəcək və öz vəzifələrini yerinə yetirəcəklər. VOMA terror təşkilatı Qarabağda filial yaradıb terrorçu hazırlamağa cəhd edərsə Azərbaycan ordusu onlara öz yerini göstərəcək. Bizim eni beş kilometr olan Laçın dəhlizimizdən ermənilərin istifadəsinə icazə verilməsi Azərbaycan tərəfindən olduqca humanitar addımdır. Eyni zamanda Laçın dəhlizindən ermənilərin istifadəsinə şərait yaradılması bizim təhlükəsizliyimiz üçün çox böyük təhdiddi. Ona görə də, Laçın dəhlizinin tam olaraq bizim nəzarətimizə keçməsi məsələsi sürətləndirilməlidir. Orada biz yoxlamalar aparmalıyıq. Digər yerlərdə biz artıq Ermənistanla sərhədlərimizi möhkəmlətmişik, ermənilərin o sərhədlərdən daxil olması mümkün deyil. Bu baxımdan VOMA terrorçuları Xankəndiyə Laçın dəhlizi vasitəsilə keçə bilərlər, ona görə də, biz dərhal o dəhlizi nəzarətə götürməliyik” - deyə T.Eyvazov qeyd etdi.
İradə SARIYEVA
