İkinci Qarabağ müharibəsi başlayandan sonra 2020-ci ilin oktyabrından Ermənistan türk mallarının ölkəyə gətirilməsinə qadağa qoyub. Həm dövlət səviyyəsində buna məhdudiyyət qoyuldu, həm də erməni millətçiləri bununla bağlı kütləvi kampaniya aparmağa başladılar. Ancaq uduzan tərəf Ermənistan oldu. Çünki Türkiyə yaxın olduğu üçün oradan Gürcüstan üzərindən məhsul idxal etmək daha sərfəli idi, nəinki digər ölkələrdən mal almaq.
Artıq vəziyyət o həddə gəlib çatıb ki, erməni rəsmiləri bu qərarın yanlış olduğunu dolayı da olsa etiraf edirlər. Ermənistanın iqtisadiyyat naziri Vaan Kerobyan bəyan etdi ki, Türkiyə mallarına qoyulan embarqo inflyasiyaya səbəb oldu. Onun sözlərinə görə, digər ölkələrdən gətirilən mallar baha olduğu üçün bu qərar qısa müddətdə öz mənfi nəticəsini göstərib: “Uzunmüddətli perspektivdə təsirin müsbət olması ilə bağlı gözləntilər var idi, amma belə olmadı. Üstəlik hökumət kollegial orqandır və o üzdən, başqa qərar qəbul etdi”.
Ermənistanla Azərbaycan arasında dəmir yolunun tikintisi ilə bağlı danışan erməni nazir ortada dəqiq məbləğin olmadığını da bildirib: “Dəyəri bir neçə milyon ola bilər. Zamanı gələndə xərcləyəcəyik”.
Görünən odur ki, Ermənistan hakimiyyəti bu cür addımların mənfi nəticələr verdiyini və ölkə iqtisadiyyatına zərbə vurduğunun fərqinə varmağa başlayıb. Məlum açıqlamanı həm də sözügedən məhdudiyyətin ləğv ediləcəyinə hazırlıq kimi də dəyərləndirmək olar. O baxımdan bütün bunları ekspertlər necə dəyərləndirir?
“Ermənistan rəhbərliyi indi-indi bunun yanlış olduğunu dərk etməyə başlayıb”
Məsələyə münasibət bildirən Aydınlar Partiyasının sədri Qulamhüseyn Əlibəylinin sözlərinə görə, o vaxt Ermənistanın belə bir addım atması siyasi qərar idi: “Bunun hansısa iqtisadi əsası yox idi. Ancaq bu, daha çox Ermənistana ziyan vurur. Türkiyə kimi böyük ölkə üçün bu, elə də əhəmiyyət kəsb etmir. Müharibənin gedişi vaxtı Ermənistan belə bir qərar verdi, amma onlar indi-indi bunun yanlış olduğunu dərk etməyə başlayıblar. Ermənistan Türkiyə ilə münasibətlərini yoluna qoymağa çalışırsa, o zaman belə mənasız embarqolardan əl çəkməlidir. Çünki bundan daha çox itirən Ermənistandır. Təkcə bununla məsələ bitmir. Ermənistanın Türkiyəyə yönəlik ərazi iddiaları var, onlardan da əl çəkməlidilər. Yəni, deməyim odur ki, bir sıra məsələlər var və onlar həll olunandan sonra Türkiyə-Ermənistan münasibətləri normallaşa bilər. O baxımdan hesab edirəm ki, münasibətlərin normallaşdırılması istiqamətində ilk addım olaraq həmin qadağa ləğv oluna bilər. Belə bir ehtimal var. Rəsmi səviyyədə qadağanın onlara ziyan gətirdiyi etiraf olunursa, deməli, bunun arxasında hansısa məqsəd var”.
Partiya sədri bir daha qeyd etdi ki, Ermənistan Türkiyə ilə münasibətləri yoluna qoymaq istəyirsə, bir sıra iddialardan əl çəkməlidir.
Vidadi ORDAHALLI
