Azərbaycanda bəzi deputatlar, müğənnilər, iş adamları BMT-nin UNCOPA adlı təşkilatının mükafatını aldıqlarını iddia edirlər. Onların içində müğənni Ruhi və deputat Eldar Quliyev də var. Məlumatlara görə, deputat Eldar Quliyevin, aktrisa Suğra Bağırzadənin, son günlər isə Ruhi Əliyevanın belə mükafat almaları ilə bağlı piar yazı məqalələrin linkini paylaşılıb.
“Birləşmiş Millətlər Təşkilatının (BMT) UNCOPA adlı qurumu və ya agentliyi yoxdur. Azərbaycan vətəndaşlarına müxtəlif adda mükafatlar verən bu təşkilatın Cenevrədə yerləşdiyi yazılır. Lakin internetdən onun statusu (QHT? Özəl şirkət?) və digər fəaliyyətləri haqqında məlumat tapa bilmədim. Təşkilatın vebsaytı belə yoxdur”. Bu barədə BMT-nin Azərbaycandakı nümayəndəliyinin əməkdaşı Rəşad Hüseynov məlumat yayıb. R.Hüseynov bildirib ki, bir təşkilat istədiyi adama və ya quruma mükafat verə bilər: “Sadəcə bilməyinizi istəyirəm ki, UNCOPA-nın verdiyi mükafatların BMT ilə yaxından-uzaqdan əlaqəsi yoxdur”.
Qeyd edilənə görə, mükafatı təqdim edən tanınmış şair, professor Elçin İsgəndərzadədir.
UNCOPA təmsilçisi, exnika elmləri doktoru, professor, Azərbaycan Respublikasının Əməkdar Müəllimi, Azərbaycan Respublikasının Fəxri Mədəniyyət işçisi, Azərbaycan Respublikasının Qabaqcıl Təhsil işçisi Elçin İsgəndərzadə ilə əlaqə saxladıq. Elçin İsgəndərzadə sorğumuza cavab olaraq “Bakı-Xəbər”ə “Bir-birimizin qədrini bilək” sərlöhvəli cavabda yayılan iddialara tam aydınlıq gətirib. Bu fikirləri təqdim etməzdən əvvəl professor Elçin İsgəndərzadə bizimlə söhbətində qeyd etdiyi fikirlərə diqqətinizi çəkmək istəyirik. E.İsgəndərzadə bildirdi ki, təmsilçisi olduğu UNCOPA təşkilatı müstəqil qurumdur və UNCOPA BMT-nin nəzdində fəaliyyət göstərmir. Bu barədə yayılan məlumatların əsassız olduğunu deyən E.İsgəndərzadənin sözlərinə görə, o heç zaman bu təşkilatın BMT təsisatı olduğunu deməyib və bu verilən diplomlardan da aşkar görünür. “BMT-nin təmsilçisi çox doğru deyib, UNCOPA BMT-nin təşkilatı deyil. UNCOPA-nın Azərbaycandakı təmsilçisi mənəm və mən də heç zaman o mükafatı BMT-nin mükafatı kimi təqdim etməmişəm. Lakin bu barədə tamamilə yanlış bir məlumat yayılıb. Bu təşkilatın adı BMT yox, Millətlərin Birləşmiş İctimai Təltif Şurasıdır...Sadəcə, Millətlərin Birləşmiş İctimai Təltif Şurası təhrif edilərək BMT kimi təqdim edilib” - deyə E.İsgəndərzadə qeyd etdi.
“Əslində dərindən diqqət yetirdikdə burda heç bir saxtakarlıqdan və ya digər neqativlikdən qətiyyən söhbət gedə bilməz...”
“Bakı-Xəbər”ə göndərdiyi “Bir-birimizin qədrini bilək” sərlöhvəli cavabda isə professor Elçin İsgəndərzadə bunları qeyd edib: “Bəzi saytların 26 yanvar tarixli xəbərləri arasında yer almış “BMT-nin adından verilən mükafatların saxta olduğu üzə çıxıb” adlı xəbərlə bağlı bəzi məsələlərə yarandığı gündən daimi oxucusu olduğum sevimli qəzetimiz vasitəsilə aydınlıq gətirmək istəyirəm. 2009-cu ildən təmsilçisi olduğum ictimai qurumlardan biri, ofisləri Cenevrə və Moskva şəhərlərində olan UNCOPA – Millətlərin Birləşmiş İctimai Təltif Şurasıdır. Bu Şura 1996-cı ildə Rusiyanın və dünyanın görkəmli ədəbiyyatşünaslarından biri olan, yaxın dostum, uzun illər Lüksemburqda fəaliyyət göstərən Avropa Ədəbiyyatçılar İttifaqının Sədri olmuş, mərhum akademik, şair Mixail Pekelis (2.08.1947 – 14.05.2020) tərəfindən Birləşmiş Millətlər Təşkilatının sosial layihələrindən birinə rəhbərlik etdiyi zaman onun rəhbərliyi altında bir qrup avropalı alimlərin təşəbbüsü ilə yaradılmış və quruma vəfatına qədər o rəhbərlik etmişdir. 1999-cu ilin may ayına qədər bu ictimai şura Birləşmiş Millətlər Təşkilatının layihəsi çərçivəsində beynəlxalq mükafatlandırma fəaliyyəti ilə məşğul olmuş, layıhənin icra müddəti bitdiyi may 1999-cu ildən etibarən isə müstəqil ictimai təşkilat olaraq fəaliyyətini davam etdirmişdir.
2010-cu ildə Almaniyada keçirilən beynəlxalq bir Simpoziumda həmin qurumun İsveçrə təmsilçisi, tanınmış Beynəlxalq hüquq müdafiəçilərindən biri, Birləşmiş Millətlər Təşkilatının müxtəlif toplantılarında hüquqları tapdanan bir sıra xalqların hüquqlarını əzmkarlıqla müdafiə edən və bu sahədə böyük uğurlara imza atmış türk əsilli professor M.Ş. Güzel ilə (onun uzun illər BMT-də Quzey Kıbrıs və Qarabağla bağlı fədakarlığı başqa bir söhbətin mövzusudur!) tanış oldum və bir millətin nümayəndələri olaraq tanışlığımız dostluğa və əməkdaşlığa çevrildi. Nəticədə ölkəmizin bir sıra nüfuzlu, ictimaiyyətin sevgisini qazanmış elm, mədəniyyət, incəsənət xadimlərini, iş adamları və xeyriyyəçilərini ictimai mükafatlara (xüsusilə yubiley və milli bayramlarımızda) təqdim etdim və təltiflər həyata keçirildi. Hətta bir neçə təqdimatlarda M.Güzel bəy Bakıya rəsmi dəvətləri çərivəsində şəxsən özü iştirak edib. Təbii ki, bu təqdimatlardan xəbərlər ölkə mətbuatında geniş yer alıb. Çox əfsuslar olsun ki, təltif tədbirləri zamanı məruzəçilər və şəxsim tərəfindən İctimai təltif şurasının yaranışının ilk illərində BMT-nin o dönəm beynəlxalq bir layihəsinin rəhbəri olmuş akademik M.Pekelisin adı və rəhbərliyi ilə hallanması, eyni zamanda İsveçrə təmsilçisinin BMT-də çox fəal və cəsur bir hüquq müdafiəçisi olması və qurumun ictimailiyinin BMT-nin ictimai təşkilat ilkələri, niyyətləri ilə uyğunluğunu dəqiq ayırd edə bilməyən jurnalistlərimiz təltif edən qurumu Millətlərin Birləşmiş İctimai Təltif Şurası yerinə sadəcə BMT olaraq yazır və tirajlayırlar.
Əslində dərindən diqqət yetirdikdə burda heç bir saxtakarlıqdan və ya digər neqativlikdən qətiyyən söhbət gedə bilməz – təqdim edilən diplomlar, nominasiyalar, imzalar, nümayəndələr eyni quruma aiddir, məgər özü-özünü saxtalaşdırmaq olar. Saxtalaşdırma onda olardı ki, diplomlarda çox hörmətli keçmiş Baş katib Pan Gi Munun, fəaliyyətdə olan Baş katib Antoniu Quterreşin adından, imzasından və s. istifadə ediləydi. İnformasiyada fikrin mexaniki yalnışlığı saxtakarlıq yox, olsa-olsa səhlənkarlıq və ya diqqətsizlik ola bilər. Ən başlıcası isə belə qeyri-korrekt informasiyalardan doğan “dedi-qodular” həmin təltiflərə layiq görülmüş çox dəyərli şəxsiyyətlərimizin ictimai nüfuzlarına xələl gətirir. Halbuki bu mükafatlara son 15 ildə ölkəmizin az sayda ən seçmə ziyalıları, beynəlxalq ictimaiyyətə tanış olan görkəmli simalarımız layiq görülüblər. Bu isə həmin təltiflərin çox ciddi seçimlə, obyektivlik və tam şəffaflıq şəraitində verilməsini aksiomlaşdırır. Xahiş edirəm bu fikirlərimin qəzetimizdə yayınlanmasına şərait yaradasınız” - deyə E.İsgəndərzadə bildirib.
İradə SARIYEVA
