Dünən Avropa Şurası Parlament Assambleyası (AŞPA) Ermənistanın demokratik təsisatlarının fəaliyyəti ilə bağlı qətnamə qəbul edib. Qətnamədə bir sıra məsələlərə toxunulub.
Qətnamədə 2018-ci ildə siyasi hakimiyyət dəyişikliyindən sonra Ermənistanda demokratik inkişaf, eləcə də 2021-ci ilin iyununda keçirilən parlament seçkiləri sayəsində başa çatan 44 günlük müharibədən sonra yaranmış siyasi böhranın effektiv həlli yüksək qiymətləndirilib. O cümlədən Dağlıq Qarabağ münaqişəsi və 44 günlük müharibəyə toxunan AŞPA “erməni əsirlərin” qaytarılmasının, mənəvi və mədəni dəyərlərin qorunmasının zəruriliyini bildirib. AŞPA qətnaməsində həmçinin Dağlıq Qarabağ münaqişəsinin ATƏT-in Minsk Qrupu çərçivəsində ədalətli və uzunmüddətli həllinin vacibliyini vurğulanıb.
Görünən odur ki, bəzi Avropa təsisatları kimi AŞPA da erməni lobbisinin çaldığı havaya oynayır. Fəaliyyəti fiasko ilə nəticələnən Minsk Qrupunu yenidən proseslərə cəlb etmək istəyirlər. Baxmayaraq ki, bunun mənasız olduğunu özləri də yaxşı bilir. Ancaq ermənilərə xoş olsun deyə, daim bu məsələni gündəmdə saxxlamağa cəhd edirlər.
“AŞPA-nın belə mənasız çağrışla çıxış etməsinin arxasında erməni lobbisinin sifarişi dayanır”
Məsələyə münasibət bildirən Demokratik Dəyişim Partiyasının Təşkilat Komitəsinin sədri Əli Mustafayevin fikrincə, AŞPA-nın belə qərəzli qətnamə qəbul etməsi erməni lobbisinin fəaliyyəti ilə əlaqəli olan məsələdir: “Mahiyyət etibari ilə ATƏT-in müəyyən mübahisəli münaqişələrlə məşğul olması, onların həllinə yardım etməyə səy göstərməsi anlaşılandır. Çünki bu təşkilatın missiyası odur. Ancaq məsələ ondadır ki, 1992-ci ildə yaradılan ATƏT-in Minsk Qrupu fəaliyyət göstərdiyi 30 ilə yaxın müddətdə özünü doğrultmayıb. Minsk Qrupunun vasitəciliyi Qarabağ məsələsinin həllinə hansısa töhvə verməyib. Yəni, ötən illər ərzində Minsk Qrupu amorf bir qurum kimi yadda qaldı. Eyni zamanda, bir sıra hallarda qurum birtərəfli mövqe sərgiləyib. Bu baxımdan Minsk Qrupu etimadını itirib. O zaman belə bir qurumun yenidən fəaliyyət göstərməsinə nə ehtiyac var? Başqa bir tərəfdən praktiki olaraq Azərbaycan və Ermənistan arasında münaqişə çözülüb. Çünki 44 günlük müharibə zamanı Ermənistan de-yure və de-fakto Azərbaycan ərazisindən çıxarıldı. Nəticədə Qarabağ məsələsinin beynəlxalq əhəmiyyəti itdi. Artıq Azərbaycan daxilində Xankəndində erməni icması var və onun necə həll ediləcəyinə Bakı qərar verəcək. Çünki bu bizim daxili işimizdir. O üzdən, Minsk Qrupuna müraciət etməyə heçbirr ehtiyac yoxdur. Ancaq Avropa qurumları olmayan bir problem üzərində öz mövcudluğunu saxlamağa çalışırlar. AŞPA-nın belə mənasız çağrışla çıxış etməsinin arxasında erməni lobbisinin sifarişi dayanır. Çünki bu format erməni diasporun maraqlarına uyğundur. Məhz erməni lobbisi Minsk Qrupunun timsalında münaqişənin dondurulmasında xüsusi rol oynadı. Hesab edirdilər ki, vaxtın uzanması ermənilərin xeyrinə işləyir. Status-kvo onların xeyrinə olduğu üçün onu uzatmaq istəyirdilər. İkinci Qarabağ müharribəsi onların bütün planlarını məhv etdi. İndi Avropa qurumları yenidən vəziyyəti ermənilərin xeyrinə dəyişmək üçün belə cəhdlər edirlər”.
Ancaq Ə.Mustafayev hesab edir ki, Azərbaycan qalib tərəf olduğu üçün onların məkirli planları reallaşmayacaq.
Vidadi ORDAHALLI
