Heç kimdə şübhə olmamalıdır ki, Azərbaycanda “Media haqqında” yeni qanun layihəsi müasir tendensiyalara və standartlara cavab verir, eləcə də KİV-in fəaliyyət sahəsini genişləndirir.
Bu barədə Medianin İnkişafı Agentliyinin (MEDİA) icraçı direktoru Əhməd İsmayılovun Avropa Şurasının insan haqları üzrə komissarı Dunya Miyatoviçə ünvanladığı məktubda deyilir.
Bu məktub D.Miyatoviçin Milli Məclisdə qəbul olunan “Media haqqında” qanuna tənqidinə cavab olaraq yazılıb.
Məktubda deyilir ki, Azərbaycan demokratik cəmiyyətin vacib tərkib hissəsi olaraq KİV-in azadlığına böyük əhəmiyyət verir:
“Azərbaycanda söz azadlığı və KİV azadlığına milli qanunvericilk, eləcə də ölkəmizin beynəlxalq öhdəliklərinə müvafiq şəkildə tam əməl olunur. Azad KİV-lərin və söz azadlığının təşviqi Azərbaycan hökuməti üçün prioritetdir. Azərbaycan Prezidentinin 12 yanvar 2021-ci il tarixli fərmanı ilə Medianin İnkişafı Agentliyinin yaradılması da bununla bağlıdır. Bu fərman KİV sahəsində keyfiyyət dəyişikliklərinin təmin olunması üçün islahatların dərinləşdirilməsini nəzərdə tutur”.
Qeyd olunur ki, D.Miyatoviçin sözlərinin əksinə olaraq, qanun layihəsi müasir demokratik cəmiyyətin bütün tələblərinə cavab verir və peşəkar jurnalistika fəaliyyətinin maneəsiz və səmərəli icrasının təmin olunması mexanizmlərinin möhkəmlənməsinə yönəlib. Beləliklə, qanun Azərbaycanın bütün beynəlxalq öhdəliklərinə, o cümlədən Avropa İnsan Haqları Konvensiyası ilə bağlı öhdəliklərinə uyğundur.
Bundan başqa, yeni qanun layihəsi inklüzivlik və şəffaflıq şəraitində hazırlanıb. 800-dən çox jurnalist və ekspert qanunu Milli Məclisdə baxılmazdan əvvəl müzakirə etmək imkanı əldə edib. Həmçinin, parlament səviyyəsində çoxsaylı ekspertlərin, KİV nümayəndələrinin və vətəndaş cəmiyyətinin iştirakı ilə bir neçə dəfə ictimai dinləmələr təşkil olunub.
Məktubda vurğulanır ki, “Media haqqında” qanunun müasir reallıqlara uyğun olduğu və KİV-in fəaliyyət sahəsini genişləndirəcəyi barədə heç kimdə şübhə olmamalıdır:
“Qanun media subyektlərinin hüquqlarını, o cümlədən informasiya və kommunikasiya texnologiyalarının inkişafından meydana çıxan hüquqlarını qoruyacaq, KİV-in azadlığını və fikir azadlığını, eləcə də məlumatı axtarmaq, əldə etmək və yaymaq azadlığını təmin edəcək”.
Əhməd İsmayılovun Miyatoviçə ünvanladığl məktubla bağlı media ekspertləri nə düşünür?
“Cümhuriyət” qəzetinin və “Cəbhə.İnfo” saytının baş redaktoru Rəfail Becanov “Bakı-Xəbər”ə açıqlamasında bildirdi ki, bu qanun hələ qüvvəyə minməyib, ancaq indidən ona xarici basqıların olduğunu görürük: “Bunu doğru saymıram. Əvvəl qüvvəyə minsin və onlar da müşahidə etsinlər ki, hansı çatışmazlıqlar var. Yalnız bindan sonra tənqidi fikir səsləndirmək olar. Təbiidir ki, bu, birbaşa bizə qarşı yönəlmiş məsələdir. Yəni nə qəbul edirsən et, dəxli yoxdur, tənqid edıcəklər. Miyatoviç bizim jurnalistlər Qarabağda minaya düşərkən heç belə reaksiya vermirdi. Əhməd müəllim doğru olaraq qeyd edir ki, qanun ictimai müzakirələrdən keçib. KİV nümayəndələri həmin müzakirələrdə iştirak edib, öz fikirlərini bildiriblər. Etiraz edənlər də var, dəstəkləyənlər də. Miyatoviçin bu mövqeyi qərəzlidir. Çünki yalnız tənqid edənlərin mövqeyinə yer verir. Bəs dəstəkləyənlərin mövqeyinə niyə yer vermir? Ermənistanda KİV-lə bağlı qanunu mürtəceləşdirəndə heç bu münasibət olmadı. Hesaba edirəm ki, normal mövqe deyil. Əhməd İsmayılovun səsləndirdiyi bütün arqumentləri əsaslı sayıram”.
Məhəmmədəli QƏRİBLİ
