Yanvarın 26-da İran İslam Respublikasının Prezidenti İbrahim Rəisi bu ölkədə rəsmi səfərdə olan Azərbaycan müdafiə naziri general-polkovnik Zakir Həsənovun rəhbərlik etdiyi nümayəndə heyətini qəbul edib.
Müdafiə Nazirliyindən verilən məlumata görə, İran Prezidenti İbrahim Rəisi xalqlarımızın əsrlər boyu mehriban qonşuluq şəraitində yaşadığını, Azərbaycan-İran ikitərəfli münasibətlərinin bütün sahələrdə uğurla inkişaf etdiyini bildirib.
Ölkələrimiz arasında əlaqələrin genişləndirilməsi baxımından qarşılıqlı səfərlərin önəmini vurğulayan İran Prezidenti dostluq və qardaşlıq münasibətlərinin qarşıdakı illərdə də uğurla inkişaf edəcəyinə əminliyini ifadə edib.
Qonaqpərvərliyə görə minnətdarlığını bildirən general-polkovnik Z.Həsənov Azərbaycan Prezidenti, Silahlı Qüvvələrin Ali Baş Komandanı İlham Əliyevin salamlarını Prezident İbrahim Rəisiyə çatdırıb.
Müdafiə naziri Silahlı Qüvvələrin Ali Baş Komandanı İlham Əliyevin rəhbərliyi ilə Vətən müharibəsində qələbəmizdən sonra azad edilmiş ərazilərimizdə görülən işlər barədə məlumat verib.
Görüşdə ölkələrimiz arasında ikitərəfli dostluq münasibətlərinin müxtəlif istiqamətlərdə, o cümlədən hərbi əməkdaşlıq sahəsində inkişafından məmnunluq ifadə olunub, qarşılıqlı maraq doğuran digər məsələlərlə bağlı fikir mübadiləsi aparılıb.
Qeyd edək ki, Ermənistan ictimai rəyində son vaxtlar normallaşan İran-Azərbaycan münasibətlərindən ciddi narazılıq ifadə olunur. Xüsusilə də Zakir Həsənovun səfəri erməniləri daha çox narahat etməyə başlayıb. Ermənistanı niyə İranı itirmək xofu basıb?
Politoloq Elşən Mustafayev “Bakı-Xəbər”ə bildirdi ki, Azərbaycanın qonşu ölkələrlə münasibətləri inkişaf edən, yüksələn xətt üzrə davam etməkdədir və bu tendensiya heç də təsadüfi deyil: “Heç şübhəsiz ki, Azərbaycanla İran arasındakı münasibətlərdə yeni səhifə açılır dedikdə, məhz qardaşlıq münasibətlərinin qurulacağına ümid edirik. Ümid edirik ki, əməkdaşlığımız get-gedə daha da dərinləşəcək və təkcə əməkdaşlıq deyil, ölkələrimiz arasında münasibətlər belə qardaşlıq müstəvisində olacaq. İstər tarixi bağlılıq, istər dini birlik, istərsə də səmimi qonşuluq kontekstində buna bizim haqqımız çatır və hər iki ölkə üçün bu, hətta geosiyasi baxımdan belə arzuolunandır.
Ölkəmizin 44 günlük Vətən müharibəsində qazandığı böyük qələbəsi və yaratdığı yeni reallığın region ölkələri tərəfindən qəbul edildiyi günün reallığıdır. Görünən odur ki, Azərbaycanın regionda yaratdığı yeni reallıq qonşu dövlətlər tərəfindən yüksək dəyərləndirilir və bunun da regionda əməkdaşlığa, eləcə də təhlükəsizlik mühitinə töhfə verəcəyi bəllidir. Təbiidir ki, Ermənistan üçün yeganə nəfəslik rolunu oynayan İranı itirmək çox ağırdır. Ancaq nəzərə alınmalıdır ki, böyük ölkələr öz dividentlərini daha çox nəzərə alırlar. Bu baxımdan da, Zakir Həsənovun səfəri və İranın rəhbəri tərəfindən qəbul edilməsi ciddi əməkdaşlıq perspektivindən xəbər verir. Ermənistanın narahatlığı əbəs deyil. Yaxşı olardı ki, yeni reallıqları dərk edib, konstruktiv mövqeyə gəlsin”.
Məhəmmədəli QƏRİBLİ
