Ermənilər Avropa mediasında 1990-cı ilin yanvarında Bakıda “erməni qırğınları”ilə bağlı ağlagəlməz yalanlar uydurmaqda davam edir. Hər il yanvar ayında bununla bağlı uydurma xarakterli məlumatlar müxtəlif media orqanlarında dərc edilir. Fevral ayında isə Sumqayıt hadisələri ilə bağlı bənzər şou təşkil edilir.
Bu dəfə erməni lobbisi öz əlaqələrindən istifadə edərək yunan mediasında bununla bağlı yazıların getməsini təşkil edib. Bu arada Yunanıstan mətbuatında dərc olunan “Cinayətkarların şöhrətlənməsi yeni cinayətkarlar yaradır” başlıqlı məqalədə ağlagəlməyən erməni yalanları dərc olunub. Yazıda qeyd edilir ki, məhz ermənilərin qətlə yetirilməsinə görə Moskva Bakıya qoşun yeritdi: “Human Rights Watch təşkilatının məlumatına görə, 1990-cı il yanvarın 12-dən etibarən 7 gün ərzində dinc ermənilər döyülüb, işgəncələrə məruz qalıb, 100-dən çox insan öldürülüb, 2000-dən çox erməni evi qarət edilib və yandırılıb. Qırğının acı nəticəsi 1988-ci ilə qədər 300 minə yaxın erməninin yaşadığı Bakıdan erməni icmasının tam etnik təmizləməsi oldu. Bu faktlar Azərbaycan hakimiyyəti tərəfindən heç vaxt pislənməyib və hətta günahkarların məsuliyyətə cəlb edilməsi üçün sonradan araşdırılmayıb”.
Görünən odur ki, erməni tərəfi yalanları ilə Avropa cəmiyyətlərini də çaşdırır. Məgər, 1988-ci ilə qədər Bakıda 300 min nəfərə yaxın erməni yaşıyıb? Ermənilər az-çox Qarabağda müəyyən çoxluq təşkil edirdilər.
“Xaricdəki erməni lobbisi bundan öz məkirli məqsədləri üçün istifadə edir”
Məsələyə münasibət bildirən Demokratik Jurnalistlər Liqasının sədri, media eksperti Yadigar Məmmədlinin fikrincə, erməni tərəfinin yaydığı məlumatlar fakta söykənmir: “Həmçinin xaricdəki erməni lobbisi bundan öz məkirli məqsədləri üçün istifadə edir. Söhbət ondan gedir ki, SSRİ-nin çöküşündə milli zəmində törədilən qarşıdurmalar vacib rol oynadı. O zaman Qarabağdakı erməni separatizminə etiraz olaraq Bakıda mitinqlər keçirildi. Daha sonra bu mitinqlər xalq hərəkatına çevrildi. Moskva SSRİ-nin çöküşünü əngəlləmək üçün yanvarın 20-də Bakıda qırğın törətdi. Bu, o vaxt ittifaq miqyasında törədilən ən böyük qanlı hadisə idi. Ancaq bu, SSRİ-nin dağılmasını önləyə bilmədi. Həmin dövrdə də Bakıya ordu yeridiləndə Moskvanın arqumenti bu idi ki, guya erməniləri qırırlar. Halbuki, məsələ belə deyildi. Məqsəd o idi ki, milli azadlıq hərəkatını boğsunlar. O zaman, Rusiya hakimiyyətində ermənilərin mövqeyindən çıxış edənlər belə bir yanlış rəy yaratmışdılar. İndidə ermənilər bundan çıxış edərək həmin “faktları” özlərinə yaxın olan mətbuat orqanlarında dərc edirlər. Başqa bir yalan odur ki, Bakıda həmin vaxt 300 min nəfərə yaxın erməni yaşamayıb. Bu da tamamilə uydurmadır. Bütün bunlar onu göstərir ki, ermənilər öz yalanlarından əl çəkmək fikri yoxdur”.
Bu səbəbdən media eksperti hesab edir ki, Avropa mətbuatında erməni yalanları ifşa edilməlidir.
Vidadi ORDAHALLI
