“Erməni soyqırımının tanınması prosesinin hərəkətverici qüvvəsi həmişə diaspor və diaspor təşkilatları olub”. “Azadlıq” radiosunun yaydığı məlumata görə, bunu yanvarın 24-də keçirdiyi onlayn mətbuat konfransında Ermənistanın baş naziri Nikol Paşinyan bildirib.
Paşinyan “Erməni soyqırımı”nın tanınması məsələsi ilə bağlı suala cavab verməkdən də boyun qaçırıb və bildirib ki, o, bu barədə mövqeyini hökumət proqramında bildirib.
Paşinyanın qondarma “erməni soyqırımı”nın tanıdılmasında erməni diasporunun canfəşanlıq etdiyini, bu işlə onların məşğul olduğunu vurğulaması onu göstərmirmi ki, Ermənistan Türkiyəyə qarşı bu qondarma iddiaya birdəfəlik son qoya bilər?
“...Sözdə “erməni soyqırımı” məsələsində fikir ayrılığı var”
AMEA-nın Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, BAO başqanının Türki Dünyası ilə əlaqələr üzrə müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, Paşinyanın bu bəyanatı Azərbaycan və Türkiyə ilə münasibətləri düzəltməyə yönəlib. O, hesab edir ki, özündən əvvəlki hökumətlərdən fərqli olaraq Paşinyan hökuməti tamamilə başqa bir xətt tutur. “Şübhəsiz ki, Paşinyanın özündən əvvəlki Sarkisyan və Köçəryandan fərqli siyasət yürütməsi hər kəsə məlumdur. Onun bu açıqlamaları verməkdə əsas məqsədi odur ki, artıq Ermənistanın əvvəlki siyasəti yürütmədiyini bəyan etsin. Yəni o bununla göstərmək istəyir ki, Ermənistan hökuməti başqa bir siyasət yeridir. Xüsusən də, Rusiyayönümlü siyasətdən kənara çıxıb bir az da qərbyönümlü siyasət yürütməsini ifadə etmək istəyib. Qondama “erməni soyqırımı” məsələsində də nisbətən fərqli yanaşdığını irəli sürüb. Əslində, sözdə, “erməni soyqırımı” məsələsinin Ermənistan üçün hansı əhəmiyyət daşıması, eyni zamanda Qərb dövlətlərinin, eləcə də Rusiyanın bundan necə istifadə etdiyi məlumdur. Bu baxımdan, Paşiyanın “erməni soyqırımı” məsələsini erməni diasporunun üzərinə yükləməsi təsadüfi deyil. Çünki Paşinyan qondarma “erməni soyqırımı” məsələsinin tanıdılması işinin hərkətverici qüvvəsinin birbaşa diaspor olduğunu bəyan etməklə qonşu dövlətlərlə, xüsusən də Türkiyə ilə münasibətləri düzəltməyə çalışır. Bu onlara da çox qonşularla, Türkiyə ilə münasibətləri normallaşdırma prosesi üçün lazımdır. Paşiniyanın ifadə etmək istədiyi də budur ki, sözdə “erməni soyqırımı”nın Türkiyə qarşısında kəskin şəkildə qoyulması Ermənistandan çox erməni diasporunun işidir, bu daha çox diasporun işinə yarayır”.
F.Ələkbərlinin sözlərinə görə, erməni diasporunun Ermənistan hökuməti və erməni cəmiyyəti ilə yüz faiz eyni düşüncədə olduğunu demək olmaz, üst-üstə düşən tərəflərlə düşməyən tərəflər də var. Çünki Ermənistanda yaşayanların erməni disaporu olmadığını deyən F.Ələkbərlinin bildirdiyinə görə, erməni diasporu müxtəlif xarici ölkələrdə mövcuddur və qondarma “erməni soyqırımı” məsələsi ilə bir növ özlərinin həyatını, yaşayışını təmin edirlər. “Erməni diasporu qondarma “erməni soyqırımı” kartından bir çox anlamlarda istifadə edirlər. Ermənistan hökuməti, erməni cəmiyyəti və erməni diasporu arasında sözdə “erməni soyqırımı” məsələsində fikir ayrılığı var. Amma bu o demək deyil ki, bu məsələdə onların fikirləri tam üst-üstə düşmür. Qondarma “erməni soyqırımı” abidəsinin biri də məhz Ermənistandadır. Hesab edirəm ki, Paşinyanın bu bəyanatı Azərbaycan və Türkiyə ilə münasibətlərin tənzimlənməsi üçün siyasi bir gedişdir, taktikadır. Paşinyan bu məsələni erməni diasporunun üzərinə yıxmaqla heç də Ermənistanın “erməni soyqırımı” iddiasından geri çəkildiyini ifadə etmir. Ancaq dünyaya, eləcədə Azərbaycanla Türkiyəyə göstərmək istəyir ki, “erməni soyqırımı”nı tanıtmaq onların işidir və məhz bu qondarma məsələni Ermənistandan çox diaspor körükləyir. Bütün bunlar onu göstərir ki, Ermənistan rəhbərliyi sözdə “erməni soyqırımı” məsələsini daim gündəmə gətirməkdən ehtiyat edir. Bununla Azərbaycan və Türkiyə ilə münasibətləri normallaşdıra bilməyəcəyini dərk edir. Əgər Azərbaycan və Türkiyə ilə münasibətlər qurmaq istəyirsə onda Ermənistan qondarma “erməni soyqırımı”ndan və əsassız ərazi iddialarından əl çəkib özünü normal dövlət kimi aparmalıdır...”-deyə F.Ələkbərli qeyd etdi.
Onun sözlərinə görə, Paşinyanın belə taktika sərgiləməsinə bəzi qərb dövlətləri də yardım edir.
İradə SARIYEVA
