Bu boyda qərəz olar. Dünən Beynəlxalq Şəffaflıq təşkilatı (Transparency International) dünya üzrə 2021-ci ilin yekunları üzrə korrupsiya hesabatını açıqlayıb. Azərbaycan 100 mümkün baldan 30 bal toplayaraq dünyanın 180 ölkəsi arasında 128-ci ən çox korrupsiyalaşmış ölkə kimi göstərilib. Sıralamada Azərbaycan Cibuti, Toqo, Bolivia, Dominikan Respublikası, Kenya, Laos, Paraqvayla eyni mövqedədir.
Belə ki, Gürcüstan 100 mümkün baldan 55 bal toplayaraq 45-ci, Ermənistan 100 mümkan baldan 49 bal toplayaraq 58-ci, Belarus 100 mümkün baldan 41 bal toplayaraq 82-ci, Qazaxıstan 100 mümkün baldan 37 bal toplayaraq 102-ci, Moldova 100 mümkün baldan 36 bal toplayaraq 105-ci, Ukrayna 100 mümkün baldan 32 bal toplayaraq 122-ci, Rusiya 100 mümkün baldan 29 bal toplayaraq 136-cı olub. Azərbaycan bal kateqoriyasında əvvəlki mövqedə qalsa da sıra sayı 180 ölkə arasında 129-dan 128-ci yerə dəyişib. Gürcüstan bal kateqoriyasını 1 pillə yaxşılaşdırsa da, 1 il əvvəlki yerini saxlayıb. Ermənistan bal kateqoriyasını 6, sıra sayını 2 pillə yaxşılaşdırıb.
Azərbaycana münasibətdə qərəzli yanaşma açıq şəkildə özünü göstərir. Sanki ölkədə bununla bağlı heç bir iş görülməyib. Azərbaycanda aparılan islahatların heçbir nəticəsi yoxdurmu? Bu dərəcədə qərəzli yanaşmanın kökündə nə dayanır?
“Onlar gedib öz pərdəarxası əməllərini və hansı maddi sifarişlər əsasında...”
Sözügedən məsələyə aydınlıq gətirən “SƏS” Media Qrupunun rəhbəri, politoloq Bəhruz Quliyev qərəzli yanaşmanı bir sıra amillərlə əlaqələndirdi: “Bir sıra xarici təşkilatların Azərbaycanın əldə etdiyi uğurlarını, həyata keçirilən çoxşaxəli islahatlarını müxtəlif qərəzli hesabatları ilə kölgədə qoymaq cəhdləri artıq ənənəvi xarakter alıb. Bunda məqsədlərinin də nədən ibarət olduğu çoxdan bəllidir. Bu kimi qərəzli hesabatların arxasında Azərbaycanı qaralamaq niyyəti dayanıb. Əsas məqsəd Azərbaycanın sosial-iqtisadi sahədə əldə etdiyi nailiyyətlərini, regional güc faktoruna çevrilməsini, habelə dünyada bir sıra mühüm təşəbbüslərlə çıxış etməsini zəflətməkdir. Bu əməllərin arxasında erməni lobbisinin dayandığı da kimsəyə sirr deyil. Əslində bu və bu kimi digər bənzər təşkilatların fəaliyyətlərini araşdırarkən onların özlərinin siyasi korrupsiyaya bulaşdıqlarını aşkar etmək olar. Daha dəqiq desək, əgər haqlı, ədalətli mövqelərə qərəz və şər-böhtanlar atılırsa bunun arxasında müəyyən maraqların dayandığını kifayət qədər ehtimal etmək mümkündür. Bu baxımdan, Beynəlxalq Şəffaflıq Təşkilatının sözügedən “hesabatı” əslində heç bir şəffaflığa, demokratik dayaqlara söykənmədiyi xüsusilə vurğulanmalıdır”.
Politoloq hesab edir ki, belə böhtan xarakterli hesabatlara ciddi yanaşmaq olmaz: “Ona görə də düşünmürəm ki, həmin “hesabat” inkişaf və tərəqqi yolunu tutmuş, xalqın sosial rifah halının daha da yaxşılaşdırılması yönündə ardıcıl fəaliyyətlər göstərən Azərbaycana hər hansı bir təsirini göstərsin. Belə böhtançı “hesabatlara” ciddi yanaşma sərgiləməyin tərafdarı deyiləm. Onlar gedib öz pərdəarxası əməllərini və hansı maddi sifarişlər əsasında fəaliyyətlərini araşdırıb sonra digər ölkələr haqqında rəy bildirsinlər. Çünki bu vaxta qədər istər Transparency International olsun, istər Human Rightc Watch olsun, istərsə də Freedom House kimi təşkilatlar olsun – onların heç bir hesabatları Azərbaycanı tutduğu inkişaf və tərəqqi yolundan döndərə bilməyəcək”.
Politoloq onu da əlavə etdi ki, hansısa xarici qüvvə Azərbaycanı müstəqil siyasət yeritməsi yolundan döndərə bilməz.
Vidadi ORDAHALLI
