Ukrayna sərhədinə 100 mindən çox əsgər yığaraq son illərin ən böyük gərginliyini yaradan Rusiya, Avropanın ürəyində yerləşən Kalininqraddan 20 döyüş gəmisini Baltik dənizinə aparıb.
Rusiya ordusunun “Zvezda” televiziyası xəbər verir ki, donanma, o cümlədən yeni nəsil “Stoikiy” və “Soobrazitelnıy” gəmiləri təlim üçün bazalarını təcili tərk ediblər.
Rusiya mətbuatı nəhəng təlimin NATO-nun Şərqi Avropaya qoşun yeritmək qərarından dərhal sonra həyata keçdiyinə diqqət çəkir və bunu alyansa cavab addımı kimi dəyərləndirir.
Rusiya Müdafiə Nazirliyi isə İdil çayı kənarında Engelsdə yerləşdirilən uzaqmənzilli strateji bombardmançı Tu-95-lərin fotolarını paylaşıb. Engelsdəki aviabaza Ukrayna sərhədindən təxminən 470 kilometr məsafədə yerləşir.
Rusiya ordusu ölkənin cənubunda Ukrayna yaxınlığında və Moskvanın ilhaq etdiyi Krımda da hərbi təlimlərə başlayıb. Müdafiə Nazirliyinin yaydığı açıqlamada, təlimlərdə 6 min əsgər və ən azı 60 döyüş təyyarəsinin iştirak etdiyi bildirilir.
Rusiya Müdafiə Nazirliyi bildirib ki, Rusiya donanması yanvar və fevral aylarında “məsul olduğu” bütün bölgələrdə ardıcıl hərbi təlimlər keçirəcək. Artıq 20-dən çox rus döyüş gəmisi təlim üçün Qara dənizə gəlib.
Rusiya hərbi təlimlər üçün Belarusa Su-35 döyüş təyyarələri göndərib.
Qərb cəbhəsində isə həm diplomatiya, həm də hərbi hərəkətlilik daha da artıb. NATO dörd ölkənin öz döyüş gəmilərini və reaktiv təyyarələrini bölgəyə göndərəcəyini təsdiqləyib. Buna uyğun olaraq Hollandiya ordusu Bolqarıstana iki F-35 təyyarəsi endirəcək. İspaniya həmçinin Bolqarıstana döyüş təyyarələri, Qara dənizə isə hərbi gəmilər göndərəcək. Danimarka Baltik dənizinə bir freqat, Litvayaya isə dörd F-16 göndərəcək. Fransanın isə Rumıniyaya qoşun göndərəcəyi gözlənilir.
8500 ABŞ əsgəri yüksək hazırlıq vəziyyətinə gətirildi
Bu arada, ABŞ Müdafiə Nazirliyi (Pentaqon) Ukrayna ətrafında gözlənilməz vəziyyətlə əlaqədar NATO Çevik Müdaxilə Qüvvələri hərəkətə keçəcəyi təqdirdə dəstək üçün 8500 əsgərin yüksək hazırlıq vəziyyətinə gətirildiyini açıqlayıb.
Pentaqonun sözçüsü Con Kirbi bəyan edib ki, NATO çağırarsa, 8500 əsgər alyansın çevik müdafiə qüvvələrinə qoşulmaq üçün hazır vəziyyətdə olacaq. ABŞ-ın müdafiə naziri Lloyd Austin isə bir qrup əsgərə digər fövqəladə hallara hazır olmaq göstərişi verib, lakin sözçüsü Kirbi bu əsgərlərin sayını açıqlamayıb.
Pentaqona görə, Rusiyanın hazırda gərginliyi azaltmaq niyyəti yoxdur.
Qeyd edək ki, NATO Çevik Müdaxilə Qüvvələrini yüksək hazırlıqlı və texnoloji cəhətdən inkişaf etmiş çoxmillətli quru, hava, dəniz və xüsusi əməliyyat qüvvələrindən ibarətdir. Xidmətə hazırlaşmaq üçün əmr alan qoşunlar əlavə briqada döyüş ekipajları, maddi-texniki təchizat personalı, tibbi təminat, aviasiya dəstəyi, kəşfiyyat, müşahidə missiyaları üzrə qüvvələrdən ibarətdir. Alyansın Estoniya, Litva, Latviya və Polşada tanklar, hava hücumundan müdafiə sistemləri, kəşfiyyat və müşahidə sistemləri ilə təchiz edilmiş 4 minlik qoşunu var.
Bayden Ukraynaya əsgər göndərmək istəmir...
Ağ Ev isə Vaşinqtonun bütün ssenarilər üzrə hərbi planlar hazırladığını bəyan edib. Ancaq bununla belə Bayden administrasiyası dəstək üçün Ukraynaya əsgər göndərmək niyyətində deyil. Ağ Evin sözçüsü Cen Psaki ABŞ-ın hər cür ssenariyə hazır olduğunu deyib: "Seçdiyimiz yol diplomatiyadır, lakin sərhəd bölgəsində hərəkətliliyin artdığını görürük".
Baydenin diqqətinin NATO-nun şərq cinahında olduğunu vurğulayan Psaki, onun Ukraynaya qoşun göndərmək niyyəti və ya istəyində olmadığını deyib.
NATO-nun baş katibi Yens Stoltenberq də bəyan edib ki, alyans Ukraynaya əsgər göndərməyəcək: “Lakin biz hazır olduğumuza və bütün müttəfiqləri, xüsusən də alyansın şərqində müdafiə öhdəliyimizlə bağlı anlaşılmazlıqların olmamasına əmin olmalıyıq".
Consondan Putinə xəbərdarlıq - bir çox rus ananın oğlu evə dönə bilməyəcək
Britaniyanın baş naziri Boris Conson da Rusiya Ukraynaya təcavüz edərsə, Avropadakı müttəfiqlərini qorumaq üçün NATO-ya dəstək verəcəklərini bəyan edib. Britaniya ordusunun 2015-ci ildən bəri 21 min Ukrayna əsgərinə təlim keçdiyini deyən Conson Rusiya prezidenti Vladimir Putinə xəbərdarlıq edib: "Rusiya Ukraynaya hücum edəcəyi təqdirdə baş verəcək faciə haqqında düşünəndə ürpəşirəm. Ukraynalıların öz ölkələrini müdafiə etmək üçün qanuni hüquqları var. Onların müqaviməti Çeçenistanda, Bosniyada və ya Avropanın 1945-ci ildən bəri dözdüyü istənilən münaqişəyə bənzər şəkildə inadkar və qanlı olacağına inanıram...
Əgər Putin qan tökmək yolunu seçsə, ukraynalılar şiddətlə müqavimət göstərəcəklər. Tarix bunu göstərir. 2014-cü ildə öz ölkələrini müdafiə etməyə çalışan ukraynalılar daha güclü döyüş qabiliyyəti ilə döyüşmək əzmində olacaqlar. Əgər Rusiya bu yolu seçsə, bir çox rus ananın oğlu evə dönə bilməyəcək".
Conson həmçinin vurğulayıb ki, Britaniya və müttəfiqləri Rusiyaya “ağır iqtisadi sanksiyalar”la cavab verəcəklər. O, deyib ki, Böyük Britaniya aylardır ABŞ və onun avropalı müttəfiqləri ilə sanksiyalar vasitəsilə müharibənin qarşısını almaq üçün işləyir. Conson deyib ki, o və ABŞ, Fransa, Almaniya, İtaliya, Polşa və Aİ liderləri Rusiyaya qarşı əvvəlki sanksiyalardan daha ağır, əlaqələndirilmiş və sərt iqtisadi sanksiyalar tətbiq edəcəkləri barədə razılığa gəliblər.
Qeyd edək ki, ABŞ-ı Ukraynadakı diplomatların ailələrini və bəzi işçilərin bu ölkədən çıxarmaq barədə qərar qəbul edib. ABŞ-ın ardından Böyük Britaniya və Hollandiya Kiyev səfirliyindəki işçilərini yarıya qədər ixtisar edir.
Kanada hökuməti də Ukraynada xidmət edən diplomatik heyətin ailə üzvlərini geri çağıracaq. "Rusiyanın Ukraynada və onun ətrafında davam edən hərbi hərəkətliliklə əlaqədar olaraq, biz Kanada səfirliyinin əməkdaşlarının ailə üzvlərini müvəqqəti olaraq ölkədən çıxarmaq qərarına gəldik. Ukraynanın Kanadadakı və Kiyevdəki səfirliyinin rəsmiləri vəziyyəti yaxından izləməyə davam edəcəklər" deyə bu barədə rəsmi bəyanatda bildirilir.
Tahir TAĞIYEV
