Gec-tez separatçıların çirkin əməllərinə, təxribatlarına son qoyulacaq. Bu şübhəsizdir və bunu separatçıbaşı Araik Artunyunyan da, separatçı dəstənin üzvləri də, terrorçu keşişləri də yaxşı bilirlər. Odur ki, “qorunmaq” üçün tez-tez monofizit-qriqorian kilsəsinin “müqəddəs su”yu ilə “xaçlanırlar”.
Son günlər sosial şəbəkələrdə, erməni Teleqram kanallarında yayılan fotolarda aşkar əks olunub ki, separatçıların keşişiləri “hərbi hissələr”ə qazan-qazan “müqəddəs su” gətirib separatçıları “xaçlayır” ki, onlar “toxunulmaz” olsunlar. Onların əli hər yerindən üzülüb indi də ümidlərini keşişlərinə və onların gətirdikləri qazan-qazan “müqəddəs su” ya bağlayıblar... Diqqət çəkən məqamlardan biri odur ki, “hərbiçilər” monofizit-qriqorian xaçları ilə faşist əlaltısı Qaregin Njdenin şəkili önündə xaçlanırlar. Yadınıza gəlirsə, Vətən müharibəsinin gedişində separatçılar Aşot Yerkatın “xaç”ını da Xankəndiyə aparmışdılar ki, onları “qorusun”. O vaxt onlar düşünürdülər ki, qaçan ordunun əvəzinə Xankəndini Aşot Yerkatın “xaç”ı qoruyacaq (?)... İndi də “müqəddəs su” ilə bu şounu göstərirlər. Onlar yenə də reallıqdan uzaq hərəkət edib uydurduqları miflərə inanırlar, amma bu onları qoruya bilməz, onlar separatçılıqdan əl çəkib digər Azərbaycan vətəndaşları kimi normal yaşamalıdır.
“Onların çarəsi “müqəddəs su” deyil, separatçılıqdan əl çəkib Azərbaycan vətəndaşlığını qəbul etməkdir və digər vətəndaşlarımız kimi yaşamaqdır”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev bildirdi ki, ermənilərin gerçək tarixi olmadığı üçün onlar hər zaman bu cür uydurmalarla öz başlarını qatmağa çalışırlar. “Bilirsiz ki, separatçılar Qarabağa hansısa “müqəddəs qılınc” gətirmişdilər. Deyirdilər ki, bu qılınc guya onları qoruyacaq, bu “torpaqda qalmaqlarına” kömək edəcək. Ardınca da Aşot Yerkatın “xaç”ının “surət”ini gətirdilər. Amma nə “müqəddəs qılınc”ın, nə Aşot Yerkatın “xaç”ının surətinin onlara bir xeyri oldu. İndi də separatçıların əlləri hər yerdən üzüldüyü üçün “müqəddəs su”dan mədət umurlar. Özlərini dünyaya “ağzıbir”, “əməli bir”, “mütəşəkkil, həmrəy” bir toplum kimi təqdim edən hayların indi indi iç üzləri açılır. Bu “müqəddəs su” “ayini” də, kütləvi “xaçlanma” da bir oyundur, bunu məqsədli şəkildə edirlər ki, guya onlar burada xristinanlığı qoruyurlar və sair. Separatçılar o qədər məkrli və hiyləgərdilər ki, onlardan hər cür təxribat gözləmək olar. Təsəvvür edin ki, separatçıları Njdenin şəkili önündə “xaçlayan” keşişlərin özü keşiş cübbəsinə bürünmüş terrorçulardır. Onlar hər iki müharibədə keşiş paltarını soyunub əllərinə avtomat almışdılar. Bəziləri kəşfiyyatla məşğul olur. Erməni keşişləri hər cür dona girirlər. Bir məqamı da deyim ki, XX əsrin əvvəllərində Qriqoryan kilsəsi erməni “dövlət”ini əvəz etmək iddiasında idi, edirdi də. Bütün bunların hamısı eyni çirkin məqsədə xidmət edirlər. “Hərbi hissə”dən faşist Njdenin şəkilini asıblar, başqa bir tərəfdə başqa işlər görürlər”.
Q.Hacıyev hesab edir ki, separatçıların bu cür “mərasimləri” yalnız özlərini aldatmağa xidmət edir. Separatçıların Njdeni, Dronu, Androniki və başqa separatçı şəxsləri özlərinə rəhbər görməklə çox səhv yolda olduqlarını sübut edir, onları “qəhrəman” kimi təqdim etməklə öz istəklərinə nail olmaq istəyirlər. “Erməniləri başqa dövlətlər idarə edəndə onlar birləşə bilirlər, amma birlikləri öz ümidlərinə qalanda biabırçı şəkilə düşürlər. Artıq separatçılara dəstək verənlərin sırası çox seyrəlib, diaspor da daha əvvəlki kimi onlara dayaq durmir. Çox yerdən köməkləti kəsildiyi üçün separatçılar mifik “müqəddəs su”dan əlac gözləyirlər. Terrorçu keşişlərin “müqəddəs su” duası da, Aşot Yerkatın “xaç”ı kimi separatçıların dadına çatmayacaq. Onların çarəsi “müqəddəs su” deyil, separatçılıqdan əl çəkib Azərbaycan vətəndaşlığını qəbul etməkdir və digər vətəndaşlarımız kimi yaşamaqdır. Nə qədər ki, ümidlərini mifik nəsnələrə bağlayacaqlar, bir o qədər də uduzacaqlar”-deyə Q.Hacıyev bildirdi.
İradə SARIYEVA
