Azərbaycançılıq ideologiyası dünya azərbaycanlılarının vahid ideya ətrafında birləşməsini şərtləndirən tarixi-siyasi amillərin təsnifatını, xaricdə yaşayan soydaşlarımızın hüquq və azadlıqlarının qorunması sahəsində dövlətin qarşısında duran vəzifələri, onların Azərbaycana münasibətdə üzərinə düşən mənəvi öhdəlikləri, habelə azərbaycanlı anlayışının sosial-fəlsəfi məzmununu müəyyənləşdirən konsepsiyadır. Azərbaycançılıq millətindən asılı olmayaraq, özünü azərbaycanlı sayan vətəndaşların həmrəyliyi üçün möhkəm istinad mənbəyi, ideoloji bünövrədir.
Azərbaycan 30 ildir müstəqildir. Müstəqillik əldə edildikdən sonrakı dövrdə müxtəlif siyasi, iqtisadi, sosial hadisələr baş verib. Bir sıra çətin və mürəkkəb məqamlar olub. Ancaq ən əsası odur ki, ötən illər ərzində azərbaycançılıq ideologiyası bizi birləşdirən əsas dəyər olub. Azərbaycanda etnik mənsubiyyətindən asılı olmayaraq hamı bu ideya ətrafında birləşib. Hər zaman olduğu kimi bu gün də azərbaycançılıq ideyasının gənclər arasında təbliği aparılır. Gənc nəsil ged-gedə bu ideologiyanın önəmini daha çox anlamağa başlayır.
Ötən il Azərbaycan üçün çox böyük əhəmiyyət kəsb edən iki böyük hadisə ilə yadda qaldı. Bunlardan biri Azərbaycanın dövlət müstəqilliyinin bərpasının 30-cu ili ilə bağlı oldu. Oktyabrın 18-də müstəqilliyin bərpasının 30 ili tamam oldu. İkinci önəmli hadisə isə işğaldakı torpaqlarımızın azad edilməsinin 1-ci ildönümü ilə əlaqədar oldu. Ən önəmli məqam o oldu ki, müstəqilliyin 30-cu ili qeyd edilərkən artıq bir il idi ki, ərazilərimiz işğaldan azad edilmişdi. Müstəqillik tarixində bu, olduqca önəmli hadisə idi. Həm dövlət müstəqilliymizin əldə olunması və möhkəmlənməsində, həm də işğaldakı ərazilərimizin azad olunmasında azərbaycançılıq ideologiayasının çox böyük rolu olduğu bəllidir. Ulu öndər Heydər Əliyevin müəllifi olduğu azərbaycançılıq ideologiyası Azərbaycanda yaşayan, onu vətən bilən bütün fərdləri birləşdirən ideologiyadır. Azərbaycançılıq milli məfkurədir. Azərbaycançılığın dövlətçiliyə tətbiqi ölkənin bütün istiqamətlərdə möhkəmlənməsinin təməlində dayanan mühüm faktordur. Heydər Əliyev konstitusiyamızda ilk dəfə bunu nəzərə aldı. Dünya azərbaycanlılarının qurultayında məşhur deyim olan “Mən fəxr edirəm ki, azərbaycanlıyam” ifadəsini işlətdi və qeyd etdi ki, hər bir insan üçün milli mənsubiyyəti onun qürur mənbəyidir, müstəqil Azərbaycan dövlətinin əsas ideyası azərbaycançılıqdır. Hər bir azərbaycanlı öz milli mənsubiyyətinə görə qürur hissi keçirməlidir və biz azərbaycançılığı - Azərbaycan dilini, mədəniyyətini, milli-mənəvi dəyərlərini, adət-ənənələrini yaşatmalıyıq. Azərbaycançılıq ideologiyası cəmiyyətə təqdim edilən universal dəyərlər sistemidir. Eyni zamanda azərbaycançılıq ideologiyası Azərbaycan cəmiyyətinin bütün təbəqələrində qəbul edilən, mənimsənilən və həyat tərzinə çevrilən bir ideoloji xətdir. Azərbaycançılıq bizim həm dövlət, həm də milli ideologiyamızdır. Təsadüfən deyilməyib ki, ideologiya vətən haqqında vahid elmi sistemdir. Ona görə də bizim bugünkü dövlətçiliyimizin atributları Azərbaycanın bayrağı, gerbi, himni, pulu və konstitusiyası məhz azərbaycançılığa əsaslanır.
“Azərbaycançılıq ideyasının güclü və sağlam dəyər olduğu Vətən müharibəsində bir daha sübut olundu”
Sözügedən məsələ ilə bağlı fikirlərini “Bakı-Xəbər”lə bölüşən İrəvan Azadlıq Təşkilatının sədri Təbriz Musayevin fikrincə, azərbaycançılıq ideyasının güclü və sağlam dəyər olduğu Vətən müharibəsində bir daha sübut olundu: “Etnik mənsubiyətindən asılı olmayaraq hamı bir yumruq kimi prezidentin ətrafında birləşdi. Bu da xalqın ərazi bütövlüyü uğrunda ayağa qalxmasına gətirib çıxardı. Nəticədə 30 ilə yaxın Ermənistanın işğalında olan torpaqlarımız azad edildi. Uzun illər bizi əzən utancdan xilas olduq. Bütün bunların təməlində heç şübhəsiz ki, azərbaycançılıq ideologiyası, bu ideologiyanın dövlətin milli siyasətinə çevrilməsi durur. 44 günlük Vətən müharibəsi göstərdi ki, ölkədə xalq-iqtidar, xalq-ordu birliyinin kökündə də məhz elə azərbaycançılıq ideologiyası dayanır. Bütün bunların sayəsində düşmənə güclü zərbələr endirildi”.
“İdeologiyanın təməlləri sağlam və möhkəm olduğu üçün düşmənin planları fiaskoya uğradı”
İAT sədri qeyd tdi ki, müharibə vaxtı Ermənistan tərəfi Azərbaycan xalqını parçalamaq üçün müxtəlif pozucu təbliğat vasitələrindən istifadə edirdi: “Azərbaycanda yaşayan etniklərə müraciətlər edirdilər ki, müharibəyə getməyin. Müxtəlif televiziya, internet resuslarında bununla bağlı kampaniyalar aparırdılar. Erməni tərəfi elə hesab edirdi ki, bu kimi vasitələrlə Azərbaycanda mövcud olan milli birliyi sarsıdacaqlar. Ancaq bütün bunların tam əksinə olaraq ölkədə xalqın birliyi daha da möhkəmləndi. Əzəli düşmənimiz olan ermənilərə olan nifrət daha da artdı. Azərbaycançılıq ideologiyasının təməlləri sağlam və möhkəm olduğu üçün düşmənin planları fiaskoya uğradı”.
“Bu millətin birliyi təbii əsaslara söykəndiyi üçün sarsılmazdır”
Müsahibimiz onu da əlavə etdi ki, azərbaycançılıq müstəqillik dönəmində hər zaman birləşdirici rol oynayıb: “Məsələ ondadır ki, ermənilər xaric Azərbaycanda yaşayan digər xalqların nümayəndələri hər zaman mehriban birgəyaşayışa önəm veriblər. Bu dövlətin vətəndaşı olaraq ölkənin inkişafına töhvə veriblər. Bununla bağlı çalışıblar. Çünki tarixən mehriban yaşayıblar. Ona görə də bu millətin birliyi təbii əsaslara söykəndiyi üçün sarsılmazdır. Bu, dünya durduqca belə olacaq”.
Vidadi ORDAHALLI Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
