Bir müddət əvvəl Ermənistan hökumətinin Qarabağdakı separatçılara maliyə yardımını dayandıracağı haqda rəsmi məlumatlar yayılsa, ermənilərin hər sözü kimi bu da yalan çıxdı.
Görsənən odur ki, Ermənistan hökuməti “nə yardan doyur, nə əldən qoyur”, yəni Nikol Paşinyan nə separatçıbaşı Araik Artunyunyandan nə əl çəkir, nə də birdəfəlik onu rədd edir. Bəzən aşkar, bəzən də gizli şəkildə separatçıları “yemləyən” Paşinyan hökumətinin separatçılara yardım ayıracağı haqda məlumatlar yayılıb. Teleqram kanalında yayılan xəbərlərə görə, Ermənistan hökuməti 2022-cu ildə Qarabağ separatçıları və terrorçularına 290 milyon dollar pul ayıracaq. Məlumatlara görə, bu barədə Paşinyan Qarabağ quldurlarının başçısı Araik Arutyunyanla görüşü zamanı qərar verib. Deyilənə görə, Ermənistanın separatçılara ayırdığı pul vəsaiti Barada - Xankəndi subkəmərininin və Barada su anbarının inşasına, eləcə də digər layihələrə yönələcək. Onlar həmçinin evlərin, infrastrukturların tikintisi və Qarabağin sosial problemləri barədə müzakirə edib.
Paşinyan bir tərəfdən deyir ki, Azərbaycanla sülh sazişi imzalamaq istəyirik, Azərbaycanın ərazisi bütöv, sərhədləri toxunulmazdır, o biri tərəfdən müvəqqəti olaraq Rusiya sülhməramlılarının nəzarətində olan ərazilərimizdəki sepratçılara pul ayırır. Bunu necə anlamaq olar? Ermənistan hansı əsasla Azərbaycanın Qarabağına 290 milyon dollar pul ayırır?
Rövşən Rəsulov: “Ermənistan rəhbərliyi Azərbaycanın səbr kasasını doldurur və eyni zamanda, bu qanunsuzluqların qarşısının alınması...”
Siyasi ekspert Rövşən Rəsulov “Bakı-Xəbər”ə şərhində bildirdi ki, Ermənistanın siyasi rəhbərliyinin bu davranışı açıq-aşkar Azərbaycanın səbr kasasının daşmasına xidmət edir: “Nikol Paşinyanın İrəvanda Qarabağ separatçılarının quldurbaşısı Araik Arutynunyanla görüşməsi və ona Ermənistanın büdcəsindən 290 milyon pul ayırması göstərir ki, artıq Ermənistan rəhbərliyi Azərbaycanın səbr kasasını doldurur və eyni zamanda, bu qanunsuzluqların qarşısının alınması üçün Bakı ciddi tədbirlərə əl atmalıdır. Artıq nə vaxt 2020-ci ilin sentyabrına qədərki vaxtıdır, nə də regiondakı mövcud proseslər illər əvvəl burada cərəyan edən proseslərlə eynilik təşkil etmir. Yəqin Nikol Paşinyan və terrorçu Araik unudublar ki, 2020-ci ilin noyabrında Azərbaycan əsgəri Xankəndinin həndəvərində dayanmışdılar və saxta, qondarma “respublikada” beş-on nəfər adamdan başqa kimsə qalmamışdı. Məhz bu baxımdan qeyd etmək istərdim ki, səbr kasası dolmağa başlayıb və onlara öz yerlərini göstərməyin tam zamanıdır. Nə Rusiya sülhməramlılarının oradakı qeyri-qənaətbəxş fəaliyyətləri, nə də digər faktorlar Bakının bu məsələlərə birdəfəlik son qoymasını əngəlləyə bilməz. Sizi inandırım ki, düşmənin ayağı yer aldıqca o daha da həyasızlaşacaq və biz bu kimi məlumatları da tez-tez oxumalı, istər-istəməz əsəb, stres keçirməli olacağıq. Mən burada cənab Prezidentimizin ölkə jurnalistlərinə verdiyi müsahibədə bir ifadəsini xatırlatmaq istərdim. Dövlətimizin başçısı Ermənistanla sülh sazişi və sərhədlərin delimitasiyası ilə bağlı sualları cavablandırarkən birbaşa Nikol Paşinyana, bütövlükdə isə Ermənistanın siyasi dairələrinə etibar etmədiklərini açıq şəkildə bəyan etdi. Həmçinin xatırlatdı ki, belə davam edə bilməz. Bu kontekstdən çıxış edərək qənaətə gələ bilərik ki, artıq belə davam etməyəcək və bir gün, özü də ümid edək ki, tez bir zamanda, düşmən ölkənin qıcıqlandırıcı hərəkətlərinə, eləcə də separatçıların həyasızlıqlarına tərəf dəmir yumruq endiriləcək”.
R.Rəsulovun sözlərinə görə, 44 günlük savaşın üzərindən xeyli müddət keçib və ötən müddət ərzində bir neçə dəfə görüşlər baş tutub. “Lakin demək olar ki, üçtərəfli bəyanatdakı bəndlər yalnız birtərəfli qaydada yerinə yetirilir, yəni Azərbaycan üzərinə götürdüyü öhdəlikləri tam şəkildə icra edir. Ermənistan isə bildiyimiz kimi hələ də müxtəlif bəhanələrlə prosesi uzadır. Halbuki, Rusiya sülhməramlılarının Qarabağa, məsul olduqları bölgələrə daxil olmaları ilə paralel şəkildə oradakı bütün qanunsuz silahlı birləşmələr çıxarılmalı idi. Ancaq biz bütün bunların yerinə Ermənistanın separatçı-quldur rejimə vəsaitlər ayırdığını müşahidə edirik. Bu halda, bayaq da qeyd etdiyim kimi, məsələni köklü şəkildə həll etməyin vacibliyi faktoru ortaya çıxır və ümid edirik ki, belə də olacaq. Qarabağ iqtisadi regionu bilavastə Azərbaycanın maliyyəsi hesabına dirçəldilir və Xankəndi də buraya daxildir. Əgər Ermənistan yenə burnunu ölkəmizin daxili işlərinə soxacaqsa, bu zaman həmin burnun növbəti dəfə və birdəfəlik qırılmasının vaxtı çoxdan çatıb” - deyə R.Rəsulov qeyd etdi.
Şakir Ağayev: “Ermənist hökumətinin bu hərəkəti heç bir məntiqə sığmır”
“Novaya vremya” qəzetinin baş redaktoru Şakir Ağayev də bizimlə söhbətində bunu Ermənistanın Azərbaycanın daxili işlərinə müdaxilə kimi dəyərləndirdi. “Belə bir məlumatlar var ki, Ermənistan büdcəsindən Azərbaycan ərazisinə, Qarabağ iqtisadi zonasına aid olan Xankəndinə qanunsuz olaraq 290 milyon dollar ayrılacaq...Ümumiyyətlə, Ermənist hökumətinin bu hərəkəti heç bir məntiqə sığmır. Bura Azərbaycan ərazisidir. Azərbaycan ərazisindəki separatçılara qanunsuz maliyə yardımı ayırmaqdansa Paşinyan yaxşı olar ki, demorkasiya və delimitasiya işləri ilə məşğul olsun, Azərbaycanla sülh sazişi imzalasın. Ermənistandan qat-qat varlı olan və daha çox maliyə imkanlarına malik olan Azərbaycan dövləti özü öz ərazisində yaşayan ermənilərin sosial-iqtisadi durumunun yaxşılaşmasını həyata keçirəcək, bu məsələyə milyardlarla vəsait ayıracaq. Buna görə Ermənistan narahat olmasın və separatçılara kömək etməsin. O bölgə Azərbaycanın digər əraziləri kimi dövlət büdcəsindən ayrılan vəsait hesabına inkişaf etməlidir. Çox təəssüflər olsun ki, Ermənistan hələ sülh müqaviləsi imzalamağa doğru hərəkət etmir, ən azından öz əhalisinin durumunu nəzərə alıb bunu etməli idi. Əgər Paşinyan Qarabağda yaşayan erməniləri düşünürsə, onların sosial-iqtisadi vəziyyətinə görə narahat olursa sülh müqaviləsi bağlayardı və Qarabağdakı ermənilər Azərbaycan vətəndaşları kimi daha firavan yaşayardılar. Paşinyan görüntü yaratmaq naminə büdcədən Qarabağ separatçılarına pul ayrılacağını deməkdənsə, yaxşı olar ki, həmin vəsaiti çox ağır durumda olan Ermənistan vətəndaşlarının, əhalisinin sosial-iqtisadi vəziyyətini düzəltməyə yönəltsin” - deyə Ş.Ağayev qeyd etdi.
Ş.Ağayev deyir ki, Paşinyan separatçılara jest etməklə “biz sizi unutmamışıq deyir, bu da birbaşa erməni xislətindən irəli gəlir” və sair. O, hesab edir ki, Paşinyanın Araiklə görüşməsi və orada Ermənistan büdcəsindən separatçılara pul ayrılacağını deməsi sırf daxili auditoriyaya hesablanıb. Bütün hallarda, bunun qəbuledilməz olduğunu deyən Ş.Ağayevin sözlərinə görə, Ermənistanın Baş naziri ikiüzlülük edir.
İradə SARIYEVA
