Erməni kilsəsi kin və düşmənçilik toxumu səpməkdə davam edir. Yanvarın 23-də Yepiskop Tat Akopyanın sədrliyi ilə Rumıniyanın paytaxtı Buxarestdəki Müqəddəs Baş Mələklər Kafedralında əsasən din xadimlərinin iştirakı ilə keçirilən mərasimdə Azərbaycan və Türkiyənin ünvanına ittihamlar səsləndirilib.
Mərasimdə din xadimlərinə yaraşmayan siyasi məzmunlu qızışdırıcı xarakterli fikirlər səsləndirilib. Qeyd edilib ki, guya 32 il əvvəl Bakıda ermənilər kütləvi şəkildə qırğına məruz qalıb: “Hrant Dink bütün tribunalardan “Erməni soyqırımı”nı tanımağı, tarixi reallığı inkar etməməyi, mənfi mövqedə olan Gənc Türk və Osmanlı hakimiyyətinin şəriki olmamağı tələb edən parlaq şəxsiyyət idi. Müasir Türkiyə hakimiyyəti isə problemi həll etmək üçün başqa bir yol seçdi. Onu öldürərək susdurdu. Amma bu siyasi və ideoloji qətl Türkiyə hakimiyyətindən fərqli olaraq əks effekt verdi. 1990-cı ilin yanvarın 13-19-da Bakıda qətliam baş verdi - dəhşətli qətllər və erməni ailələrinin deportasiyası, bunu mütləq soyqırım adlandırmaq olar. Bu dəhşətli qətliamı dünyaya xatırlayaraq, bunu edənləri qınamağa çağırırıq”.
Görünən odur ki, erməni din xadimləri var gücü ilə Türkiyə və Azərbaycana qarşı dünya ölkələrində iyrənc təbliğat kampaniyası aparırlar.
“Erməni din xadimləri tarixən dinlərarası və millətlərarası ədavəti qızışdırmaqla məşğul olublar”
Məsələyə münasibət bildirən şərqşünas Seyid Camal Əzimbəylinin fikrincə, erməni din xadimləri tarixən dinlərarası və millətlərarası ədavəti qızışdırmaqla məşğul olublar: “Bu da həmin siyasətin tərkib hissəsidir. Məgər elə bir hal baş veribmi ki, erməni katalikosu başda olmaqla onların digər din xadimləri sülh çağrışı ilə çıxış etsinlər? Əksinə, hər fürsətdə insanları zəhərləyiblər. Hər yerdə müxtəlif formada türklərə qarşı düşmənçiliyi körükləyiblər. Çünki bunların mayası düşmənçilik, kinlə yoğrulub. Türkləri qətl edən bu məxluqlar özlərini əzilmiş bir millət kimi təqdim etməyə çalışırlar. O vaxt Azərbaycan dinc erməniləri qorumaq üçün nə mümkündürsə onu edib. Bakıda guya erməni qırğınlarının baş verməsi ilə bağlı deyilənlər həqiqətdən uzaqdır. 1988-ci ildə baş verən hadisələrdən sonra soydaşlarımız Ermənistandan qovuldu. 1988-1989-cu illərdə 200-dən çox dinc azərbaycanlı Ermənistanda qətlə yetirildi. Daha sonra Qarabağda azərbaycanlılara divan tutuldu. Erməni kilsəsinin hər zaman millətlərarası ədavətin qızışdırılmasında xüsusi rolu olub. Ona görə də erməni din xadimləri öz cinayətlərindən danışsalar yaxşıdı”.
Şərqşünas onu da qeyd etdi ki, kimin-kim olduğunu dünya yaxşı bilir.
Vidadi ORDAHALLI
