Ermənistan prezidenti Armen Sarkisyan istefa verib. Onun səlahiyyətlərini Alen Simonyan icra edəcək.
Bu barədə prezidentin rəsmi saytında məlumat dərc olunub: "Mən çox düşündüm, dörd il fəal işlədikdən sonra respublika prezidenti vəzifəsindən getmək qərarına gəldim”.
Sarkisyanın sözlərinə görə, bu qərar onun ölkənin daxili və xarici siyasətinə təsir etmək üçün lazımi alətlərə malik olmaması ilə bağlıdır.
Onun fikrincə, Ermənistan "məzmunca deyil, yalnız formal olaraq prezident respublikasıdır”.
Ermənistan Konstitusiyasına görə, prezident vakansiyasının yaranmasından ən azı 25 gün sonra, 35 gündən gec olmayaraq prezident seçkisi keçirilməlidir.
Yeni prezident seçilənə qədər onun vəzifələrini parlamentin spikeri yerinə yetirir. Hazırda Ermənistan parlamentinin spikeri Alen Simonyandır.
Ermənistanda baş verən bu hadisəyə Rusiyadan maraqlı şərh verilib. Rusiya Dumasının MDB və Avrasiya ölkələri inteqrasiya komissiyasının sədr müavini Viktor Vodolaçkiy bildirib ki, bu istefanın Rusiya ilə Ermənistanın arasında olan münasibətlərə heç bir təsiri olmayacaq: “Çox güman ki, prezident ölkənin daxilində baş verən və ya baş verməsi nəzərdə tutulan proseslərlə razı olmadığı üçün bu addımı atıb”.
Rusiyadan verilən bu şərhdə maraqlı məqam var. Ermənistanda nələrin baş verdiyi hamıya məlumdur. Onda isə sual olunur: bəs baş verməyənlər deyəndə rusiyalı parlamentari nəyi nəzərdə tutur?
Politoloq Qorxmaz İbrahimli “Bakı-Xəbər”ə açıqlamasında bildirdi ki, bu yaxınlarda Qazaxıstanda baş verənlər hamımıza ibrət oldu: “Gözlənilən hadisə, gözləmədiyimiz yerdən alovlandı. Rusiya Cənubi Qafqazda özünün yeni siyasətinə başlayıb. Bunun da əsas tərkib hissəsi Ermənistanda möhkəmlənmək niyyətilə bağlıdır. Sonra da həmin planı başqa yerlərə ixrac edəcək. Məsələnin kökündə duran amil budur. Ermənistan prezidenti təbiət etibarı ilə Qərbə yaxın sayılır. Bu səbəbdən də Rusiyanın avantürasında məsuliyyət məsələsini bölüşmək istəmir. Prezidentin istefasını sərhədlərin dəqiqləşməsi prosesi ilə əlaqələndirənlər də az deyil. Mən düşünmürəm ki, bu amilin rolu böyükdür. Düzdür, Ermənistanın siyasi elitasının bu mövzuda fikirləri tam üst-üst düşmür. Ancaq böyük əksəriyyət anlayır ki, bu məsələnin həll edilməsi onların özü üçün çox vacibdir. Xüsusilə də xaricdəki erməni diasporu yavaş-yavaş buzların əriməsinin tərəfdarıdır. Sərhədlə bağlı prosesin uzanmasında Rusiyanın özünün də rolu var. Sarkisyanın istefası birbaşa Rusiyanın təzyiqlərinə etiraz mahiyyətini daşıyır. Armen Sarkisyan revanşistlərlə əks-qütbdə dayanan adamdır”.
Məhəmmədəli QƏRİBLİ
