Yanvar ayının 19-da Prezident İlham Əliyev Abşeronun icra başçısı İradə Gülməmmədovanın vəzifəsindən azad edilməsi haqqında sərəncam imzalayıb. Ölkə başçısının digər sərəncamı ilə paytaxtın Nərimanov rayonunun icra başçısı Abdin Fərzəliyev vəzifəsindən azad edilərək Abşerona yeni başçı təyin olunub. Hələlik Nərimanov rayonuna icra başçısı təyin edilməyib.
Məlumat üçün bildirək ki, Abdin Fərzəliyev 2005-ci ilin dekabr ayında bu rayona rəhbər gətirilmişdi. O,uzun illərdən sonra fəaliyyətini digər rayonda – Abşeronda davam etdirəcək. Hazırda Bakının Nərimanov rayonu ilə birlikdə 6 rayonun icra başçısı postu boş qalır.
Həmin rayonların siyahısını təqdim edirik:
Nizami rayonu
Nərimanov kimi, Bakının Nizami rayonuna da icra başçısı təyin edilməyib. Sabiq başçısı Arif Qasımov Prezident İlham Əliyevin 22 sentyabr 2015-ci il tarixli Sərəncamı ilə rayona başçı gətirilmişdi. O, 11 iyul 2020-ci ildə həmin vəzifədən azad edilib.
Gədəbəy
Gədəbəyin də icra başçısı postu boşdur. 2018-ci ildən rayonu idarə edən İbrahim Mustafayev 2021-ci il oktyabrın 5-də vəzifəsindən azad edilərək, Prezident Administrasiyasının Ərazi-təşkilat məsələləri şöbəsinin müdir müavini vəzifəsinə təyinat alıb. Ötən ildən bəri Gədəbəyə başçı təyinatı həyata keçirilməyib.
Göygöl
Sabiq icra başçısı Arif Seyidovun 14 illik rəhbərliyindən sonra Göygöl başsız qalan rayonlar sırasındadır. Belə ki, 2006-ci ilin fevralın 23-də başçı təyin olunan Arif Seyidov Prezidentin sərəncamı ilə 22 may 2020-ci ildə vəzifəsindən azad edilib. Hələlik bu rayona təyinat gerçəkləşdirilməyib.
Kürdəmir
2020-ci il avqustun 19-da Baş Prokurorluğun keçirdiyi əməliyyat nəticəsində Kürdəmirin icra başçısı Ceyhun Cəfərov saxlanılıb. Həbs edilən icra başçısı avqustun 20-də vəzifəsindən azad edilib. Məlum olaydan sonra Kürdəmirin icra başçısı postu hələlik boş qalır.
Lerik
Başçısız qalan rayonlardan biri də Lerikdir. Ölkə başçısının 2 aprel 2007-ci il tarixli Sərəncamı ilə bu rayona icra başçısı gətirilən Rövşən Bağırov ötən il aprelin 29-da vəzifədən çıxarılıb və Ağsu Rayon İcra Hakimiyyətinin başçısı təyin olunub. R. Bağırovun əvəzinə təyinat aparılmayıb. Çox maraqlıdır ki, hakimiyyətin ən yuxarı dairələrində dəfələrlə kadr bankındakı kasadlıqla bağlı narazılıqlar ifadə olunub. Hətta bu yaxınlarda Prezident yerli telekanallara verdiyi müsahibəsi zamanı bu məsələyə toxundu. Sitat: “18 ildir ki, mən Prezident vəzifəsində işləyirəm və mənim təşəbbüsümlə çoxlu kadr dəyişikliyi edilib. Əfsuslar olsun, bəzi hallarda kadr dəyişikliyi vəziyyətin müsbətə doğru dəyişməsinə aparmır. Çünki yeni kadr təyin edilir, müəyyən müddət ərzində özünü verilmiş təlimatlara uyğun aparır, amma sonra vaxt keçdikcə, necə deyərlər, köhnə, əyri yola gedir. Ona görə burada cəza tədbirləri ilə yanaşı, kadrların düzgün seçilməsi məsələsi öz rolunu oynamalıdır”. Prezident əlavə edib ki, bu sahədə son vaxtlar, Azərbaycan ictimaiyyəti görür ki, çox ciddi kadr islahatı aparılıb: “Hakimiyyətin demək olar ki, bütün qollarında ciddi kadr islahatları aparılıbdır. Hökumətdə, Milli Məclisdə, Prezident Administrasiyasında, nazirliklərdə, yerli icra orqanlarında artıq böyük dərəcədə ciddi kadr dəyişikliyi baş verib və bu, hesab edirəm ki, korrupsiyaya qarşı mübarizədə önəmli rol oynayacaq”. Göründüyü kimi, ölkə başçısı yeni təyin olunan kadrların da bir müddət sonra əyri yollara meyl etdiklərini açıqlayıb. Məlumdur ki, dövlət başçısı bir çox hallarda kadr təqdimatlarına baxıb sonra qərar verir. O zaman bunun üçün hansı addımlar atılmalıdır ki, yüksək postlara yanlış təqdimatlar Prezidentə verilməsin? Hakimiyyətə yaxın olan partiyalar idarəetmədə onların da kadrlarından istifadə edilməsi təşəbbüsü ilə çıxış etmir?Hakimiyyətyönlü Azərbaycan Naminə Alyans Partiyasının sədri Abutalıb Səmədov “Bakı-Xəbər”ə açıqlamasında bildirdi ki, Azərbaycanda bir neçə rayona icra başçısının təyin edilməməsinin bir sıra obyektiv səbəbləri var: “Bəzən isə görürük ki, başqa rayonlarda işləyib özünü doğrultmayan icra başçılarının rotasiya qaydasında yerdəyişməsi həyata keçirilir. Onların bir çoxlarının fəaliyyəti qətiyyən uğurlu sayıla bilməz. Yeri gəlmişkən, boş qalan deputat yerləri ilə bağlı da seçkilər təyin edilmir. İcra başçısı yerinə hakimiyyəti dəstəkləyən partiyalardan belə təşəbbüs olsa belə, bunun heç bir nəticəsi olmayacaq. Buna bənzər təşəbbüslər olub. Hafiz Hacıyev Xankəndinin qubernatoru olmağı təklif etdi. Xankəndi mümkün deyildisə, başqa bir rayonun idarəetməsini həmin partiyaya vermək olardı. Çox təəssüf ki, hakimiyyət belə yanaşanlara dəstək vermir. İndiki inzibati ərazi bölgüsü icra başçılarına yaxşı işləmək şansını vermir. Bu vəziyyətdə onların işinin səmərəliliyini təmin etmək qeyri-mümkündür. Milli Məclis Azərbaycanın inzibati ərazi bölgüsünə yenidən baxmalıdır. İri inzibati ərazi vzhidləri yaradılmalıdır. Adını nə istəsələr qoya bilərlər. Başçıların rayonlara xarici investisiya cəlb etmək imkanları olmalıdır. Hazırkı icra başçılarının çoxu sahibkarlara mane olmaq istiqamətində çalışırlar. 14 iqtisadi rayon yaradılıbsa, onların əsasında inzibati ərazi vahidləri yaradılmalıdır. Əks halda, bölgələrin inkişafını təmin etmək qeyri-mümkündür. Bizim partiya belə bir təşəbbüslə çıxış etmək niyyətundı deyil. Potensialımız hamıya məlumdur, əgər belə bir məsləhət olsa, biz üzərimizə yük götürməyə hazırıq. Təəssüf ki, hakimiyyət tərəfdən belə təşəbbüslər hiss edilmir”.
Məhəmmədəli QƏRİBLİ
