Son 30 ildə Ermənistanda Soqomon Teyleryan, Qaregin Njde kimi terrorçulara abidələr qoyulması ənənə halını alıb. Faşizmə qulluq edənlərin, terrorçuların qəhrəmanlaşdırıldığı Ermənistan artıq dünyada terrorçu dövlət kimi tanınır. Ermənistanın şəhərlərində terrorçulara abidələr qoyulması, əlbəttə, bölgədə terrorizmin, neonasizmin yayılmasına şərait yaradır. Bu da bölgədə yaşayan xalqlarda, mövcud dövlətlərdə narazılıq və narahatlıq yaratmaya bilmir. Ermənistanın daxilində də terrorçulara abidələr qoyulmasından rahatsız olanlar varmış.
Belə ki, artiq Ermənistanda 1921-ci ildə Berlində Osmanlı hökumətinin xarici işlər naziri Tələt Paşanı qətlə yetirən terrorçu Soqomon Teyleryanın abidələri terroru təbliğ edən açıq-aydın vasitələr kimi qiymətləndirilməyə başlayıb. Terrorçunun abidəsinin sökülməsi ilə bağlı fikirlər səslənməyə başlayıb. Ermənistan parlamentinin sabiq deputatı Sofya Ovsepyan özünün feysbuk səhifəsində yazıb: “Son günlər erməni ictimaiyyətində Soqomon Teyleryanın Maralik şəhərindəki abidəsinin sökülməsi barədə tez-tez danışırlar”. Sabiq deputatın qeyd etdiyinə görə, Ermənistan vətəndaşları arasında bu abidədən narahatlıq keçirənlər var.
“...Bu abidələrin potensial terrorizm təbliğatçısı olduğunu dərk edirlər”
AMEA-nın Fəlsəfə və Sosiologiya İnstitutunun aparıcı elmi işçisi, tarix üzrə fəlsəfə doktoru, BAO başqanının Türki Dünyası ilə əlaqələr üzrə müavini, siyasi şərhçi Faiq Ələkbərli “Bakı-Xəbər”ə şərhində bildirdi ki, hazırda Ermənistan cəmiyyətinin bir qismi separatzmin, terrorizmin, revanşizmin xeyirli bir şey olmadığını dərk etməyə başlayıb. “Xüsusilə də Ermənistanın daxilində bəzi şəxslərin terrorizmin əleyhinə çıxması bunun göstəricilərindəndir. Artıq erməni cəmiyyətinin içində də elələri var ki, bu abidələrin potensial terrorizm təbliğatçısı olduğunu dərk edir. Osmanlı dövlətinin xarici işlər naziri Tələt Paşanı qətlə yetirmiş terrorçu Teyleryanın abidəsinin götürülməsi barədə fikirlər də bunun nəticəsidir. Bir qisim ermənilər artıq anlamağa başlayıblar ki, hökümətin qəhrəmanlaşdırdığı terrorçuların abidələri yalnız Ermənistana ziyan gətirə bilər. Xüsusən də, Ermənistanın Türkiyə ilə münasibətləri düzəltmək istədiyi bir vaxtda Tələt Paşanın qatili olan terrorçunun abidəsinin qalması artıq erməniləri də narahat etməyə başlayıb. Bu səbəbdən də onun sökülməsini istəyirlər. Terrorçu Teyleryanın abidələrinin sökülməsi Ermənistan-Türkiyə münasibətlərinin tənzimlənməsində rol oynaya bilər. Eləcə də başqa qonşu ölkələrlə münasibətlərin normallaşmasına terrorçuların abidələrinin sökülməsi yaxşı təsir göstərməyə bilməz. Əgər Ermənistan qonşu dövlətlərlə, xüsusən də Türkiyə, Azərbaycan və Gürcüstanla normal münasibətlər qurmaq istəyirsə bu cür terrorçuların abidələrini sökməlidir. Eyni zamanda bu ölkədə terrora çağırış yığışdırılmalıdır, başqa ölkələrin ərazilərinə qarşı iddialara son qoyulmalıdır. Ancaq bu halda Ermənistanın müəyyən mənada gələcəyi ola bilər”.
F.Ələkbərlinin fikrincə, amma nə qədər ki, Ermənistanda terrorçulara abidələr qoyulması davam etdiriləcək, terrorizm təbliğ olunacaq, bu bir o qədər cəmiyyətə ziyan vuracaq. “Görünən odur ki, artıq Ermənistan cəmiyyətinin içində terrorçuların abidələrinə qarşı açıq etiraz var. Xüsusən də, Paşinyan hakimiyyətə gəldikdən sonra bu məsələdə müəyyən tərpənişlər hiss olunur. Yəni erməni terrorizmi və erməni faşizminin pislənməsi halları əvvəlki dövrlərlə müqayisədə özünü büruzə verir. O cümlədən də terrorçu Teyleryanın abidəsinin yığışdırılması məsələsinin gündəmə gətirilməsi bunun bir tərkib hissəsidir. Əlbəttə, əsas məsələ budur ki, Daşnaksütyun partiyasının Ermənistanda varlığının özü bir təhlükədir. Bu partiya sırf erməni faşizmini, nasizmini ortaya qoyur və təbliğ edir. Bu ölkədə Daşnaksütyun varsa, bu, Ermənistan cəmiyyətinin gələcəyini sual altında qoyur”- deyə F.Ələkbərli qeyd etdi.
İradə SARIYEVA
