Həqiqətin bütün dünya tərəfindən birmənalı olaraq qəbul edilməsi olduqca çətin və uzun prosesdir. Bir tarixi gerçəkliyi qəbul etdirmək üçün bəzən dövlətlərə, xalqlara illər lazım olur. Amma necə deyərlər, sonda həqiqət, haqq-ədalət öz yerini tapır.
Azərbaycan dövləti də öz həqiqətini bütün dünyaya qəbul etdirmək üçün illərdir ki, ən müxtəlif istiqamətlərdə addımlar atır, tədbirlər keçirir. Heç şübhəsiz ki, 44 günlük Vətən Müharibəsində qazandığımız böyük qələbənin dünyaya çatdırılması və tanıdılması yolunda görülən işlərlə kifayətlənməli deyilik, daha geniş müstəvilərdə təbliğatımızı davam etdirməliyik. Qarabağ zəfərinin dünyada tanıdılması yönündə görə biləcəyimiz və görməli olduğumuz işlər həddən artıq çox işlər var. Müzəffər Ali Baş Komandanın rəhbərliyi ilə qazandığımız tarixi qələbənin, Ermənistan tərəfindən törədilmiş sülh və insanlıq əleyhinə cinayətlərin, bir sözlə bu dövlətin bütün cinayətlərlə bağlı həqiqətləri dünya ictmaiyyətinə çatdırmaq üçün ən müxtəlif üsullardan istifadə etmək lazımdır. Bu həqiqətlərin siyasi-diplomatik müstəvidə dünya ictimaiyyətinə çatdırılması ilə yanaşı elmi-ədəbi müstəvi də də çatdırılmalıdır. Məsələn, bu həqiqətlətin geniş təbliği üçün Qarabağla, Şuşa ilə bağlı beynəlxalq elmi konfranslar, ədəbiyyat, mədəniyyət tədbirlərinin keçirilməsi bir zərurət kimi qarşıda durur.
“Beynəlxalq elmi və ədəbi konfransların əhəmiyyəti böyük olar”
AMEA-nın Mərkəzi Nəbatat Bağının şöbə müdiri, bilologiya üzrə fəlsəfə doktoru, dosent, AYB üzvü, alim-yazıçı Sadıq Qarayev bizimlə söhbətində bildirdi ki, Qarabağ müharibəsində qazandığımız tarixi qələbənin geniş təbliğinə böyük ehtiyac var. S.Qarayevin sözlərinə görə, bütün dünyada yenə də erməni yalanı ayaq tutub yeriməkdədir, biz o yalanların qol-qanad açmasına, daha çox insanların beynini zəhərləməsinə imkan verməli deyilik. S. Qarauev deyir ki, AMEA-da və başqa elm ocaqlarında bu məsələlərlə bağlı konfranslar keçirilir, özü də çox səmərəli, faydalı işlər görülür. Amma o hesab edir ki, həqiqətlərin beynəlxalq aləmə yayılmasında beynəlxalq elmi və ədəbi konfransların böyük əhəmiyyəti var. “Həqiqətlərin geniş təbliğ edilməsində elm adamlarının rolu geniş olmalıdır. Akademiyada Qarabağla, tarixi zəfərimizlə, Ermənistanın cinayətləri ilə bağlı geniş tədbirlər keçirilir. Xüsusən də, Ermənistanın ərazilərimizdə törətdiyi ekoloji terrorun aradan qaldırılması istiqamətində bizim alimlərimizin çox maraqlı təklifləri var. Bunlar öz yerində. Amma hesab edirəm ki, Qarabağla bağlı beynəlxalq elmi və ədəbi konfranslar keçirilməlidir. Çünki həqiqətlərin yayılmasında beynəlxalq elmi və ədəbi konfransların əhəmiyyəti böyük olar”.
“Təklif edərdim ki, bu elmi konfrans Şuşada keçirilsin”
S.Qarayevin sözlərinə görə, beynəlxalq elmi konfransları, ədəbiyyat tədbirlərini Qarabağda, Şuşada keçirmək lazımdır ki, xaricdən dəvət edilən alimlər, ədəbiyyat adamları hər şeyi gözləri ilə görsünlər. “Azərbaycanın qələbəsindən sonra Ermənistan yenidən özünün şər kampaniyasına başlayıb və hər yerdə bizim əleyhimizə fəaliyyət göstərirlər. Ərazilərimizi işğalda saxladığı dövrdə Ermənistanın burada dağıntı, məhvetmə cinayətləri həyata keçirdiyini beynəlxalq təşkilatlar qəbul etməlidir. Ermənistan Azərbaycan ərazilərində ekoterrordan tutmuş təbiətin talanmasına, məzarlıqların dağıdılmasına, məscidlərin təhqir edilməsinə qədər elə bir cinayət yoxdur ki, onu törətməsin. Bu dövlət səviyyəsində diplomatik-siyasi müstəvidə dünyaya dövlətlərinə çatdırılırsa, ədəbiyyat, elm sahəsində də bu işlər görülməlidir. Fikrimcə, beynəlxalq elmi konfrans keçirilməlidir və dünya ölkələrindən bura alimlər dəvət edilməlidir. Təklif edərdim ki, bu elmi konfrans Şuşada keçirilsin. Dünya alimlərinin Azərbaycana dəvət edilməsi və erməni vandalizmini öz gözləri ilə görməsi lazımdır. Qoy gəlib Ermənistanın tertorçu, cinayətkar fəalliyyətini görsünlər. Görsünlər ki, Ermənistan Qarabağda necə dəhşətli ekoloji terror törədib, nə qədər abidələrimizi məhv edib, mədəni sərvətlərimizi dağıdıblar. Dünya alimləri həm bu problemlərin aradan qaldırılmasında, həm onun dünyaya yayılmasında iştirak etməli, həm də ermənilərin vurduğu zərərin aradan qaldırılması işində konkret təkliflərlə çıxış etməlidirlər. Bütün sahələr üzrə alimlər Azərbaycana gəlməlidir. Onlar bu konfranslarda əsl həqiqətlərlə tanış olmalıdırlar. Bu günə kimi ermənilər dünyanı aldatmaqla, onlara saxta məlumatlar ötürməklə məşğul olub”.
“Beynəlxalq elmi müstəvidə daha çox işlər görməliyik”
“İndi görürsüz ki, Ermənistan törətdiyi bütün cinayətlərə görə günahını etiraf etmək əvəzinə Azərbaycana qarşı şər atmaqla, əsassız ittihamlarla çıxış etməklə məşğul olur. Bütün bunlar isə onu göstərir ki, erməni öz xislətindən əl çəkməyəcək və yalanlarını davam etdirəcək. Bu baxımdan, biz beynəlxalq elmi müstəvidə daha çox işlər görməliyik. Çünki ermənilər beynəlxalq elmi ictimaiyyətə tamamilə yalan, uydurma məlumat veriblər. Biz xarici alilmlərə köhnə ədəbiyyat materiallarını da təqdim etməliyik ki, onlar bu günkü hadisələri o materiallarla tutuşdursunlar. Onda görərlər ki, ermənilər nə qədər saxtalaşdırma işləri aparıb. Beynəlxalq konfransın keçirilməsi mütləqdir. Bu bizə lazımdır. Bundan başqa dediyim kimi dünyanın tanınmış şair və yazıçılarını da biz azad edilmiş ərazilərə dəvət etməliyik, ədəbi konfranslar keçirib onların iştirakı ilə bu məsələnin beynəlxalq ədəbi ictimiayyətdə təbliğatına nail olmalıyıq” - deyə S.Qarayev bildirdi.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
