Qazaxıstanın keçmiş prezidenti Nursultan Nazarbayev ölkəsində etirazların başlamasından və yatırılmasından sonra ilk dəfə üzə çıxıb.
Nazarbayev videomüraciət yayıb və ölkədən heç yana getmədiyini, Qazaxıstan paytaxtında olduğunu və hazırda istirahət etdiyini bildirib: “Hörmətli qazaxıstanlılar! Əziz həmvətənlər! Yanvar hadisələri bütün Qazaxıstanı sarsıtdı. Təşkil olunmuş bu iğtişaşların və Qazaxıstana hücumların məqsədi ölkənin bütövlüyünü və dövlətin dayaqlarını dağıtmaq idi. Bu hadisələr bir daha göstərir ki, müstəqilliyi göz bəbəyi kimi, xüsusi qayğı tələb edən kövrək budaq kimi qorumaq lazımdır. Baş vermiş faciə bizim hamımız üçün dərs oldu. Aydınlaşdırmaq lazımdır ki, bu “poqrom”ları və qətlləri kim təşkil etmişdi. İstintaq bu suala cavab verəcək. Həlak olanların yaxınlarına və doğmalarına səmimi başsağlığı verirəm, zərər çəkənlərin tezliklə sağalmasını arzu edirəm. Mənim ünvanıma daxil olan çoxsaylı müraciətlərə və KİV-lərdə dərc edilmiş xəbərlərə cavab olaraq bildirirəm ki, 2019-cu ildə səlahiyyətlərimi prezident Kasım-Jomart Tokayevə vermişəm və o vaxtdan bəri pensiyadayam, hazırda da Qazaxıstan paytaxtında dincəlirəm və heç yana getməmişəm. Prezident Kasım-Jomart Tokayev tam hakimiyyətə sahibdir. O, Təhlükəsizlik Şurasının sədridir. Tezliklə prezident “Nur Otan” partiyasının sədri seçiləcək. Ona görə də elita daxilində heç bir münaqişə və qarşıdurma yoxdur. Bu barədə şayiələr əsassızdır.
Hamıya məlumdur ki, mən 30 il dayanmadan Vətənimiz naminə işləmişəm. Biz onun sərhədlərini möhkəmləndirmişik. Proqressiv islahatlar aparmışıq. Birlikdə müstəqil Qazaxıstan qurmuşuq, sosial-iqtisadi inkişafda böyük nailiyyətlər qazanmışıq, bir çox göstəricilərə görə təkcə Mərkəzi Asiyada deyil, eyni zamanda MDB-də lider olmuşuq. Qazaxıstan dünya ictimaiyyətinin tanıdığı və hörmət etdiyi ölkəyə çevrilib. Bu, bütün qazaxıstanlıların birliyinin və sıx birləşməsinin nəticəsidir.
Ölkədə stabillik və sakitlik həmişə mənim məqsədim olub. Bu üstün dəyərləri hamımız qorumalıyıq. Biz hökmən bu böhranı dəf edəcəyik və daha güclü olacağıq. Prezident xalqın rifahını yüksəltməyə yönəlmiş yeni islahatlar proqramı irəli sürüb. Bu proqramı dəstəkləmək lazımdır. Əziz həmvətənlər, sizlərə sağlamlıq və rifah arzu edirəm! Mənim dövlət başçısı postunda yürütdüyüm islahatları və modernləşmə kursunu dəstəklədiyiniz üçün təşəkkür edirəm”.
Qeyd edək ki, bu müddət ərzində Nazarbayevin ölkədən qaçdığı və öldürüldüyü ilə bağlı çoxsaylı məlumatlar yayılmışdı. Onun bu qəfil “zühur”unu necə izah etmək olar?
Politoloq Elşən Mustafayev “Bakı-Xəbər”ə açıqlamasında bildirdi ki, artıq Qazaxıstanın bütün bölgələrində fövqəladə vəziyyət rejimi aradan qaldırılıb: “Dünən Nazarbayevin xalqa müraciətini heç kim gözləmirdi. Hər kəsə müraciət edərək bildirdi ki, prezidentə dəstək vermək lazımdır. Təbii ki, xalq bunu gözləmirdi. Həmçinin xalq tərəfindən elə başa düşülürdü ki, dövlətin elit təbəqələri arasında mübahisə var. Nazarbayev dünən bu iddialara da son qoydu. Dövlət rəsmiləri hazırda bildirir ki, xalq tərəfindən Nazarbayevə edilən haqsızlıqlar doğru deyildi. Çünki onun Qazaxıstan üçün etdiyi şeyləri unutmaq olmaz. Xalq tərəfindən də hiss olunur ki, siyasi vəziyyət dəyişib. Bundan sonra Qazaxıstanda vəziyyətin normala qayıdacağını demək olar. Amma hələ də həyatını itirən vətəndaşların sayı açıqlanmayıb, morqlardan adamların qaçırıldığını demişdilər. Dünən dövlət katibi prezidentə etdiyi açıqlamada dekabrın 20-dən sonra ölkəyə bir qrup terroristin girdiyini bildirib. Bu qrup da dünyaca məşhur terrorçular olub. Amma hələ də hansı qrup olunduğu bilinmir. Demək ki, bu qarşıdurmadan istifadə edən qüvvələr olub. Birinci prezidentin kürəkənləri də işdən çıxarılıb. Qazaxıstan xalqı üçün fond yaradılıb, bu da xalqa dəstək üçündür. Hazırda Qazaxıstanda belə bir mühit var ki, dövlət Nazarbayevin dövründəki elit qüvvələrə şərt qoyub. "Sizin necə pul qazandığınızı araşdırmayacağıq, amma xalqla paylaşacaqsınız" deyə bir şərt var. Həmin fonda pul köçürənlərin sayı da gündən-günə artır. Buradan bir nəticə çıxır ki, Nazarbayevin təhlükəsizliyinə elə Tokayevin özü tam təminat verib. Onların arasında elə də ciddi fikir ayrılığı olmayıb”.
Məhəmmədəli QƏRİBLİ
