Ukrayna sərhədinə qoşun toplayan Rusiyanın indi də təlim məqsədilə Belarusa qoşun yeritməsi Qərbdə Ukraynanın işğal ediləcəyi qorxusunu daha da artırıb.
Qeyd edək ki, Rusiya və Belarus gələn ay birgə təlim keçirəcəklər və bu məqsədlə də Rusiya Ukraynanın şimal qonşusu Belarusa qoşun göndərməyə başlayıb.
Bu addım Rusiyanın Ukraynanı işğal etməyə hazırlaşdığını düşünən Qərbdə ciddi narahatlıq yaradıb. Hərbi analitiklər iddia edirlər ki, böyük bir işğal cəhdi olarsa, Rusiya Ukrayna qüvvələrinin parçalamaq üçün Belarus vasitəsilə də ölkəyə hücum edə bilər.
Qeyd edilir ki, Rusiya artıq Ukrayna sərhədində ciddi hərbi güc yığıb. Mümkün işğal zamanı Belarusdan gələcək müdaxilə Ukrayna ordusunun vəziyyətini daha da çətinləşdirə bilər.
Digər tərəfdən, Ağ Evin sözçüsü Cen Psaki "Rusiyanın Ukraynaya hər an hücum edə biləcəyi bir mərhələdəyik" deyərək Rusiyaya qarşı bütün variantların masada olduğunu bildirib.
Bununla yanaşı, ABŞ Avropa dövlətlərinin də Rusiyaya qarşı daha açıq mövqe tutmasını istəyir. Ancaq ekspertlər, ABŞ-ın gözləntilərinə baxmayaraq, hazırki vəziyyətdə Avropanın Rusiya ilə bağlı addımlarını proqnozlaşdırmağın çətin olduğunu deyir.
Avropanın bir nömrəli təbii qaz tədarükçüsü olan Rusiya Belarusdakı son miqrant böhranı ilə Avropaya qarşı geosiyasi kozırlardan istifadə etməyə hazır olduğunu nümayiş etdirdi. Digər tərəfdən, hazırda Böyük Britaniya istisna olmaqla, bütün əsas Avropa dövlətləri Rusiya ilə iqtisadi əlaqələrini dərinləşdirir.
“The Wall Street Journal” yazır ki, Avropanın Rusiya qazı və neftindən asılılığı ABŞ-la münasibətlərdə böhran yaranacağı təqdirdə Rusiyaya qarşı sərt sanksiyalar tətbiq etməyə imkan verməyəcək.
Qeyd edilir ki, Rusiya Sovet İttifaqı dövründən Avropanın əsas enerji təchizatçısı olub və son bir neçə ildə Avropanın qaz bazarındakı payını əhəmiyyətli dərəcədə artırıb.
Bildirilir ki, “Şimal axını-2” qaz kəməri tam gücü ilə işə düşdükdən sonra Avropa İttifaqı Rusiyadan daha çox asılı olacaq.
Avropa ölkələrinin Mərkəzi Asiya, Norveç, Şimali Afrika və ABŞ sayəsində qaz təchizatını şaxələndirməyə və bərpa olunan enerji mənbələrini inkişaf etdirməyə çalışdıqlarını deyən müəllif, buna baxmayaraq, Avropanın Rusiya qazından imtina edə bilməyəcəyinə, çünki onları əvəz edəcək mənbə olmadığına diqqət çəkir.
Digər tərəfdən Avropanın özündə də Ukrayna-Rusiya böhranına yanaşmalar fərqlidir. Misal üçün, Britaniya gərginlikdə Ukraynaya hərbi dəstəyini açıq şəkildə ifadə edir.
Qeyd edilir ki, Britaniya Ukraynaya təlim keçmək üçün bir qrup əsgər göndərəcək. Britaniyanın müdafiə naziri Ben Uolles Rusiyaya qarşı müdafiəsini gücləndirmək üçün Ukraynaya qısa mənzilli tank əleyhinə raketin də göndəriləcəyini açıqlayıb.
Almaniya isə, Böyük Britaniyadan fərqli olaraq, Ukraynanın silah tələbini rədd edib və Kiyevə heç bir silah satılmayacağı açıqlanıb. Hətta böhran hər iki ölkəni üz-üzə gətirib. Məlumatlara görə, Almaniya hava məkanını İngiltərənin Ukraynaya dəstək üçün göndərdiyi yük təyyarəsinə bağlayıb və təyyarənin hava məkanından keçməsinə icazə verməyib.
Bütün bunlar onu göstərir ki, Rusiya-ABŞ böhranı dərinləşərsə, bu ölkəyə qarşı sanksiyalar tətbiq etmək məsələsində Vaşinqton Avropadan yetərli dəstək ala bilməyəcək.
Tahir TAĞIYEV
