Ermənistan prezidenti Armen Sarkisyanın bugünlərdə Birləşmiş Ərəb Əmirliklərinə “işgüzar səfəri” ilə bağlı maraqlı məlumatlar yayılır. BƏƏ-də olan Armen Sarkisyan yalnız iki gün sonra Birləşmiş Ərəb Əmirliklərinin XİN rəhbəri ilə görüşməyə nail ola bilib.
Bildirilir ki, nazir Abdulla bin Zaid ən-Nəhyanla Sarkisyan “regional təhlükəsizlik və stabilliyi” müzakirə ediblər. Sərkisyan Ermənistanın qarşısında duran problemlərdən və keçmiş Qarabağ münaqişəsindən də danışıb. Abdulla bin Zaid ən-Nəhyanın isə yalnız Ermənistanla enerji, informasiya texnologiyaları, qida təhlükəsizliyi və turizm sahəsində əməkdaşlıqla bağlı mövzulara maraq göstərdiyi qeyd edilib. Yeri gəlmişkən, BƏƏ-yə gedən Sarkisyanın xanımı Nune Sarkisyan həmin ölkədəki sərgiləri gəzib. Qeyd edək ki, Sarkisyan ötən ilin sonlarına doğru ərəb ölkələrinə ziyarətə başlamışdı. Dekabr ayında Qətəri ziyarət edib. Oktyabrda isə BƏƏ-yə getmişdi. Onun 3 aydan sonra yenidən BƏƏ-yə niyə getməsinin əsl səbəbi çox maraqlıdır. Ümumiyyətlə BƏƏ bir müsəlman ölkəsi kimi, Ermənistanla münasibətlərin qurulmasında bəzi amilləri mütləq nəzərə almalıdır. Bilməlidir ki, həmin ölkə müsəlmanların qətliamını həyata keçirib və məscidləri dağıdıb. Ən gözəl nümunəni isə həmin ölkə öz qonşusu olan digər ərəb ölkəsi Səudiyyə Ərəbistanından götürməlidir.
İlhahiyyatçı Tural İrfan “Bakı-Xəbər”ə bildirdi ki, ötən həftə Azərbaycanda əlamətdar hadisə baş verdi: “Səudiyyə Ərəbistanının şirkəti tərəfindən tikiləcək külək stansiyasının təməlqoyma mərasimi keçirildi. Mərasimdə Azərbaycan Prezidenti İlham Əliyev və Səudiyyə Ərəbistanı Krallığının energetika naziri şahzadə iştirak və çıxış etdilər. Qeyd etmək lazımdır ki, bu, ölkəmizdə bütünlüklə xarici investisiyalar hesabına həyata keçirilən ilk belə layihədir. Elə həmin ərəfədə daha bir diqqətəlayiq hadisə baş verib. Belə ki, rəqib ölkənin prezidenti Armen Sarkisyanın Birləşmiş Ərəb Əmirliklərinə işgüzar səfəri zamanı Ermənistanda 200 meqavatlıq yeni Günəş elektrik stansiyasının tikintisinə dair razılıq əldə olunub. Layihəni bərpa olunan enerji sahəsində ən böyük şirkətlərdən biri olan “Masdar Emirates” şirkəti alıb. Son dövrlərdə ərəb ölkələri regional iqtisadi-hərbi-siyasi rollarını xeyli artırırlar. Bu, Fars körfəzinə, Yaxın Şərqə birbaşa bitişik olan regional mühitə aiddir. Bu kontekstdə Qafqaz ölkələri ilə iqtisadi və siyasi əlaqələrin dərinləşməsinin ərəb dünyası üçün əhəmiyyət kəsb etdiyini, iqtisadi perspektivlərdən mümkün qədər tez istifadə etməklə diqqətli və ardıcıl yarışın baş verdiyini görə bilərik. Əslində bu iki ərəb ölkəsi arasında müqayisə aparsaq, BƏƏ-nin Səudiyyə Ərəbistanından örnək götürməli olduğu çoxlu sayda detallar var. Ermənistanın ərazilərimizi işğalı dönəmində onlarla heç bir diplomatik münasibətlər qurmayan ölkələr də var. Bura misal kimi Pakistanı, Səudiyyə Ərəbistanınını göstərmək olar. Onlar teokratik quruluşa malik ölkələrdi. Yəni idarəetmələrində İslamı əsas götürürlər. Quranda da yazılır ki, müsəlman müsəlmanın və haqqın yanında olmalıdır. Təəssüflər olsun ki, BƏƏ kimi dini mahiyyətli bir ölkə həmin qaydalara əməl etmir. Hətta düşmənimizə dəstək verirlər. Çox təəssüflər olsun ki, bu mövqe onların idarəetmə modelinə uyğun deyil. Bu baxımdan da, Səudiyyənin yürütdüyü siyasət alqışlanmalıdır. Başqa müsəlman ölkələri bundan ibrət götürməlidir. Biz demirik ki, haqsız yerə bizi müdafiə etsinlər. Əksinə, bizim haqlı olduğumuz məqamları dəstəkləsinlər. Cənab Prezidentin bu fikri tam təsdiqini tapıb. Doğru olan siyasətin nəticəsidir ki, Səudiyyə Ərəbistanı kimi ölkə bizimlə belə səmimi münasibətlər qurur. Onun qonşusu olan BƏƏ isə müsəmanlara zülm edən, işğalçı mahiyyətli bir ölkəni dəstəkləyir”.
Məhəmmədəli QƏRİBLİ
