Erməni prezident Ərəb Əmirliklərində Azərbaycana böhtan atdı - Əmirlik təəssübkeş islam ölkəsi olsaydı...

Əli Orucov: “Bütün sənaye tullantıları necə gəldi çaylara axıdılır və əsasən qonşu ölkələrin ekologiyasına zərər vurur”

img

Hər zaman olduğu kimi, yenə də ermənilər özlərini xaricdə ən sivil, mədəni xalq kimi təqdim etmək istəyirlər. Guya bunlar qədər ekologiyanı, təbiəti qoruyan ikinci xalq yoxdur.

Bu arada Birləşmiş Ərəb Əmirliklərində işgüzar səfərdə olan Ermənistan prezident Armen Sarkisyan sözügedən məsələləri gündəmə gətirib. Belə ki, A.Sarkisyan qatıldığı elmi konfransda həyasızcasına yalan danışaraq Ermənistanın ekologiyaya ziyan vurmadığını bəyan edib: “Ermənistan kiçik ölkədir, onun iqlimlə bağlı böyük problemləri yoxdur, ekologiyaya zərər vurmur, amma kömür yandıran böyük ölkələr də var, hansı ki, bu ölkələrin bu enerjini Günəş enerjisinə çevirməsi üçün vaxt lazımdır. Mən bu ölkələrə deyirəm ki, mənim sizə 100 milyon dollar borcum var və bu pulu qaytarıb borcumu ödəmək əvəzinə, sizə ağac əkməyi, yaşıl bizneslə məşğul olmağı təklif edə bilərəm. Problem sənaye və texnologiyanın inkişafı nəticəsində yaranıb və onların tətbiqi və açıq siyasət yolu ilə həlli tapılmalıdır. Hər şeydən əvvəl texnologiyaları, alətləri deyil, yanaşmalarımızı, dünyaya münasibətimizi dəyişmək lazımdır”.

Göründüyü kimi, Ermənistan prezidenti elə danışir ki, guya onlar qədər bu kimi məsələlərdə həssas davranan ikinci tərəf yoxdur. Bəs onda mənbəyi Ermənistan ərazisindən başlayan, Zəngilandan keçib Araza axan Oxçu çayını mis tullantıları ilə, Göyçə gölünü digər tullantılarla kim çirkləndirir? Hansı ki, Azərbaycanın normadan artıq ən çox çirklənməyə məruz qalan çayıdır Oxçu. Başqa bir misal. Texnoloji göstəricilərinə görə “Metsamor” Atom Elektrik Stansiyası Cənubi Qafqazda ciddi ekoloji təhdid mənbəyi hesab edilir. Lakin beynəlxalq qurumların çağırışlarına rəğmən, Ermənistan stansiyanı bağlamır. Üstəlik, “Metsamor” AES-in nüvə tullantıları ekologiyanı çirkləndirmirmi?

  • “Ermənistan prezidenti ərəblərin məlumatsızlığından istifadə edərək onları aldadır”

Məsələyə münasibət bildirən AMİP funksioneri Əli Orucovun fikrincə, bu, sadəcə Ermənistanın təbliğat xarakterli növbəti ağ yalanıdır: “Əvvəla, ərəb dövlətlərinin Ermənistana geniş qucaq açması təəssüf doğuran mənzərədir. Bu, İslam abidələrini vandalcasına məhv edən Ermənistanı görməzdən gəlmək deməkdir. Bir məqamı qeyd edim ki, ermənilər təkcə Qarabağda deyil, Ermənistanda da müsəlman irsinə aid olan abidələri məhv ediblər. Ekologiyanın qorunmasına Ermənistanın verdiyi “töhfəyə” gəldikdə isə, ümumiyyətlə bu barədə danışmağa dəyməz. Ermənistanın sözügedən məsələdə necə davrandığını bütün dünya gördü. Söhbət ondan gedir ki, 10 noyabr 2020-ci il razılaşmasından sonra Ermənistan ordusu Ağdam, Kəlbəcər və Laçın rayonlarını tərk etdi. Həmin müddət ərzində gücü çatdıqları qədər ağacları gəsdilər, evləri yandırdılar. Bu mənzərəni bir sıra xarici telekanallar dünyaya yaydı. A.Sarkisyandan soruşmaq lazımdır, budurmu ekologiyanın qorunması? Özünü mədəni xalq kimi dünyaya sırımaq istəyən bütün bunları edərmi? İşğal müddətində Zəngilanın bütün çinar meşələri məhv edilib. Ermənistanın açıq dənizə çıxışı yoxdur. Ölkədəki bütün sənaye tullantıları necə gəldi çaylara axıdılır. Bu da əsasən qonşu ölkələrin, xüsusən də Azərbaycanın ekologiyasına zərər vurur. Özü də bütün bunları Ermənistan məqsədyönlü şəkildə edir. Sadəcə, Ermənistan prezidenti ərəblərin məlumatsızlığından istifadə edərək onları aldadır. Ancaq düşünmürəm ki, bu hər zaman belə olacaq”.

Bu baxımdan partiya funksioneri hesab edir ki, ərəb dövlətlərində erməni vandallığı ilə bağlı təbliğat işləri gücləndirilməlidir.

Vidadi ORDAHALLI

Peşə etikası

Son xəbərlər