Arzuxan Əlizadə: “Ölkəmizə oğrucasına daxil olması azmış kimi, üstəlik belə həyasız açıqlama ilə çıxış edir”
Məlum olduğu kimi, bir müddət əvvəl Fransa prezidentliyinə namizəd Valeri Pekresin qanunsuz olaraq Qarabağa səfər etməsi böyük rezonansa səbəb oldu. Azərbaycan tərəfi bununla bağlı Fransaya rəsmən öz etirazını bildirdi.
Prezident İlham Əliyev isə yerli telekanallara müsahibəsində dedi ki, biz Valeri Pekresin qanunsuz yollarla Qarabağda olmasını bilsəydik geri qayıdan zaman onu saxlayardıq: “Bu, təşkil edilmiş səfər idi, çünki Valeri Pekres istədiyi adamların müşayiətlə gedə bilməyib, çox məhdud sayda gediblər. Onlar gizli şəkildə oraya getdilər və qayıtdılar. Qayıdandan sonra artıq xəbər çıxdı, çünki yəqin ehtiyatlanırdılar ki, biz Laçın dəhlizində onları dayandıracağıq. Çünki əgər xəbərimiz olsaydı ki, onlar oradadırlar, biz onları geri buraxmayacaqdıq, birmənalı şəkildə”.
Bu arada sözügedən məsələ ilə bağlı gündəmə gələn prezidentliyə namizədi V.Pekres Azərbaycanla bağlı şikayət edəcəyini bəyan edib. Azərbaycan prezidentinin səsləndirdiyi məlum fikirləri özünə qarşı “hədə” adlandırıb. Eyni zamanda, Fransa hökumətinin bu “təhdidə” susqun qalmamalı olduğunu bəyan edərək, hökuməti onu müdafiə etməməkdə ittiham edib. Dövlətdən bununla bağlı bəyanat verməsini gözlədiyini bildirib. Həmçinin Pekresin tərəfdarları məsələyə belə reaksiya verib: “Hələ ki, bizim siyasi ailəmizdən bu yekdil çağırışı eşitməli olan Respublika Prezidenti tərəfindən heç bir reaksiya yoxdur. Erməni xalqına sarsılmaz dəstəyimizi bir daha təsdiqləyən Valeri Pekresə qarşı Azərbaycanın təhdidləri qətiyyətli cavab tələb edir”.
Görünən odur ki, prezidentin Pekres barədə dediklərini Fransada ona qarşı hədə-qorxu kimi təqdim etmək istəyirlər.
- “Bütün bu baş verənlərə görə Azərbaycan bir daha rəsmi səviyyədə Fransaya etiraz etməlidir”
Məsələyə münasibət bildirən AMİP sədri Arzuxan Əlizadənin fikrincə, bu, V.Pekresin növbəti həyasızlığıdır: “Bunu ancaq belə dəyərləndirmək olar. Heç bir beynəlxalq hüquq normalarını gözləmədən Azərbaycan ərazisinə oğrucasına daxil olması azmış kimi, üstəlik belə həyasız açıqlama ilə çıxış edir. Ondan soruşmaq lazımdır ki, hansı əsasla başqa dövlətin suveren ərazisinə icazəsiz daxil olmusan? Bu, qanunun aliliyindən dəm vuran Faransanın mahiyyətini ortaya qoyur. Fransanın müharibə vaxtı, həmsədr dövlət olmasına baxmayaraq, bütün beynəlxalq hüquq normalarına tüpürdüyünü gördük. Məsələ ondadır ki, Fransa açıq şəkildə Ermənistanın tərəfini tutdu. Hansı ki, təcavüzə məruz qalan tərəf Ermənistan yox, Azərbaycan idi. Azərbaycan beynəlxalq hüquqa əsaslanaraq hərb yolu ilə öz ərazi bütövlüyünü təmin etdi. Bütün bu baş verənlər onu göstərir ki, Fransada bir sıra namizədlər erməni lobbisinin əlində girovdur. Erməni lobbisinə yarınmaqdan ötrü bütün oyunlardan çıxırlar. Bunların başında, təbii ki, V.Pekres dayanır. Hesab edirəm ki, bütün bu baş verənlərə görə Azərbaycan bir daha rəsmi səviyyədə Fransaya etiraz etməlidir”.
Bir sözlə, partiya sədri hesab edir ki, belə xoşagəlməz hallara sərt reaksiya verilməlidir.
Vidadi ORDAHALLI
