Erməni əsilli Ukrayna siyasətçisi - “azərbaycanlı qaçqınlar Ermənistana qaytarılmalıdır”...

Qasım Hacıyev: “Fikrimcə, Aloyandan sonra bu fikri Ermənistanın daxilindən də eşidəcəyik ki, azərbaycanlı qaçqınlar geri qayıtmalıdır”

img

“Azərbaycanlı qaçqınları Ermənistana qaytarmaq lazımdır”. Bunu Ermənistandan olan Ukrayna siyasətcisi Rüstəm Aloyan deyib. Milliyyətcə erməni olan R.Aloyan son vaxtlar öz çıxışlarında bildirir ki, Ermənistanın nicat yolu Azərbaycanla münasibətləri normallaşdırmaqdan keçir.

Göründüyü kimi, artıq ermənilər arasında da Qərbi azərbaycanlıların öz dədə-baba yurdlarına qaytarılmalı oldugu fikrini irəli sürənlər var.

  • “Çünki proseslər bu istiqamətə köklənib”

AMEA-nın Qafqazşünaslıq İnstititutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, son zamanlar ermənilər tərəfindən belə çağırışlar edilir. Bu çağırışın səbəbini şərh edən Q.Hacıyev hesab edir ki, Ermənistan hazırda dalana dirəndiyi və çox ağır vəziyyətdə olduğu üçün bəzi erməni ziyalıları, siyasətçiləri onun xilaskarı kimi azərbaycanlıları, Azərbaycan dövlətini görür. Q.Hacıyevin sözlərinə görə, azərbaycanlılar öz ata-baba yurdalarından deportasiya edildikdən sonra Ermənistanın qara günləri başlayıb, kənd təsərrüfatı, maldarlığı, iqtisadiyyatı çöküb. Onun dediyinə görə, azərbaycanlılar bu ölkənin inkişafında böyük rol oynayırdı, lakin daşnak xislətli Ermənistan höküməti soydaşlarımızı öz evlərindən didərgin saldıqdan sonra özü də acınacaqlı duruma düşüb. “Bu olduqca maraqlı bir məsələdir. Ara-sıra belə fikirlər söylənilir ki, azərbaycanlı qaçqınlar indiki Ermənistana, Qərbi Azərbaycana qayıtmalıdır. 34 il bundan əvvəl öz ata-baba yurdlarından zorla didərgin salınmış azərbaycanlıların Qərbi Azərbaycana qayıtmaq haqqı var. Qərbi aəzrbaycanlıların öz yurdlarına qayıtmağa böyük haqqı olduğunu, az da olsa, bilən, qəbul edən erməni siyasətçiləri var. İndiki Ermənistan ərazisi tarixən Azərbaycan türklərinin yaşadığı ərazidir, qədim ata-baba yurdlarıdır. Soydaşlarımız birmənalı olaraq Qərbi Azərbaycana qayıtmalıdırlar. Bunu dəfələrlə Prezidentimiz də deyib ki, soydaşlarımız öz yurdlarına qayıtmalıdır.

Erməni əsilli siyasətçi Rüstəm Aloyanın bu məsələni ortaya atması təsadüfi deyil. Çünki gec-tez azərbaycanlılar indiki Ermənistan ərazisinə qayıdacaqlar. Fikrimcə, Aloyandan sonra bu fikri Ermənistanın daxilindən də eşidəcəyik ki, azərbaycanlı qaçqınlar geri qayıtmalıdır. Çünki proseslər bu istiqamətə köklənib. Ermənistanın xilası revanşizm deyil, bu ölkəni revanşistlər qara günə qoyublar. Ermənistanın varlığının qorunmasını istəyən ermənilər ancaq belə düşünməlidir. Tarix də göstərir ki, xalqlar, dövlətlər daimi olaraq müharibə vəziyyətində ola bilməz, hər bir müharibənin sonu sülhlə bitir. İndi də artıq ermənilər dərk edirlər ki, revanşizm Ermənistanı ancaq qaranlığa və bataqlığa sürükləyir, ondan bir fayda yoxdur”.

Azərbaycan xalqının tarixində böyük deportasiyalar yaşandığını deyən Q.Hacıyev hesab edir ki, deportasiyadan əziyyət çəkən Azərbaycan türkləri bu gün öz yurdlarına qayıtmalıdır. Onlar deportasiya olunduqdan sonra ev-eşiklərində, kəndlərində kütləvi olaraq ermənilərin məskunlaşdırıldığını deyən Q.Hacıyevin fikrincə, azərbaycanlılar üçün Ermənistan höküməti şərait yaratmalı, onlara dəyən zərəri kompensasiya etməlidir. Təkcə XX əsrdə üç dəfə Qərbi Azərbaycandan soydaşlarımızın deportasiya olunduğunu deyən Q.Hacıyevin sözlərinə görə, 1988-ci ildən əvvəlki deportasiyalar zamanı soydaşlarımız Azərbaycanın isti aran rayonlarına köçürüldülər, onların da çoxu iqlimə öyrəşə bilməyib məhv oldu, cəmi 30 faizə qədəri geriyə öz yurdlarına qayıtdılar. Sonradan yenə də deportasiya olunduqlarını deyən Q.Hacıyevin sözlərinə görə, soydaşlarımız çox böyük əziyyət çəkib.

İradə SARIYEVA

Peşə etikası

Son xəbərlər