Prezident İlham Əliyev yerli televiziya kanallarına müsahibəsində ATƏT-in Minsk Qrupu həmsədrlərinin fəaliyyətinə münasibət bildirib:
"... onlar indi yubiley tədbirlərinə hazırlaşırlar. Çünki bildiyiniz kimi, Minsk Qrupu 1992-ci ildə yaradılmışdır və bu il 30 illiyidir. Yəqin ki, bu tədbirlərin hazırlanması onları məşğul edir. Amma əgər bu zarafatları kənara qoysaq, hesab edirəm ki, onlar özləri üçün bir gündəlik formalaşdırmalıdırlar. Bu bizim işimiz deyil. Halbuki, mənim təsəvvürüm var ki, onlar nə ilə məşğul olmalıdırlar və nə ilə məşğul olmamalıdırlar. Nə ilə məşğul olmamalıdırlar, mən deyə bilərəm. Onlar Dağlıq Qarabağ münaqişəsi ilə məşğul olmamalıdırlar, çünki bu münaqişə həll olunub. Biz onların yerinə bu məsələni həll etdik. Onların görünməməsinin səbəbi də, hesab edirəm ki, bundan qaynaqlanır. Çünki onlar üçün nə qədər çətin olsa da, bu yeni reallığı qəbul etməlidirlər. Bilməlidirlər ki, onlar bundan sonra Qarabağ məsələsi ilə məşğul olmayacaqlar. Çünki buna biz imkan verməyəcəyik. Biz bu münaqişənin bir tərəfi idik. Əgər bir tərəf deyir ki, bu münaqişə həll olunub, deməli, burada vasitəçiliyə yer qalmır və bizim mövqeyimiz onlara çatdırılıbdır. Nə ilə məşğul olacaqlar, yəqin ki, özləri fikirləşməlidirlər. Bildiyimə görə, indi həmsədrlər arasında da əvvəlki dövrlərdəki kimi birlik yoxdur. Mənim mülahizələrim buna dəlalət edir. Həm bu ölkələr arasındakı münasibətlər son vaxtlar xüsusilə çox gərginləşib, eyni zamanda, keçmiş münaqişə və indiki vəziyyətlə bağlı onların fərqli fikirləri var. Məncə, onlar öz aralarında bir razılığa gələ bilmirlər. Hər halda onların fəaliyyətinin belə aşağı səviyyədə olması bizi qətiyyən narahat etmir, bəlkə də əksinə. Prinsipcə 30 il böyük iş stajıdır, pensiya ərəfəsindədirlər. Ona görə onlara uzun ömür, cansağlığı arzulayıram".
Prezident Minsk Qrupu həmsədrlərinin arasında birliyin bərpaolunmaz dərəcədə pozulmasını deyəndə nəyi nəzərdə tutur?
Politoloq Qabil Hüseynli “Bakı-Xəbər”ə bildirdi ki, ATƏT-ın Minsk Qrupunun yaradılmasından 30 il ötür və bu müddət ərzində təsisat hansısa bir uğura imza ata bilməyib: “Bu başabəla qurum 1992-ci il martın 24-də Dağlıq Qarabağ münaqişəsinin sülh yolu ilə, danışıqlar vasitəsi ilə həlli üçün təsis edilib. Lakin bu illər ərzində Minsk Qrupunun fəaliyyəti heç bir nəticə vermədi.
Azərbaycan işğalda olan torpaqlarını Minsk Qrupunun fəaliyyəti xaricində düşməndən azad etdi. Belə olan halda bu qurumun fəaliyyətinə nə ehtiyac var?
Minsk Qrupunun həmsədrlərindən biri olan Fransanın İkinci Qarabağ müharibəsi zamanı necə bir həyasızlıq göstərdiyinin şahidi olduq. Rusiyanın atdığı addımı da bu gün müzakirə edilir. Ordusunu “sülhməramlı” adı altında Qarabağda yerləşdirdi. Amerika məsələlərdən bir qədər uzaq idi. Lakin bütövlükdə Amerika da 30 il ərzində ortaya sağlam bir mövqe qoymadı.
Yəni Minsk Qrupu problemin beynəlxalq hüquq normalarına və beynəlxalq münasibətin tələblərinə uyğun həll edilməsinə səy göstərmədi”.
Politoloqun sözlərinə görə, Minsk Qrupu 30 il müddətində problemi sadələşdirmək, həll səviyyəsinə qaldırmaq əvəzinə, onu daha da mürəkkəbləşdirdi:
“Çünki onlar açıq şəkildə ermənipərəst mövqe tuturdular. Hazırda Azərbaycan tərəfi onların xidmətini və bu qrupun yenidən dirçəlməsini, sülh yaratmaq səlahiyyəti daşımasını istəmir.
Minsk Qrupunun ləğv olunmamasına səbəb isə təmsilçiləri olan dövlətlərin və ATƏT-in özündə olan müəyyən qüvvələrin onları qorumasıdır. Bu gün doğrudan da həmsədrlər arasındakı münasibətlər antoqonist səviyyədədir. Rusiya ilə ABŞ bir-birinə saksiya tətbiq edirlərsə, özləri müharibə həddindədirlərsə, onların birgə vasitəçilik səyləri necə nəticə verə bilər? Fransa ilə Rusiyanın münasibətləri də ürəkaçan səviyyədə deyil. Bu baxımdan ölkə başçısı doğru vurğulayır ki, belə təsisatın başqa işlə məşğul olması daha məqsədəuyğundur”.
Məhəmmədəli QƏRİBLİ
