Prezident İlham Əliyev yerli televiziya kanallarına müsahibəsində müharibənin daha bir epizodu barədə maraqlı fakt açıqlayıb: “Yəqin ki, bu söhbət ilk dəfə biz Zəngilan istiqamətində Ermənistanla sərhədə doğru irəliləyəndə və Ağbənd qəsəbəsinə bir neçə kilometr qalan vaxt olub. Biz məlumat aldıq ki, erməni tərəfi Rusiya tərəfinə müraciətlə xahiş edib ki, Rusiyanın Gümrüdəki hərbi bazasının kontingentinin bir hissəsi oraya, sərhədə, Zəngilana ezam edilsin.
Bunu onunla əsaslandırmaq istəyirdilər ki, guya Azərbaycan Ermənistan ərazisinin Mehri hissəsini ələ keçirmək niyyətindədir. Hərçənd bizim belə niyyətimiz yox idi. Bununla belə, Gümrüdəki Rusiya bazasının çox məhdud kontingenti oraya ezam edildi. Bu operativ informasiya bizdə vardı. Bu hadisə baş verəndən dərhal sonra erməni silahlı qüvvələri rusiyalı hərbi qulluqçuların arxasından Azərbaycan qoşunlarını atəşə tutmağa başladılar. Orada məsafə çox kiçik idi, buna görə onlar minomyotlardan da atəş açırdılar. Orada biz tələfat verdik.
Lakin təbii ki, biz cavab verdik və dərhal Rusiyaya müraciət etdilər ki, Azərbaycan rusiyalı hərbi qulluqçuları atəşə tutur. Bu dərəcədə alçaqlığı təsəvvür etmək olarmı?
Yeri gəlmişkən, Rusiya tərəfi sonralar, artıq bizimlə kontaktlarda bu hadisəni eyni ilə mənim kimi qəbul edirdi: bu, alçaqlıqdan başqa bir şey deyil. Yəni istəyirdilər ki, biz erməni mövqelərinə cavab atəşi açmaqla rusiyalı hərbi qulluqçulara ziyan vuraq, onlar öz məqsədlərinə çatsınlar və Rusiyanı bu müharibəyə cəlb etsinlər”.
Rusiya hərbi komandanlığı rus qoşunlarını bu təxribata çəkən hərbi qulluqçularla bağlı niyə hüquqi araşdırmalar aparılmayıb?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, Ermənistan müharibəni də mərdliklə apara bilmədi: “Dünyanın nüfuzlu təhlil mərkəzləri və KİV-lərində Azərbaycanın elitar səviyyədə müharibə apardığına dair çoxsaylı müzakirələrin şahidi olmuşuq. Ermənistan isə müharibənin gedişində insanlıq əleyhinə cinayətlərə imza atdı. Ballistik raketlərlə döyüş meydanından qat-qat uzaq məsafədə yerləşən şəhərlərdəki mülki əhalini hədəfə aldı. Mülki əhaliyə qarşı qadağan edilən kasetli bombalardan istifadə etdi. Yəni əlindən gələn bütün cinayətləri etdi ki, bəlkə niyyətinə çata. Prezidentin ilk dəfə açıqladığı bu faktın özü də ciddi təxribatdan xəbər verir. Çalışıblar ki, nəyin bahasına olursa-olsun, Rusiyanı prosesə cəlb edə bilsinlər. Belə cəhdlər müharibədən əvvəlki Tovuz hadisələri zamanı da olub. Sərhəddə bu təxribatları törətməklə çalışıblar güya bizim Ermənistana hərbi müdaxilə etməyimizlə bağlı rəy yaratsınlar. Hər dəfə bununla bağlı KTMT-yə müraciətlər etdilər, ancaq istəklərinə nail ola bilmədilər. Müharibənin gedişində əl atdıqları təxribat isə daha dəhşətlidir. Rusiya hərbçilərinin arxasından bizə atəş açmaqla məkrli planın həyata keçməsini hədəfləyiblər. Təbiidir ki, onların bu təxribatına stimul verən amillər də olub. Rusiya hərbçilərini həmin vaxt sərhədə çıxarmaq əmrini verən komandan barədə mütləq araşdırma aparıb, onların əməlinə lazımi hüquqi qiymət verilməlidir. Çünki bu təxribat Rusiyanı çox ciddi proseslərə və açıq müharibəyə təhrik edə bilərdi”.
Məhəmmədəli QƏRİBLİ
