“Human Rights Watch” (HRW) təşkilatı 2021-ci il üzrə hesabatını açıqlayıb. Təşkilat hesabatında dünyanın 102 ölkəsində insan haqlarının durumunu təsvir edib, hüquqların məhdudlaşdırılmasını stimullaşdıran amilləri dəyərləndirib.
Bu dəfə çalışıblar ki, hesabat "obyektiv" görünsün, ayrı-ayrı ölkələr üzrə subyektiv yanaşmanın olması aşkara çıxmasın. Məsələn, hesabatda Azərbaycanla Ermənistana bərabər şəkildə - hər birinə 7 səhifə həcmində yer ayırıblar. Yaxud, hesabatın həm Azərbaycana, həm də Ermənistana aid hissəsi II Qarabağ müharibəsinin doğurduğu nəticələrin təsviri ilə başlayır. Həmin nəticələrin aradan qaldırılması yönündə 2021-ci ildə aparılan fəaliyyətlərdən bəhs edilir. “Qərəzsiz görüntü”nü təmin etmək üçün digər texniki fəndlərdən də istifadə ediblər. Amma hesabatın "obyektivliyi" yalnız zahiri görüntüdədir. Məzmun bərbad, faktların əksəriyyəti qondarmadır. Xüsusən də hesabatda təəccüb doğuran məqam odur ki, guya Azərbaycan müharibə vaxtı Ermənistanda məktəbləri dağıdıb. Hesabatda qeyd edilir ki, İkinci Qarabağ müharibəsi zamanı Ermənistanda 71, Azərbaycanda isə 54 məktəb dağıdılıb. Belə görünür ki, təşkilatın Azərbaycana yönəlik qərəzli yanaşması əməllicə əndazəni aşıb. Məsələ ondadır ki, İkunci Qarabağ müharibəsi Ermənistan yox, Azərbaycan ərazisində gedib. Ermənistanın ərazisi Kollektiv Təhlükəsizlik Müqaviləsi Təşkilatının məsuliyyət zonasına aiddir. Əgər həmin vaxt Ermənistan ərazisinə zərbə endirilsəydi, o zaman müharibənin miqyası daha da genişlənəcəkdi və bu da bizim üçün əlavə problemlər yaradacaqdı. O baxımdan məgər Azərbaycan müharibə vaxtı Ermənistana mərmi atıb ki, hansısa məktəb dağılsın? Bu boyda yalan olar?
“Başda “Human Rights Watch” olmaqla, bir sıra “insan haqları” təşkilatları Azərbaycanı qaralamaqda yarışa giriblər”
Məsələyə münasibət bildirən Demokratik Jurnalistlər Liqasının sədri, media eksperti Yadigar Məmmədlinin fikrincə, “Human Rights Watch” təşkilatının Azərbaycana yönəlik qərəzli mövqeyi ənənə halını alıb: “Başda “Human Rights Watch” olmaqla bir sıra “insan haqları” təşkilatları Azərbaycanı qaralamaqda bir növ yarışa giriblər. Təşkilatın son hesabatı da bunlardan biridir. Cənab Prezident İlham Əliyev verdiyi bir sıra müsahibələrdə qeyd edib ki, bir sıra təşkilatlar indiki vəziyyətdə sülhə can atmırlar. Əksinə, müxtəlif vasitələrlə münaqişənin qızışmasında, dərinləşməsində maraqlıdılar. Baxmayaraq ki, 44 günlük müharibə zamanı Ermənistan ordusu darmadağın edilib. Dövlət olaraq hələ də özlərinə gəlməyiblər. Ancaq bununla barışmaq istəməyən təşkilatlar var. Onlardan biri də “Human Rights Watch”dur. Baxmayaraq ki, müharibə vaxtı Ermənistandan atılan raketlər vasitəsi ilə Gəncədə, Bərdədə bir sıra yaşayış evləri dağıdıldı, amma Azərbaycan qarşı tərəfin ərazisinə əks zərbə endirmədi. Azərbaycan Ordusu öz qisasını müharibə gedən döyüş meydanında aldı. Düşmənin çoxsaylı canlı qüvvəsi, hərbi texnikası məhv edildi. Belə olan halda Ermənistanda hansı məktəbin dağıdılmasından söhbət gedə bilər? Üstəlik, Qarabağda separatçıların nəzarətində olan yaşayış məntəqələri dağıntıya məruz qalmadı. Ordumuz yalnız hərbi infrastruktur olan nöqtələrə zərbələr endirirdi. Bunu insan hüquqlarından danışan təşkilatlar da hamıdan yaxşı bilir. Sadəcə, onlar belə qərəzli hesabatlar yaymaqla, Azərbaycanın müharibədə əldə etdiyi qələbənin təsirlərini heçə endirməyə cəhd edirlər. Qərəzli hesabatın kökündə dayanan başlıca faktorlardan biri budur. Azərbaycan regionda birgəyaşayışla bağlı təkliflərlə çıxış edir. Kommunikasiyaların açılmasını irəli sürür. Fikrimcə, bu kimi təşəbbüslər reallaşmasın deyə, belə qərəzli hesabatlar ortaya atılır. O üzdən, belə ağılagəlməz ittihamlarla Azərbaycanı ittiham edirlər”.
Bu səbəbdən ekspert hesab edir ki, Azərbaycan hər zaman belə qaralama kampaniyalarına hazır olmalıdır.
Vidadi ORDAHALLI
