Ermənistan tərəfin xarici havadarlarının məsləhətilə düzüb-qoşduğu “hərbi əsirlər” layihəsi ifşa edilsə də, yenə də kor tutduğunu buraxmayan kimi ermənilər “hərbi əsirlərin” quyruğunu buraxmaq istəmirlər. Hər zaman uydurma ittihamlarla çıxış edən Ermənistan təmsilçiləri öz yalanları ilə beynəlxalq təşkilatları yenə də aldatmaqla məşğul olur. Belə ağ yalanlardan birini Avropa İnsan Haqları Məhkəməsində (AİHM) “erməni məhbusların” maraqlarının təmsilçisi Siranuş Saakyan səsləndirib.
Saakyan iddia edib ki, guya onlarda bir çox adamların “əsirlikdə olmasına, onların “bərbad vəziyyətdə saxlanmasına” dair “faktlar” var və “hətta ola bilər ki, onların məcburi şəkildə məhv edilməsi də olub”. Saakyanın iddiasına görə, guya 80 nəfərin “əsirlikdə olduğu” “təsdiqlənib”, amma 200 nəfərin “taleyi qeyri-müəyyəndir”. Saakyan “200 nəfərin taleyinin qeyri-müəyyən olduğu” barədə yalan fikirlər bildirməklə Azərbaycana qarşı həqiqətə uyğun olmayan ittihamlar irəli sürür. Guya Azərbaycan tərəfindən 200 erməni “oğurlanıb”. Həqiqətən də gülməli ittihamdır.
“Bu iddianın heç bir məntiqi yoxdur”
Qarabağ Azadlıq Təşkilatının (QAT) sədri Akif Nağı bizimlə söhbətində bildirdi ki, Saakyanın iddiaları tamamilə əsassızdır, Azərbaycanda Ermənistanın heç bir hərbi əsiri yoxdur və bütün əsirlər 2020-ci ilin 10 noyabrından sonra beynəlxalq qurumların iştirakı ilə Ermənistana təhvil verilib. “Ermənistanın müharibədə itkiləri həddən artıq çox olub və itkiləri gizlətmək üçün bu cür saxtakarlıqlara baş vururlar. Məqsəd Ermənistanın itkilərini, ölən hərbiçilərin, əsgərlərin sayını gizlətmək, onların valideynlərini, yaxınlarını aldatmaqdır. Bundan da bir daha görsənir ki, yalançılıq ermənilərin həyat tərzinə çevrilib. Onlar artıq yalansız yaşaya bilmirlər, yalan, saxtakarlıq onların həyatının ayrılmaz hissəsidir. Ermənilər istənilən hadisə ilə bağlı yalan danışmasa o bütövlük yaranmır. “Hərbi əsirlər” məsələsinin tez-tez bu və digər şəkildə gündəmə gətirilməsi Ermənistan cəmiyyətinin narahatlıq içində olması ilə bağlıdır. Dediyim kimi ölənlər çoxdur, onların bir hissəsini “itkin düşmüş” kimi qeyd edirlər. İndi də belə iddia edirlər ki, guya Azərbaycan 200 “əsiri oğurlayıb gizlədir”. Erməni “əsirlərini” gizlətmək Azərbaycanın nəyinə lazımdır? Bu iddianın heç bir məntiqi yoxdur. Düzdür, məntiq olmasa da, dünya onların bu yalanlarına inanır, bəzi beynəlxalq təşkilatlar bu əsassız ittihamlardan Azərbaycana qarşı təzyiq vasitəsi kimi istifadə edirlər. Beynəlxalq təşkilatların da regional bölmələri Ermənistanın bu cür ağ yalanlarının genişlənməsində və bundan Azərbaycana qarşı təzyiq vasitəsi kimi istifadə edilməsində maraqlıdır. Bu beynəlxalq qurumlar ermənilərin yalanlarına şərait yaradırlar və ona “istinad” edib Azərbaycana təzyiqlər edir, hədyanlar yağıdırırlar. Avropa İnsan Haqları Məhkəməsində “erməni əsirlərin” “hüquqlarını müdafiə edən” Saakyanın iddialarının hamısı əsassızdır, Azərbaycanda “hərbi əsir” olmadığını və müharibədən sonra saxlanılanların terrorçu-diversant olduqlarını beynəlxalq qurumlar da yaxşı bilir. Odur ki, “hərbi əsirlər” layihəsindən həmin qurumlar da istifadə edir”.
A.Nağının sözlərinə görə, nə qədər ki Ermənistan real itkilərin sayını ört-basdır edəcək, bir o qədər də cəmiyyəti sakitləşdirmək üçün Azərbaycana şər atacaq. Ermənistan təmsilçiləri ölənlərin sayını gizlətmək üçün yalandan deyir ki, guya onlar Azərbaycandadır. Əslində isə bunun belə olmadığını deyən A.Nağı hesab edir ki, onlar bütün iddialarını yalan üzərində qururlar, biz də onu nəzərə almalıyıq: “Təbii ki, Azərbaycan hökuməti, xüsusən də Azərbaycan XİN buna dərhal reaksiya verməlidir, mühüm faktlar ortaya qoymalıdır. Onların müraciət etdikləri beynəlxalq təşkilatlara Azərbaycan da dərhal müraciət etməlidir, bütün sübutları ortaya qoymalıdır, faktlarla göstərməlidir ki, Ermənistanın iddiaları tamamilə əsassızdır, yalandır. Azərbaycan hökuməti “növbəti erməni yalanidır” deyib, bu məsələnin üstündən sadəcə keçməməlidir, bu yalanın qarşısı operativ şəkildə alınmalıdır. Bu yalanın qarşısı alınmasa erməni yalanı qırxayaq kimi hər yerə yayılacaq”- deyə A.Nağı vurğuladı.
İradə SARIYEVA
