İri məmurlar həbs olunandan sonra "Allah yoluna" gəlir - "Alimpaşa nümunəsi" tək deyil...

Samir Adıgözəlli: "Bir dəfə də Həccə getsələr tam "mömin" olacaqlar"

img

Taleyin qəribə işləri var, bəzən elə hadisələr eşidirsən ki, təəccüblənməyə bilmirsən. Məsələn, onlardan biri yüksək dövlət vəzifəsində işləyən korrupsioner məmurların vəzifələrini itirdikdən sonra dinə qurşanması, namaz qılıb, oruc tutması və bunu ictimailəşdirməsidir.

Hətta onlar arasında "dərddən" şeir yazıb özünü şair kimi qələmə verənlər də az deyil. Onlar elə zənn edirlər ki, günahlarını namaz qılmaqla yuya biləcəklər, odur ki, dinin qulpundan yapışırlar. Sabiq məmurların dinə, ibadətə, şairliyə meyilləri yaman kütləviləşib. Yəqin bilirlər ki, xalqımız şairi də sevir, mollanı da, ona görə də sabiq məmurlar da obraz dəyişiblər.

Mətbuatda yayılan məlumatlara görə, hazırda həbsdə olan Şəmkir rayonunun sabiq icra başçısı Alimpaşa Məmmədov keçən ilin sentyabrından namaza başlayıb, sabiq başçının şeir yazdığı, idmanla məşğul olduğu da deyilir.

Onu da bildirək ki, sabiqlər arasında namaza başlayan, şeir yazan yalnız A.Məmmədov deyil, sabiq nəqliyyat naziri Ziya Məmmədov da nazir vəzifəsindən azad ediləndən sonra namaz qıldığını, ibadətlə məşğul olduğunu, şeirlər yazdığını öz dili ilə mətbuata deyib.

Məlum olduğu kimi "Qara kəmər" əməliyyatı zamanı həbs olunan Hacı Məmmədov da türmədə boş oturmayıb. Onun sağlığında yayılan məlumatlara görə, H.Məmmədov türmədə yağlı boya ilə şəkillər çəkib, muncuqla müxtəlif əl işləri, suvenirlər düzəldib. O zaman hüquq müdafiəçisi Elçin Behbudov bu barədə mətbuata deyirdi :"Hətta o, yağlı boyalarla çəkdiyi şəkillərin beşini mənə hədiyyə edib. Onun çəkdiyi rəsm əsərlərinin hamısı şifrəlidir. O, şifrələrin anlamını heç mənə də açmır. Hacının hər rəsmində bir sirr var".

Korrupsioner və oliqarx məmurlar kimi tarixə düşən sabiqlərin çoxunun namaz qılması, şeir yazması cəmiyyətdə də qəribə qarşılanır. İnsanlar haqlı olaraq bildirirlər ki, sabiqlər indi öz günahlarını yumaq məqsədilə, arzusu ilə ibadətə başlamaq əvəzinə zamanında doğru - dürüst işləsəydi daha çox dövlətə, xalqa fayda verərdilər. Ekspertlər deyir ki, sabiqlərin demək olar ki, hamısının imici zədəlidir və xalq onlardan çox əziyyət çəkib. İndi onlar istəyirlər ki, özlərini yeni obrazda təqdim etsinlər, ona görə də mömin libasına bürünüblər.

İSBAM sədri Samir Adıgözəlli bizimlə söhbətində bildirdi ki, sabiqlərin bu gün özlərini mömin donunda təqdim etməsi təsadüfi deyil: "Onlar istəyirlər ki, camaatın, dövlətin gözündə öz ləkəli, korrupsioner imiclərini "mömin", "dindar" obrazı ilə ört-basdır etsinlər. Guya bunlar "imanlı şəxslərdir". Təsəvvür edin ki,  Prezidentə xəyanət edəndən, dövlətə, cəmiyyətə zərbə vurandan, büdcənin pulunu göyə sovurandan, nəhayət əbədi olaraq kreslolarını itirəndən sonra bunların yadlarına din, iman, namaz, şeir düşür. Bu da təbii ki, gözdən qaçmır. Niyə zamanında şəffaf işləmədilər, xalqa, dövlətə düşmən münasibətdən əl çəkmədilər ki, indi durub özlərini belə qələmə verirlər? Baxın, sabiq məmurların hansını dindirirsən özünü "təmiz adam" kimi qələmə verməyə çalışır, Prezidentə, dövlətə, xalqa "sadiq olduğunu" deyir, bu belədirsə, bəs biz bunu nə üçün onlar vəzifədə olanda görmədik? Hamısı deyir "namaz qılıb oruc tuturam", amma nədənsə hələ kütləvi olaraq Həccə gedən məmurlar yoxdur. Bir dəfə də Həccə getsələr tam "mömin" olacaqlar".

S.Adıgözəlli əlavə etdi ki, əgər səmimi olardılarsa bəzi sabiq məmurların bu yolu tutması belə təəccüblə, ironiya ilə qarşılanmazdı. "Əgər sabiq məmurlar zənn edirlər ki, xalqı, dövləti, Prezidenti aldatdıqları, onlara xəyanət etdikləri kimi Allahı da aldada bilərlər, yanılırlar... Allah heç kəsin yolunu ora salmasın. Bəziləri namaz və oruc söhbəti ilə özlərini Allahın yanında sığortalamağa çalışırlar. Bu bizim sabiq məmurların düşüncəsidir. Düzdür, insan dar gündə olanda Allahın ətəyindən yapışır. Bu təbiidir.

Xalqın, dövlətin başına bu qədər oyunlar gətirən, xəyanətlər edən, Prezidentin etimadını qıran bu adamlar indi dindar və şair olublar. İstər vəzifəsini itirsə də həbs olunmayan, istərsə də həbs olunan sabiq məmurlar başa düşməlidir ki, din, oruc, namaz sevgisi, tələbatı insanın daxilindən gəlməlidir, yoxsa zahiri ibadət heç kəsə gərək deyil".

İradə SARIYEVA

Son xəbərlər