Ukrayna - Rusiya münasibətlərində İlham Əliyevin vasitəçiliyi gündəmdə ən aktual mövzu kimi...

Arzuman Abdulkərimov: “Biz belə bir təşəbbüsü bir neçə il əvvəl gərginləşən Türkiyə-Rusiya münasibətləri fonunda gördük”

img

Prezident İlham Əliyevin Ukraynaya etdiyi rəsmi səfəri dünyanın aparıcı KİV-lərinin diqqət mərkəzindədir. Bir sıra analitiklərin qənaətincə Azərbaycan Rusiya ilə Ukrayna arasındakı ziddiyyətin aradan qaldırılmasında vasitəçilik rolunu oynaya bilər. Qeyd edək ki, Azərbaycanın belə uğurlu vasitəçilik təşəbbüsləri olub və yaxşı sonluqla nəticələnib.

Rusiya-Ukrayna münaqişəsinin həlli üçün Azərbaycanın vasitəçilik cəhdləri səmərə verə bilərmi?

Ana Vətən Partiyasının sədr müavini Arzuman Abdulkərimov “Bakı-Xəbər”ə açıqlamasında bildirdi ki, belə təşəbbüs Qərb-Rusiya masasında heç bir nəticə əldə edə bilməyən Kiyev üçün də, məsələni Qərblə yox, Ukraynanın özü ilə müzakirə etmək istəyən Moskva üçün də cəlbedicidir: “Ankara və Bakı isə Rusiya-Ukrayna münaqişəsində, ümumilikdə yeni soyuq müharibə cəbhəsində tərəfə yox, vasitəçiyə çevrilə bilər.

Əliyevin Ukrayna səfəri bu kontekstdə təsadüfi deyil. İstisna deyil ki, Ərdoğan Putinlə, Əliyev Zelenski ilə vasitəçiliyin ilkin təməlinin atılması istiqamətində iş aparır. Rusiya Azərbaycanın yaxın qonşusudur, ölkələrimiz arasında hərtərəfli sıx dostluq əlaqələri mövcuddur. Azərbaycanın həm Ukrayna, həm də Rusiya ilə əlaqələrinin böyük tarixə malik olduğunu ayrıca vurğulamağı lazım bilirəm. Azərbaycana dost olan ölkələrin arasında qarşıdurmanın yaranmasını və dərinləşməsini arzu etmir.

Biz mümkün qədər tezliklə hər iki ölkə arasında gərginliyin aradan qaldırılmasının tərəfdarıyıq. İnanıram ki, bu bütün tərəflərin maraqlarına cavab verir, habelə bölgədə xoşagəlməz proseslərin qarşısını almağa xidmət göstərə bilər. Qəti əminliklə demək istəyirəm ki, Azərbaycan tərəfi Ukrayna ilə Rusiya arasında yaranmış arzuolunmaz gərginliyin tezliklə aradan qaldırılması naminə hər iki ölkə ilə dostluq münasibətləri çərçivəsində xidmətlərini təklif etməyə, zəruri addımlar atmağa hazırdır. Azərbaycan çox etibarlı bir aktordur. Biz belə bir təşəbbüsü bir neçə il əvvəl gərginləşən Türkiyə-Rusiya münasibətləri fonunda gördük. Həmin vaxt Azərbaycanın vasitəçiliyi ilə iki ölkə arasındakı münasibətlər yoluna düşdü”.

Məhəmmədəli QƏRİBLİ

Son xəbərlər