“Məsələni elə qoymuşam ki, Ermənistana hansı şərtlərlə və hansı məbləğdə vəsait veriləcəksə, eyni şərtlərlə eyni məbləğdə bizə də verilsin”. Bunu Prezident İlham Əliyev yerli televiziya kanallarına müsahibəsində deyib.
Dövlət başçısı qeyd edib ki, bu ədalətsizlik həyatda öz əksini taparsa, o zaman Azərbaycan səssiz qalmayacaq: “Biz çox təəccüb etdik ki, böyük dağıntılara məruz qalmış Azərbaycana cəmi 140 milyon, Ermənistana isə 2,6 milyard avro maliyyə paketi nəzərdə tutulur. Bu ədalətsizlikdir. Hətta onu deyə bilərəm ki, dekabr ayında Brüsseldə İtaliya jurnalistinə müsahibə verərkən jurnalist məndən soruşdu ki, bu nə dərəcədə ədalətlidir. Yəni bunu təkcə mən demirəm. Artıq bu, Avropa məkanına yayılmış bir məsələdir. Mən bunu ictimai qaydada da dilə gətirmişəm həmişə. Bu ədalətsizlikdir və bunun izahatı bizə lazımdır. Əgər bu ədalətsizlik həyatda öz əksini taparsa, əlbəttə ki, biz səssiz qalmayacağıq. Nəinki səssiz qalmayacağıq, bu, Avropa İttifaqı-Azərbaycan əlaqələrinə çox böyük mənfi təsir göstərəcək. Çünki əhali və ərazi baxımından Azərbaycan Ermənistandan beş dəfə böyükdür. Ermənistanda bir dənə də bina dağılmayıb. Bizim Livan boyda ərazimiz tamamilə yerlə-yeksan edilib. Bizə cəmi 140 milyon, onlara 2,6 milyard? Hansı əsasla, əsas nədir?! Qoy, izahat versinlər. Mən məsələni elə qoymuşam ki, Ermənistana hansı şərtlərlə və hansı məbləğdə vəsait veriləcəksə, eyni şərtlərlə eyni məbləğdə bizə də verilsin”.
Məlum olur ki, Avropa İttifaqının məlum yanaşmasının hansısa siyasi, iqtisadi, hüquqi və məntiqi əsası yoxdur. Çünki nəzərdə tutulan yardım paketi arasında o qədər böyük fərq var ki, təəccüblənməmək mümkün deyil.
“Azərbaycana qarşı belə ədalətsiz qərarların verilməsinin kökündə həm də xristian təəssübkeşliyi dayanır”
Məsələyə münasibət bilfdirən AMİP-in sədr müavini Afsəddin Nəbiyevin fikrincə, Avroittifaqın sərgilədiyi siyasət ikili yanaşmanın bariz nümunəsidir: “Avropa İttifaqının Ermənistana və Azərbaycana yardım paketinin ən azından eyni məbləğdə nəzərdə tutulmaması qurumun ikili standartlar siyasətinin bariz nümunəsidir. Bu elə bir ədalətsizlikdir ki, bəlkə də dünya tarixində belə bir hal baş verməyib. İşğal müddətində yüz milyardlarla dollarlıq ziyana məruz qalan Azərbaycan dövlətinə cüzi məbləğdə yardım paketi nəzərdə tutulduğu halda, işğalçı Ermənistana böyük məbləğdə yardım nəzərdə tutulur. Tarixə nəzərə salsaq görərik ki, Azərbaycan dövləti belə ədalətsiz qərarlarla hər zaman üz-üzə qalıb. Elə götürək 1992-ci ildə Buş administrasiyası tərəfindən Konqresə müzakirəyə verilən "Azadlığı Müdafiə Aktı" kimi tarixə düşən "907-ci bölmənin" qəbul olunmasını. Bu əlavə ilə Azərbaycan dövləti Amerika hökumətinin keçmiş sovet respublikalarına göstərdiyi yardımından xaric edildi. O zamanlar bu ədalətsiz qərarın verilməsi həm erməni lobbisinin gücü, həm də bu qanun qəbul edilən zaman Azərbaycanın Vaşinqtonda heç bir nümayəndəliyinin olmaması ilə izah olunurdu. Üstündən 30 il keçməsinə baxmayaraq, belə bir qərarın Avropa İttifaqı tərəfindən verilməsi ikili standartları ən eybəcər formada ortaya çıxarılmasına bir sübutdur. Azərbaycana qarşı belə ədalətsiz qərarların verilməsinin kökündə həm də xristian təəssübkeşliyi dayanır. O üzdən, belə halların baş verməsi dünyada sülhün, təhlükəsizliyin qorunmasına əngəllər yarada bilər”.
Sonda sədr müavini onu da qeyd etdi ki, dünya dövlətləri bir ovuc erməni lobbisinin əlində əsir-yesir olmaqdansa, dünyamıza təhlükə yaradan problemlərlə məşğul olsunlar.
Vidadi ORDAHALLI
