Vüqar Rəhimzadə: “Ermənistan danışqlarda həyasız mövqe sərgilədikcə, addım-addım müharibə yaxınlaşırdı”
“Hər şeyi vaxtında etmək lazımdır, İkinci Qarabağ müharibəsi də onu göstərdi”. Bunu Prezident İlham Əliyev yerli televiziya kanallarına müsahibəsində deyib.
Ölkə başçısının sözlərinə görə, prezident seçildiyi ilk dövrlərdə məsələnin sülh yolu ilə həll ediləcəyinə inanıb: “Prezident seçiləndə mənim 41 yaşım var idi və təcrübəm də o qədər böyük deyildi və mən o vaxt beynəlxalq hüquqa inanırdım. İnanırdım ki, ədalət haradansa göydən düşüb bizim məsələmizi həll edəcək. Sonra başa düşdüm ki, ədaləti biz özümüz bərpa etməliyik. Danışıqların birinci mərhələsində, mənim iştirak etdiyim dövrdə belə ümidlərim var idi. Sonra isə gördüm ki, artıq bunun heç bir əhəmiyyəti yoxdur. Xüsusilə indiki Ermənistan hakimiyyəti bunu yenə də açıq-aşkar bəyan edəndə, faktiki olaraq, danışıqlara öz bəyanatları və yersiz addımları ilə son qoyanda, artıq tam aydın oldu ki, vaxt itirmək mümkün deyil. Bilirsiniz, bir şeyi də deməliyəm, hər şeyi vaxtında etmək lazımdır. İkinci Qarabağ müharibəsi də onu göstərdi. Bir il əvvəl bəlkə də tez idi, bir il sonra gec idi, hər şey vaxtında. Bu vaxtı müəyyən etmək, düzgün seçmək, avantüraya getməmək, ölkəni risq altına salmamaq və mümkün dərəcədə maksimum uğura nail olmaq, əlbəttə ki, böyük zəhmətin işidir. Bunu mən tamamilə açıq deyə bilərəm”.
Görünən odur ki, İkinci Qarabağ müharibəsinin vaxtı seçilərkən bütün parametrlər incəliyinə qədər hesablanıb. O baxımdan maraqlıdır, bəs ekspertlər bunu necə dəyərləndirir? Müharibənin vaxtının düzgün seçilməsi nə deməkdir?
- “Prezidentin böyük siyasi zəkası sayəsində müharibənin vaxtı düzgün seçildi”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, Prezident İlham Əliyevin böyük siyasi zəkası sayəsində müharibənin vaxtı düzgün seçildi: “Nəticədə proseslər bizim xeyrimizə inkişaf etməyə başladı. İkinci Qarabağ müharibəsinə qədər ölkədə ardıcıl siyasət aparıldı. Xarici, daxili siyasətdə, ordu quruculuğunda aparılan işlər bir-birini tamamladı. Qarabağla bağlı beynəlxalq müstəvidə siyasi mövqelərimiz möhkəmləndirildi. Söhbət ondan gedir ki, Qarabağla bağlı qəbul olunan bir sıra qərarlar hüquqi baxımdan işin daha möhkəm təməllər üzərində qurulmasına öz təsirini göstərdi. BMT-nin məlum 4 qətnaməsindən savayı bir sıra beynəlxalq qurumlar Azərbaycanın ərazi bütövlüyünə yönəlik qərarlar qəbul etdilər. Bütün bunların fonunda Ermənistan danışqlarda həyasız mövqe sərgilədikcə, addım-addım müharibə yaxınlaşırdı. Ancaq bunun vaxtını elə seçmək lazım idi ki, hansısa xoşagəlməz situasiyalar yaranmasın. Çünki bu, çox böyük məsuliyyətli bir qərar idi. Cənab prezident bütün bunları çox böyük ustalıqla həyata keçirdi. Bütün bunların nəticəsi olaraq Azərbaycan böyük bir qələbə qazandı. Əldə olunan qələbə ona qədər aparılan siyasətin necə dəqiq olduğunu, bir-birini tamamladığını bir daha təsdiq etdi. Nəzərə almaq lazımdır ki, müharibəyə başlamağın vaxtının düzgün seçilməsi məhz Ali Baş Komandanın sayəsində mümkün oldu. Çünki hər zaman əlverişli geosiyasi məqam yaranmır. O baxımdan biz şanslı millətik ki, İlham Əliyev kimi prezidentimiz var”.
V.Rəhimzadə onu da qeyd etdi ki, İkinci Qarabağ müharibəsində əldə edilən qələbədən sonra bütün dövlətlər Azərbaycanla hesablaşır.
Vidadi ORDAHALLI
