Prezident İlham Əliyev yerli televiziya kanallarına müsahibəsində bildirib ki, biz görürük, Qarabağa, Xankəndiyə və Rusiya sülhməramlı qüvvələrinin nəzarətində olan digər yerlərə gələnlərin sayı gedənlərin sayı ilə böyük fərq təşkil edir:
“Daha çox insan oradan gedir. Biz bunu izləyirik. Bir şeyi də izləyirik ki, gedən maşınların 91 faizi, - bax, 91 faiz deməklə, o cümlədən mən bildirirəm ki, biz bunu nə dərəcədə dəqiqliklə bilirik, - yoxlanılmır. Oradan çıxan maşınların cəmi 46 faizi yoxlanılmır. Yəni, bu, nəyi göstərir? Onu göstərir ki, Rusiya sülhməramlı qüvvələri çalışırlar, giriş sərbəst olsun, çıxışda isə müəyyən problemlər olsun. Yəni, o maşını dayandırırlar, sorğu-suala tuturlar və sair. Yəni, istəyirlər ki, insanlar oradan getməsinlər. Bu isə təsadüfən ola bilməz. Bu dərəcədə fərq ola bilməz. Biz maşınların da, insanların da sayını bilirik, nə qədər insan girib, nə qədər çıxıb və bu da qəbuledilən məsələ deyil. Bizdə olan məlumata görə, müharibə dövründə oradan çıxmış əhalinin 38 mini İkinci Qarabağ müharibəsindən sonra qayıdıbdır və qayıdanlardan 11 mini oranı həmişəlik tərk edib. Dəqiqləşdirilmiş məlumata görə, indi Rusiya sülhməramlılarının nəzarətində olan ərazidə 27 min insan yaşayır. Bax, bu iki məsələ istisna olmaqla, bütövlükdə, yenə də deyirəm, onların funksiyasını mən müsbət qiymətləndirirəm. Ciddi insidentlər olmamışdır. İnsidentlər Ermənistan-Azərbaycan sərhədində baş verib, yəni, o zonada ciddi insidentlər olmayıb”.
Maraqlıdır ki, Rusiya rəsmi dairələri Qarabağdakı onların nəzarəti altında olan ərazilərdə 57 min ermənin yaşadığını bəyan edib. Prezidentin səsləndirdiyi konkret rəqəmlə onların dediyinin arasındakı kəskin fərq nədən ibarət ola bilər?
Hüquq müdafiəçisi Əhməd Şahidov “Bakı-Xəbər”ə açıqlamasında bildirdi ki, ölkə başçısı bizim üçün olduqca mötəbər mənbədir: “Ölkənin birinci şəxsi bunu dəqiq faktlara söykənərək səsləndirir. Müharibənin bitməsindən dərhal sonra Qarabağa yeganə giriş qapısı olan Laçın dəhlizinə müşahidə kameraları quraşdırılıb. Ora girən və çıxan bütün maşınların statistikası aparılır. Ölkə başçısının səsləndirdiyi rəqəmlə rus sülhməramlılarının açıqladığı rəqəmlər arasında ciddi fərq nəzərə çarpır. Maraqlı olan Rusiyanın səsləndirdiyi fikirlərdi. Belə səhv statistikanın təqdim edilməsi, bəllidir ki, başqa məqamlardan xəbər verir. Hətta orada güya rus icmasının olması ilə bağlı da yalnış məlumatlar dövriyəyyə buraxılır. Bütün bunlar Rusiyanın bölgə ilə bağlı uzun bir planının olmasından xəbər verir. Süni şəkildə əhalinin sayının artırılması həm də gələcəkdə həmin insanların Rusiya vətəndaşlığına qəbul edilməsilə nəticələnə bilər. Çünki Rusiya bu metodlardan digər separatşı ərazilərdə istifadə edib. Prezidentin ortaya sərt və dəqiq mövqe ortaya qoyması çox vacibdir. Hesab edirəm ki, bölgədə yaşayan ermənilərin sayı ilə bağlı Rusiyanın rəsmi dairələrinə xəbərdarlıqlar edilməlidir. Bir neçə dəfə olub ki, Rusiyanın yer adları ilə bağlı səhv təqdimatına verilən rəsmi reaksiyalar öz nəticəsini verib. Prezidentin müsahibəsində məhz bu məqama toxunması təsadüf deyil. Bir daha mesaj verilir ki, kimsə bizim daxili işlərimizə müdaxilə edə bilməz. Azərbaycan öz ərazisində hansı sayda insanın yaşadığını ən dəqiq bizim özümüz müəyyən edə bilərik. Düşünürəm ki, bu məsələ də öz həllini tapmış olacaq. Bununla da Rusiyanın ermənilərin sayı ilə bağlı manipulyasiya cəhdlərinin qarşısı alınacaq”.
Məhəmmədəli QƏRİBLİ
