Erməni hərbi postlarında heç it də yaşamaz!..

img

Bu günlərdə yerli televiziya kanallarına müsahibəsində Prezident İlham Əliyevin toxunduğu maraqlı məsələlərdən biri də erməni postlarındakı durum oldu.

Azərbaycanın azad edilmiş ərazilərdə yaratdığı hərbi və digər infrstuktur haqda danışarkən bu xüsusda dövlət başçısı qeyd edib: “Ermənistanla həmsərhəd olan yerlərdə biz 700 kilometrə yaxın yol çəkmişik. Yəni bu, xidməti yol sayıla bilər, hərbi yol sayıla bilər. Mövqelərə gedən yoldur, sərhədlərə gedən yoldur, yüksək dağlara, təpələrə gedən yoldur. Texnikanı gətirməliydik, mütəxəssisləri gətirməliydik. O tərəfdən bizim işçilərə müntəzəm olaraq atəş açılır. Ermənistan, əfsuslar olsun ki, İkinci Qarabağ müharibəsindən axıra qədər dərs çıxarmayıb. Ona görə çox çətin bir şəraitdə bunu bacardıq və biz bu gün bütün sərhəd boyu əsas məntəqələrdə yerləşdik. Nəinki yerləşdik, eyni zamanda, orada xidmət aparmaq üçün biz müasir infrastruktur qurduq. Çünki orada hava çox soyuqdur və xidmət aparmaq çox çətindir. Qarın qalınlığı bəlkə də 3-4 metrdir. İndi isə həm təchizat, həm ərzaq, həm də yollar, elektrik xətləri çəkilib və orada biz indi normal xidmət aparırıq, amma erməni postlarına baxdıqda görürük ki, bunlar nə dərəcədə acınacaqlı vəziyyətdədir. Yəni çadırlarda məskunlaşıblar və üşüyə-üşüyə, dona-dona orada güc-bəlaynan qalırlar. Ona görə yollar və elektrik xətləri həm də bu məqsəd üçün lazımdır. Çünki biz bu sərhədlərə çıxmalıydıq, bu sərhədi qorumalıydıq və bu gün buna nail olmuşuq – sərhədboyu Arazdan Murov dağına qədər. Eyni zamanda, elektrik təsərrüfatının yaradılması prosesinə start verildi və biz bütün azad edilmiş torpaqlarda bir ildə 7 yarımstansiya inşa etdik və bütün bu yarımstansiyaları ümumi dairəvi şəbəkəyə qoşduq. Heç biri indi avtonom qaydada işləmir. Yəni orada, misal üçün, indi alınan güclər və su elektrik stansiyalarında istehsal edilən güclər ümumi şəbəkəyə daxil edilir. Beləliklə bu bizə imkan verir ki, böhranlı vəziyyət yaranmasın”.

Həqiqiətən də erməni postlarında postmüharibə dövründə də acınacaqlı bir durum hökm sürür. Sosial şəbəkələrdə bu xüsusda paylaşılan görüntülərin sayı kifayət qədərdir. Bu görüntülər bir daha təsdiq edir ki, 44 günlük Qarabağ müharibəsində ağır zərbə alan Ermənistan ordusunun özünə gəlməsi hələ bir neçə illər mümkün olmayacaq. Belə bir vaxtda Azərbaycan tərəfinin erməni mövqelərini yenidən çəkməsi ilə bağlı növbəti video sosial şəbəkələrdə yayılıb. Bu, yenidən Ermənistanda böyük əks-səda doğurub. “Yerevan Today”ın baş redaktoru Sevak Hakopyan Azərbaycan tərəfinin hazırladığı videonu hələ dekabrda gördüyünü və bunu utanc hissi ilə izlədiyini deyib. Hakopyan bildirib ki, bu haqda danışmaq istəməsə də, ancaq susmaq da olmaz:

“Azərilər Laçında erməni hərbi bazalarına yaxınlaşdılar və əsgərlərimizin hansı şəraitdə mövqe tutduğunu göstərdilər. Üst-üstə yığılmış bir neçə daşdan post düzəldilib və orada hər an ölməyə hazır olan əsgərlərimiz görünür. Bu bazaların ümumiyyətlə heç nədən qorunmadığı açıq-aydın müşahidə olunur. Erməni əsgəri bu şəraitdə dövləti müdafiə edir”. Daha sonra erməni jurnalist fikirlərini belə davam etdirir: “Biz bilirdik ki, əsgərlər bu cür şəraitdə yaşayır, hərbi bazalar təchiz olunmur. Bu günlərdə Qafan rayonunda əsgərlərimiz ağır şəraitdə xidmət etmələri ilə bağlı video yayıblar. Hərbi polis isə onları mövqeləri düşmənə göstərməkdə və dövlət sirrini açmaqda ittiham edib. Nikol Paşinyan Nazirlər Kabinetinin tribunasından qışqırır ki, niyə mövqeləri düşmənə göstərirsiniz, niyə təchizatın olmadığını bildirirsiniz? Əslində Nikol bütün bunları çox yaxşı görür. O, erməni mediasına mövqelərə getməyi qadağan edib, amma azərbaycanlılar bizim əsgərlərdən cəmi 70-80 metr aralıdadır. Onlar siz Paşinyanın erməni əsgərləri biabırçı şəraitdə saxladığınızı yaxşı görürlər və hətta bunu çəkirlər. Ermənistan rəhbərliyi öz əsgərlərini düşünmür. 44 günlük müharibədən sonra neçə mövqe verdiniz? Mövqelərimiz təchiz edilmədiyi üçün nə qədər əsgərimizi itirdik? Düşmən mayın 12-də gəlib yüksəkliyi ələ keçirdi. O əsgərlərin təhlükəsizliyini düşünməkdənsə, onların sağlığına içirsən və problemləri həll etmək əvəzinə məclislərdə rəqs edirsən, hər şeyin yaxşı olduğunu göstərmək üçün şəkil çəkdirirsən. Siz heç bir hərbi bazanı təchiz etmirsiniz, amma bu müddət ərzində Müdafiə Nazirliyinin əməkdaşlarına təmtəraqlı mükafat vermisiniz, deputatları təltif edirsiniz, sizə səs verən nazirləri, qubernatorları mükafatlandırırsınız. Ordunu təchiz etmək üçün pul yoxdur, amma baş nazirin villasının əsaslı təmiri üçün maliyyə tapılır. Bilirsiniz, baş nazir Nikol Paşinyan və və müdafiə naziri erməni əsgərini bu vəziyyətə salıb. İndi Nikol oğlunun, Suren Papikyan isə öz toyuna hazırlaşır. Yanvarın 11-də həlak olan Vahan, Rudik, Artur kimi 19-20 yaşlı oğlanlarımız isə Nikolun təhlükəsizliyini öz canları hesabına təmin etməlidirlər”. Erməni ordusunun qışa hazırlığının, təchizatının ən aşağı, Azərbaycan ordusunun isə çox yüksək səviyyədə olduğunu yazan erməni mediası  hökumətin xalqı aldatdığını bildirir.

Tahir TAĞIYEV

Son xəbərlər