“...Artıq 18 ildir ki, mən Prezident vəzifəsində işləyirəm və mənim təşəbbüsümlə çoxlu kadr dəyişikliyi edilib. Əfsuslar olsun, bəzi hallarda kadr dəyişikliyi vəziyyətin müsbətə doğru dəyişməsinə aparmır. Çünki yeni kadr təyin edilir, müəyyən müddət ərzində özünü verilmiş təlimatlara uyğun aparır, amma sonra vaxt keçdikcə, necə deyərlər, köhnə, əyri yola gedir. Ona görə burada cəza tədbirləri ilə yanaşı, kadrların düzgün seçilməsi məsələsi öz rolunu oynamalıdır...” Bu fikirləri Azərbaycan Televiziyalarına müsahibəsində Prezident İlham Əliyev bildirib.
Prezidentin etimad göstərib vəzifələrə təyin etdiyi yeni kadrların bir qismi özünü niyə doğrultmur? Məgər özlərindən əvvəlki məmurların taleyi onlara dərs olmadımı?
Bünyamin Qəmbərli: “Təyin edilən məmurlara, kadrlara nəzarət edəcək mexanizmlər yoxdur”
Prezidentin yeni dövr kadrlarından narazılığını şərh edən sabiq millət vəkili Bünyamin Qəmbərli “Bakı-Xəbər”ə bildirdi ki, Prezidentin yerli TV-lərə müsahibəsi, orada səsləndirdiyi fikirlər cəmiyyətdə maraq doğurub: “Prezident ilk dəfə idi ki, eyni zamanda bir neçə yerli kanala müsahibə verirdi. Düzdür, əvvəllər ayrı-ayrılıqda kanallara müsahibə vermişdi, amma bu birinci hal idi. Çox istəyirəm ki, bu ənənə davam etsin və eyni zamanda ictimai fəalların da Prezidentə sual vermək imkanı yaradılsın. Yəni bu, Prezidentin yalnız TV jurnalistlərinin suallarına cavab verməklə məhdudlaşmasın, həm də cəmiyyəti düşündürən, narahat edən suallar da verilsin, bu, ictimai fəallığın artmasına da bir vasitə olardı. Çox zaman ictimaiyyətin səsi Prezidentə lazımı səviyyədə çatmır. Konkret olaraq kadr məsələsinə gəlincə, düşünmürəm ki, Azərbaycanda ciddi kadr dəyişikliyi olub, bu daha çox kosmetik dəyişiklik olub. Belə götürsək, Azərbaycanda bütün icra hakimiyyəti başçıları ilə bağlı əhali arasında, mətbuatda çox neqativ fikirlər var. Eyni zamanda nazirlər, başqa iri çaplı məmurlar, hüquq-mühafizə sistemində təmsil olunan yüksək vəzifəli şəxslər barədə xoşagəlməz rəylər, fikirlər mövcuddur. Biz bu barədə tez-tez eşidirik. Amma bunların bir neçəsi haqqında ölçü götürülməsi o demək deyil ki, bu kimi hallar tamamilə aradan qaldırılıb”.
B.Qəmbərlinin sözlərinə görə, Prezidentin dediyi fikirlərdə böyük həqiqət var, doğrudan da təyin edilən kadrlar bir müddət yaxşı işləyir, sonra neqativ əməllərlə məşğul olurlar, yollarını azıb köhnələrin yolu ilə gedirlər. “Prezident kadrları təyin edir, onlar bir müddət özlərini normal göstərirlər, amma sonradan əyri yollarla gedirlər. Bu da təbiidir. Çünki yeni təyin edilən məmurlara, kadrlara nəzarət edəcək mexanizmlər yoxdur. Prezident ictimaiyyətə dəfələrlə səslənib, bu dəfə də səsləndi ki, ictimai fəal olmalıdır. Prezident özü də deyir ki, ictimaiyyətin ən institutlaşmış forması müxalifətdir. O müxalifət isə yoxdur. Yəni hardasa 200-300, 1000 nəfəri ətrafına toplayan siyasi liderlərlə partiyalar olmur. Ciddi siyasi partiyalar, müxalifət olmalıdır ki, yeni təyin edilən kadrların fəaliyyətinə də ciddi nəzarət olunsun, kadrlar da öz məsuliyyətlərini hiss etsinlər. Müxalifət də sadəcə nəzarətlə yox, yeni təkliflərlə çıxış etməli, onların qanun pozuntuları ilə həm kütləvi informasiya vasitələrində, həm də aidiyyəti toplantılarda fikir bildirməlidir. İkincisi isə QHT-lərdir ki, sivil toplum quruluşları da ciddi şəkildə formalaşdırılmalıdır. Bunlar formalaşdırılmadan hansısa yeni kadrlardan normal fəaliyyət gözləmək olmaz, kosmetik dəyişikliklərlə kadr dəyişkiliyi və islahat mümkün deyil. Üçüncüsü ciddi müstəqil mətbuatın olmasıdır... Bu olmadıqda nöqsanların lazımınca işıqlandırılması mümkün deyil. Amma ciddi, müstəqil mətbuatın olması Prezidentin dediyi ictimai nəzarəti, bu sahədə institutlaşmanı həyata keçirməkdə mühüm addım ola bilərdi. Ən nəhayət, bu sistemdə kadrların dəyişməsi ciddi bir dəyişikliyə apara bilməz, bütövlükdə sistem dəyişməlidir. Sistem demokratik sistem olmalıdır...”- deyə B.Qəmbərli qeyd etdi.
Aydın Xan Əbilov: “Yeni kadrların bəzilərinin də köhnələrin yolu ilə getməsinin səbəblərindən biri odur ki...”
Vətəndaş Cəmiyyəti Alyansının rəhbəri Aydın Xan Əbilov isə bizimlə söhbətində bildirdi ki, Prezident ölkədə hər istiqamətdə ciddi kadr islahatları həyata keçirir, bu kadr islahatlarına isə məmurlar kölgə salır. Prezidentin yeni təyin etdiyi kadrların çoxunun ictimaiyyətlə, cəmiyyətlə dil tapmaq istəmədiyini deyən A.X.Əbilovun sözlərinə görə, bununla da kadrlar Prezidentin etimadını doğrultmurlar: “Prezident haqlı olaraq özünü doğrultmayan, xalqa lazımı səviyyədə xidmət edə bilməyən kadrların davranışını kəskin tənqid edir. Yeni təyin edilən kadrların bir qisminin özünü doğrultmadığını, Prezidentin etimadına layiq olmadığını görürük. Çox təəssüflər olsun ki, bu insanlar xalqla, camaatla işləməyi bacarmırlar, onlarla dil tapmaq istəmirlər. Yeni kadrların bəzilərinin də köhnələrin yolu ilə getməsinin səbəblərindən biri odur ki, yeni kadrlar da kabinetdən çıxıb xalqla qaynayıb-qarışmırlar. Prezident onları vəzifəyə qoyanda, xüsusən də rayonlara icra başçıları təyin edəndə onlara ilk tövsiyəsi bu olur ki, xaqla canlı ünsiyyətdə olun, onların problemlərini şəxsən dinləyin, həll edib. Amma görək bizim neçə icra başçımız xalqa yaxın gedir, neçəsi xalqla ünsiyyətdədir. Yenə də narazlıqlar, yenə də xoşagəlməzliklər baş verir”.
İctimai nəzarətə gəlincə, qurum rəhbəri bildirdi ki, mütəmadi olaraq məmur özbaşnalığını ciddi tənqid edənlərdən biri o olub, lakin məmurlar bundan nəticə çıxarmaq istəmir. Bəziləri özünü hələ də cəzasızlıq mühitində hiss etdiyini deyən A.X.Əbilovun sözlərinə görə, kadrların özlərinin vicdan hissi və vətənpərvərliyi olmalıdır, görünür, onların çoxu bu hisslərdən uzaqdır.
İradə SARIYEVA
