Yanvarın 10-da Rusiyanın paytaxtı Moskva şəhərində 91 yaşında vəfat edən Azərbaycan SSR Kommunist Partiyası Mərkəzi Komitəsinin 13-cü Birinci katibi Əbdürrəhman Vəzirov Moskvada Troekurovskoe qəbristanlığında həyat yoldaşının məzarının yanında dəfn olunub.
Ə.Vəzirovun dəfnindən yayılan fotolar müxtəlif iddialara, fikirlərə yol açıb. Sosial şəbəkələrdə Vəzirovun xristianlığı qəbul etdiyi barədə iddialar var. Bu fikirdə olanlar hesab edirlər ki, Vəzirovun xristiansayağı kostyumda, üzüacıq dəfn olunması onun xristianlığı qəbul etdiyinə dair iddiaların ortaya çıxmasına əsas verir.
Başqa iddiaya görə isə, xristiansayağı dəfn edildiyi deyilən Vəzirovun məzarı üstündə Quran ayələri də oxunub. Onun xristiansayı, amma Quran ayəsi ilə dəfn edilməsi də müəyyən ziddiyyətli fikirlərin yaranmasına səbəb olub. Bəzi sosial şəbəkə istifadəçiləri Vəzirovun bu cür dəfnini onun son nəfəsinə qədər bolşevik əqidəsinə sadiq qalmasına, ateist kimi dünyadan köçməsinə bir işarə olduğunu deyir, bəziləri isə əksinə, dinimizdən üz döndərdiyini iddia edirlər.
Dogrudanmı, Ə.Vəzirov xalqından üz döndərdiyi, onu dar gundə qoyub qaçdığı kimi islam dinindən də imtina edibmiş?
“…Fotolardan açıq görsənir ki, müsəlman qaydalarına uyğun dəfn olunmayıb”
İctimai Siyası Proseslərin Beynəlxalq Araşdırılması Mərkəzinin rəhbəri, politoloq Samir Adıgözəlli “Bakı-Xəbər”ə bildirdi ki, insanların bu fikri irəli sürməsi səbəbsiz deyil, çünki dəfndən yayılan görüntülər Vəzirovun sağlığında islamdan üz döndərdiyini, bir xristian kimi dəfn edildiyini düşünməyə əsas verir: “Hamı kimi mən də o fotoşəkilləri görmüşəm və burda müsəlman olan bir şəxsin dəfn təəssüratı yaradan elementlər yoxdur. Bu fotolara baxan adam bilmir ki, dəfn olunanın müsəlmandır, onu daha çox xristiana bənzədirlər. Dəfndən çəkilən fotolar da insanlarda belə təəssürat yaradır ki, Vəzirov Azərbaycan xalqına etdiyi xəyanəti islam dininə qarşı da edib. Ona görə də, sosial şəbəkələrdə insanlar onun xristian adətilə dəfn edildiyini deyirlər. Hamı kimi məndə də onun dəfn şəkilləri təəccüb yaratdı, onun xristianlığı, yaxud başqa bir dini qəbul etdiyini bilmirəm, yəqin bu barədə yaxınları açıqlama verər. Amma fotolardan açıq görsənir ki, müsəlman qaydalarına uyğun dəfn olunmayıb. Elə bu onun tabutundan da görsəndi, əynində kostyum vardı, üzü açıq idi, kəfənlənməmişdi. Buna yəqin ailəsi münasibət bildirər, aydınlıq gətirər. Amma bir məsələdə rahatlıq tapdım ki, Vəzirovu gətirib müqəddəs torpağımızda dəfn etmədilər, o, Azərbaycanda basdırılamadı. Çünki bu torpaqlara şəhidlərimizin qanı tökülüb”.
S.Adıgözılli dedi ki, Vəzirovun tərəfdarları nə qədər onun 20 yanvar faciəsində əli olmadığını desələr də, bu düzgün deyil. S.Adıgözəllinin sözlərinə görə, Vəzirovun hadisələrdən iki gün əvvəl istefa verib Moskvaya getməsi elə Sovet ordusuna şərait yaratmaq idi. “Ölü arxasınca danışmağı sevmirəm, danışmaq da istəməzdim. Lakin Vəzirov Azərbaycan Kommunist Partiyasının Birinci katibi olub. Onun dövründə məhz 20 yanvar hadisələri baş verib, ya birbaşa, ya da dolayısı ilə Vəzirovun da əli bu xalqın qanına batıb. O silahı xalqımıza qarşı tuşlayan, qırğın törədən Sovet ordusu olsa da, bu ordunun Bakıya gəlməsinə şərait yaradan Vəzirov və onun kimiləri olub. Düzdür, yeni-yeni üzə çıxan “Vəzirovşünaslar” iddia edirlər ki, 20 yanvar hadisələri zamanı Vəzirov Moskvada olub və artıq Azərbaycan Kommunist Partiyasının Birinci katibi deyilmiş, Bakıya rus qoşununu o çağırmayıbmış və sair. Bilirsiz, sosial şəbəkələrdə Vəzirovu “qəhrəmanlaşdırmaq” istəyən, onu “təmiz”, “əqidəli” biri kimi qələmə vermək istəyən xeyli insan peyda olub, onlar onu süddən çıxmış ağ qaşıq kimi təqdim etmək üçün dəridən-qabıqdan çıxırlar. Sanki ölkəsinə, xalqına xəyanət edən birisi deyil, bir “xalq qəhrəmanıdır”. Vəzirovun və onun kimilərinin milli heysiyyəti olsaydı 20 yanvar qırğını törədilməzdi və Bakı qana bələnməzdi. Vəzirovun bir damcı vətənpərvərliyi, milli təəssübkeşliyi olsaydı, 32 il əvvəl gülləni öz başına sıxardı. Yəni demək istəyirəm ki, Vəzirovu “qəhrəmanlaşdırmaq” düzgün deyil və onun hansı əqidəyə qulluq etdiyi məlumdur. Azərbaycan 44 günlük müharibədə qələbə qazandı, amma Vəzirov bir dəfə də olsun xalqımızı təbrik etmədi. Bu fakt elə onun kimliyini göstərir” - deyə S.Adıgözəlli qeyd etdi.
İradə SARIYEVA
